လာယှိုဝ်၊ အဝ်ဂါတ် ၄
နကဵုဗွိုၚ်ဍုၚ်သ္အာၚ်ဂမၠိုၚ် သွက်ဂွံကေတ်ကဵုအရေဝ် ကုကံၚ်ဇြဳပၞာန်သီအဝဵု မဝးပ္ကဝ်ဒၟံၚ်အခေါၚ်အရာမၞိဟ် ကေုာံ အမှုရာဇဝတ်ပၞာန်တံ ဗွဲမသ္ကာတ်မြဟ်ဂှ် ဂကောံကဝ်က MNDAA ဖ္တိုက်ဖ္အောဝ်လဝ်ရ။
တၚ်ဖ္တိုက်ဖ္အောဝ်ဏံဂှ် စုတ်ထ္မံက်ထ္ၜးလဝ် ပ္ဍဲတၚ်လလောၚ်တြး MNDAA မဗျိပၠုတ်လဝ် ကံၚ်ဇြဳပၞာန် စွံပွန်ကုညးဍုၚ်ကွာန်ဟွံမွဲကဵုဒုဟ်ဒဏ်တံတုဲ ဗ္တိုက်ဂြာတ်ဒၟံၚ်မခတိုဟ် အပ္ဍဲပေါဲဗ္တိုက်ရးသေံသ္ကုတ်သၟဝ်ကျာဂှ်ရ။
စနူဂိတုဂျူလာၚ်မံက်တုဲ ပ္ဍဲကဵုပေါဲဗ္တိုက်ရးသေံသ္ကုတ်သၟဝ်ကျာ လာယှိုဝ်၊ နံၚ်ချဵု ကံၚ်ဇြဳပၞာန် ဒးကျလဝ်ပၞာန်အဆက်က်ဂှ် ထောံလဝ်မခတိုဟ် ဗ္တိုက်လဝ် ကုဒေသကောန်အရာပ်ဂမၠိုၚ် သ္ပဒတဴဒၟံၚ် အပ္ဍဲခရိုၚ် (သိန္နီ) ကဵု လံက်ကိုၚ်တံ နကဵုက္ၜၚ်ကျာ ဂၠိုၚ်ၚ်ကဵုဝါဂှ် MNDAA သ္ဂးရ။
စွံပွန်ကဵု ဘာဗ္တောန်လိက်၊ ရုၚ်ဂဥုဲ၊ ဖျာဇၞော် ကေုာံ ဟဝ်တေဝ် ဒၞါဲမၞိဟ်ဂၠိုၚ်တံဂှ်တုဲ ဟိုတ်နူထောံမခတိုဟ်ဗ္တိုက်လဝ်ဂှ်ရ အပ္ဍဲမွဲဂိတု အောန်အိုတ် ကောန်အရာပ် ၁၄ တၠ ဒးချိုတ်လဝ်တုဲ ၂၃ တၠ ကလိဂွံလဝ်ဝပ်တုဲ စမြိုၚ်သ္ၚိဒၟံၚ်တံလေဝ် ဒးလီုလဝ်ရ။
ပ္ဍဲဂိတုအဝ်ဂါတ် ၁ ဂှ် အရာပ် (တုန်းချိန်) ပ္ဍဲလံက်ကိုၚ် ဒၞါဲမုက်ပၞာန်ဟွံသေၚ်တံဂှ် ကံၚ်ဇြဳပၞာန် ကၠုၚ်စိုပ်ထောံလဝ်မခတိုဟ် နကဵုမခတိုဟ် Heavy Weight တံဂှ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး MNDAA ရ။
ဟိုတ်နူပရေၚ်ဗ္တိုက်ဏံတုဲ ဒတုံဗ္တိုဟ်ထ္ကးအာလဝ် လ္တူရုၚ်ဂဥုဲညးဍုၚ်ကွာန် စၟတ် ၂ ဂှ်ကီု၊ သီုကဵုစမြိုၚ်နွံဗ္ဒါဲဗ္ဒါဲတံဂှ်ဂမၠိုၚ် ကေုာံ သီုကဵုလ္တူသ္ၚိဒၟံၚ်ကောန်အရာပ် နွံဗ္ဒါဲဟဝ်တေဝ် Fully Light တံဂှ်ရ။
