ဇြပ်ဗု၊ အဝ်ဂါတ် ၄
ဂကောံရပ်လွဟ်မွဲဂကောံ လုပ်စိုပ်ရပ်ဒက်ဏာလဝ် အ္စာ၊အ္စာၝောံမသုန်တၠ ပါလုပ်သီုကဵုဂအုပ်ဘာ နူကဵုဘာတန်သၠုၚ် ကွာန်ဝါခမိ ပွိုၚ်ဍုၚ်ဇြပ်ဗု တွဵုရးဍုၚ်မန်ဂှ်ရောၚ် ဂွံတီကေတ် ဇရေၚ်ညးဒေသတံရ။
တုဲကၠုၚ် ပ္ဍဲဂိတုအဝ်ဂါတ် ၂ အခိၚ်နူဂယး ၜိုတ် ၁၁ နာဍဳ ဂကောံရပ်လွဟ်မွဲဂကောံ ဇြဟတ် ၁၅ တၠ မလ္တက်လဝ်ကယျိုၚ်ဒပ်ဒမၠုက်ဂှ် လုပ်စိုပ်ကၠုၚ် အပ္ဍဲဘာတန်သၠုၚ် ကွာန်ဝါခမိရောၚ် သ္ဂးရ။
ကြဴနူဂှ်တုဲ ကဵုပကောံအ္စာ၊အ္စာၝောံ နွံပ္ဍဲဘာတံဂှ်တုဲ အ္စာ၊အ္စာၝောံမသုန်တၠ ပါလုပ်သီုကဵုဂအုပ်ဘာ ယၟုပါဒၟံၚ်ပ္ဍဲစရၚ်တံဂှ် သ္ဇက်ဒးစၟဳတ်သၟာန်သၟုက်နွံဂးတုဲ ရပ်ဒက်ဏာလဝ်ရ။
ပ္ဍဲကဵုညးဒးဒုၚ်ရပ်ဂမၠိုၚ် ဂအုပ်ဘာ ဥူမျေတ်ဇြဝ်ဥူ၊ အ္စာၝောံတန်သၠုၚ် ဒဝ်ခေန်မျာတ်တ်ထောန်၊ ဒဝ်ခိုၚ်ၚ်မိုဝ် ကေုာံ အ္စာတန်မူလ ဥူကျဝ်သဵုလွေန်၊ ဥူကျဝ်ဖုၚ်ဝေတံ ပါလုပ်ဂှ် ဂွံတီကေတ်ရ။
အ္စာ၊ အ္စာၝောံမသုန်တၠ ပါလုပ်သီုကဵု ဂအုပ်ဘာဝါခမိဂှ် ဒပ်ပၞာန်ဗၠးၜးကောန်ဂကူကရေၚ် KNLA, ဒပ်ပံၚ်ကောံ PDF တံ ကၠုၚ်စိုပ်ရပ်ဒက်လဝ်ရောၚ် ချူထ္မံက်ထ္ၜးဒၟံၚ် ပ္ဍဲကဵုချာန်နေဝ်ထလဳဂရာမ် ရဲထံက်ဂလာန်ဒပ်ပၞာန်တံရ။
စပ်ကဵုလၟေၚ်ဒဒှ်ဏံတုဲ နူကဵုသြၚ်လောန်တိုၚ်(မ်) ဂ္စါန်ဆက်စၠောံသၟာန်သၟုက်လဝ် ညးတာလျိုၚ် ဒပ်မဟာ ၆ ဗော်သွးကောန်ဂကူကရေၚ် KNU ကဵု ဒပ်စဵုဒၞါညးဍုၚ်ကွာန်တံဂှ်ကီုလေဝ် ဒဵုကဵုအခိၚ်လၟုဟ် ဟွံဂွံအဆက်ဏီဖိုဟ်ရ။
တုဲကၠုၚ်ဟွံလအ်တေံဂှ်လေဝ် ဗ္ဒါဲပွဳပွူကွာန်ဝါခမိဂှ် ဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတး သၟဝ်ပၠတရဴ KNLA တံဂှ် က္တဵုဒှ်လဝ် ပေါဲဗ္တိုက်ၜါလ္ပာ်တုဲ အခိၚ်လၟုဟ်ဂှ်လေဝ် ပရေၚ်ပၞာန် ကြံၚ်မ္ၚိုဟ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−