မနဳလာ၊ အဝ်ဂါတ် ၃
ဖဳလေတ်ဖေန် ကေုာံ ဂျပါန်တံဝွံ ပ္ဍဲဂိတုအဝ်ဂါတ် ၂ တေံ ဒဒှ်ရပံၚ်တောဲပ္ကတ်ပ္ကေၚ်လဝ်ပရေၚ်ပၞာန် ပ္ဍဲၜဳကြုက်သၠုၚ်ကျာ အလန်ကိုပ်ကၠာအိုတ်ဂှ် ဒပ်ပၞာန်ဖဳလေတ်ဖေန် ဟီုလဝ်ရ။
ဣဏံဝွံ သွက်ဂွံကလေၚ်တဝ်စၞေဟ် ကုပြဝကြုက် မကၠောန်ၜိုတ်ဒၟံၚ် အပ္ဍဲဒေသ ဗီုပၟိက်စိုတ်ဂှ်တုဲ အကြာကၟိန်ဍုၚ်ဂမၠိုၚ် ပံၚ်တောဲရေၚ်တၠုၚ်လဝ် လက္ကရဴအိုတ်ရ။
တုဲကၠုၚ်ဂိတုဂျူလာၚ် ၃၁ တေံ အကြာမနဳလာ ကဵု ဝါယှေန်တာန် ပံၚ်တောဲပ္ကတ်ပ္ကေၚ်လဝ်ပရေၚ်ပၞာန် သာ်ဏံကီုတုဲဂှ် အလန်ဏံဂှ် ဂျပါန် ကေုာံ ဖဳလေန်ဖေန် ထပ်ပံၚ်တောဲပ္ကတ်ပ္ကေၚ်ကၠုၚ်ပရေၚ်ပၞာန် အပ္ဍဲအပိုၚ်အခြာဒေသပရေၚ်ပိုန်ဒြပ်ဗွဲတၟေၚ်ဂှ်ရ။
ညံၚ်ပရေၚ်ဗၠးၜးကၠးမှး ဒေသအေန်ဒိုဝ်−ပသိဝှေခ် ဂွံဒှ်ကၠုၚ်နတဲဂှ် ပွမပ္ကတ်ပ္ကေၚ်ပရေၚ်ပၞာန်ဂှ်ဝွံ ပ္ဍဲကဵုပရေၚ်ရေၚ်တၠုၚ်ပံၚ်တောဲ အကြာဒေသကဵု ဍုၚ်သ္အာၚ်တံ ဇြဟတ်ဂွံခိုဟ်ဂှ် ဒဒှ်ရပါလုပ်မွဲဒကုတ်မွဲဒကဴကီုဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ဒပ်ပၞာန်ဖဳလေတ်ဖေန်ရ။
ဖဳလေတ်ဖေန် ကေုာံ ဂျပါန် မဒှ်မဟာမိတ်အမေရိကာန်ဂှ်ဝွံ ပ္ဍဲဂိတုတုဲကၠုၚ်တေံ ထ္ပက်လဝ်စၟတ်တဲ တၚ်တုပ်စိုတ် သွက်ဂွံဖျေံလဝ်ဒပ်အကြာၜါဍုၚ်ညးသ္ကအ်ရ။
ဘရူနာၚ်၊ မလေဝ်ယှာ၊ ဖဳလေတ်ဖေန်၊ ထိုၚ်ဝါန် ကေုာံ ဗဳယေတ်နာမ်တံလေဝ် ဒေသညးတံပိုၚ်လဝ်ဏောၚ် ဟီုလဝ် မပါလုပ်ဒၟံၚ် ပ္ဍဲၜဳကြုက်သၠုၚ်ကျာအလုံမွဲဂှ် ကြုက် ဟီုလဝ်အပိုၚ်ညးတံရ။
ကြဴနူပၞာန်ဂၠးကဝ်ဒုတိယတုဲဂှ် နဒဒှ်လဂါံဇိုၚ် သ္ၚောဲတိတ်အာ နူကဵုမူဒတူလိုၚ် ဗွဲမၜိုဟ်လလမ်ဂှ် ပ္ဍဲသၞာံတုဲကၠုၚ်တေံ ဂျပါန် လလောၚ်တြးလဝ် အစဳဇန်ဒက်ပ္တန်ဇြဟတ်ပၞာန်ဇၞော်အိုတ်ရ။
ဂျပါန်ဝွံ ပ္ဍဲၜဳကြုက်သၠုၚ်ကျာဂှ် ပရေၚ်ကယျာန်ဓဝါန် စပ်ကဵုတွဵုဒၞက်ဗလးဍာ် ကုကြုက် နွံဒၟံၚ်တုဲ ပ္ဍဲကဵုဒၞါဲဏံ ကၟိန်ဍုၚ် သ္ၚိရေၚ်ကၟေၚ်ဆက်ၜါဍုၚ်ဝွံ ဆေၚ်လဝ်မုက်ညးသ္ကအ် ဂၠိုၚ်ၚ်ကဵုဝါရ။
ပရေၚ်ပံၚ်တောဲပ္ကတ်ပ္ကေၚ်ပရေၚ်ပၞာန် ဖဳလေတ်ဖေန် ကေုာံ ဂျပါန် မွဲဍုၚ်က္ၜၚ်ပၞာန်ၜါဖ္ဍိုက်ပါလုပ်လဝ်ဏံဂှ်တှ်ေ က္တဵုဗဒှ်ကဵုဒေါသ ကုကြုက် ဗွဲဨကန်ရ။
Ref: Reuters