သ္အာၚ်နူဂှ်ပၠန် ပ္ဍဲဂိတုအဝ်ဂါတ် ၂ တေံဂှ်လေဝ် ကံၚ်ဇြဳပၞာန် ထပ်ထောံလဝ်မခတိုဟ် ကွာန်ယှဳယောန် ပွိုၚ်ဍုၚ်တုၚ်ယှာန် ခရိုၚ်ကဝ်က နကဵုမခတိုဟ် ၁၇ မတုဲ သ္ၚိဒၟံၚ်ကောန်အရာပ်ဗွဲမဂၠိုၚ်ဂၠေၚ် ဒးဆောံလေၚ်လီုလာ်အာလဝ်ပၠန်ရ။
ဟိုတ်နူပရေၚ်ထောံမခတိုဟ်ဏံတုဲ ဂီုကၠီုရုၚ်ဂဥုဲမွဲတၠ ဒးချိုတ်အာလဝ်လွာဲဂှ်တုဲ မၞိဟ်ယဲတိုန်ဒၟံၚ်ရုၚ်ဂဥုဲၜါတၠဂှ်လေဝ် ကလိဂွံဝပ်သ္ကာတ်တ်မြဟ်ဟ်တုဲ မၞိဟ်ကလိဂွံဝပ်ညိညတံလေဝ် နွံလဝ် ဗွဲမဂၠိုၚ်ဂၠေၚ်ရ။
သ္အာၚ်နူဂှ်ပၠန် သ္ၚိဒၟံၚ်ကောန်အရာပ်၊ ဟဝ်တေဝ် ကေုာံ ကွဳစက်တံလေဝ် ဒးလီုလာ်ဆောံလေၚ်အာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
နကဵုကံၚ်ဇြဳပၞာန် စွံပွန်ကဵု သ္ၚိဒၟံၚ်ကောန်အရာပ်တံ ရုၚ်ဂဥုဲတံ ဘာဗ္တောန်လိက်တံဂှ်တုဲ နကဵုတၚ်ရန်တၟံနွံနွံ ထောံမခတိုဟ်ဗ္တိုက်ဒၟံၚ်ဂှ်ဝွံ ဝးပ္ကဝ်ဒၟံၚ်အခေါၚ်အရာမၞိဟ် ကေုာံ အမှုရာဇဝတ်ပၞာန်တံ သ္ကာတ်တ်မြဟ်ဟ်ရောၚ် MNDAA သ္ဂးရ။
ဟိုတ်ဂှ်ရ ပြဝကံၚ်ဇြဳပၞာန် သ္ပအဓိကကဵု မေန်အံၚ်လှာၚ်တုဲ ပြိုက်ဂစိုတ်ထောံမံၚ်မခတိုဟ် ကုညးဍုၚ်ကွာန်ဟွံမွဲကဵုဒုဟ်ဒဏ်တံ နကဵုတၚ်ရန်တၟံနွံနွံဂှ် MNDAA ဟီုဗျိဒစဵုဒစး ဗွဲမသ္ကာတ်မြဟ်တုဲ သွက်ဂွံကေတ်ကဵုအရေဝ်ဂှ် ဖ္တိုက်ဖ္အောဝ်လဝ် ဍုၚ်သ္အာၚ်ရ။
နကဵု MNDAA ပရေၚ်ပၞာန် စွံပွန်လ္တူသ္ၚိညးဍုၚ်ကွာန် ရုၚ်ဂဥုဲ ဘာဗ္တောန်လိက်တံဂှ် ကၠောန်သ္ပအာဟွံသေၚ်တုဲ စမြိုၚ်ဆက်စပ်ကဵုညးဂမၠိုၚ် အပ္ဍဲဍုၚ်လာယှိုဝ်တံကဵု သ္ၚိမၞိဟ်ဒၟံၚ်တံဂှ် ကံၚ်ဇြဳပၞာန် ဗ္တိုက်ပလီုပလာ်ဒၟံၚ်ရောၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−