လံၚ်လုၚ်၊ အဝ်ဂါတ် ၆
အကြာကောန်ဒပ်ကံၚ်ဇြဳပၞာန် ဖျေံလဝ်ဒပ် လ္တူဍုၚ်လံၚ်လုၚ် ရးတၞၚ်သဳတံဂှ် ပရေၚ်ပန်ပှော်က္တဵုဒှ်လဝ်တုဲ ဇီုကပိုက်ချိုတ်တံ နွံလဝ်ရောၚ် ဂွံတီကေတ် ဇရေၚ်ညးဒေသတံကဵု ဂကောံဇြဟတ်ပၠန်ဂတးတံရ။
ပ္ဍဲဂိတုအဝ်ဂါတ် ၂ အခိၚ်ဗ္တံ ၜိုတ် ၁၁ နာဍဳဂှ် ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲဗ္ဒိုပ်ဗၠာဲသၟိၚ်ၝောံဍုၚ်လံၚ်လုၚ်ကဵု ကောန်ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲရုၚ်သ္ကိုပ်အုပ်ဓုပ်ကာနာနာတံ ဒှ်လဝ်ပန်ပှော် ညးသ္ကအ်ရ။
အတိုၚ်ဂလာန်ညးဒေသတံဂှ်မ္ဂး အပ္ဍဲပရေၚ်ပန်ပှော် ကောန်ဒပ်ကံၚ်ဇြဳပၞာန်ရေၚ်သ္ကအ် ဒှ်လဝ်ပန်ပှော်ဂှ် ကောန်ဒပ်ကံၚ်ဇြဳပၞာန် ၄ တၠ ချိုတ်အာလဝ်တုဲ ဗွဲမဂၠိုၚ်ဂၠေၚ် ဇီုကပိုက်ကလိဂွံလဝ်ဝပ်ရောၚ် သ္ဂးရ။
လၟေၚ်ဒဒှ်ဏံဝွံ ပ္ဍဲဂိတုအဝ်ဂါတ် ၁ အခိၚ်ဇိုၚ်သဝ်တ္ၚဲဂှ် ကောန်ဒပ်ကံၚ်ဇြဳပၞာန်ဂမၠိုၚ်ဝွံ ထ္ၜးဟိုတ်ကဵုစရၚ်ကၟုဲ သ္ၚိလ္တူဍုၚ်တံဂှ်တုဲ တိုန်မွဲသ္ၚိစှ်ေမွဲသ္ၚိ နူကဵုလုပ်စိုပ်စၟဳတ်ဒၟံၚ်ဂှ် နူကဵုသ္ၚိဒၟံၚ်တံဂှ် သီဂိုၚ်ဏာလဝ် ကပေါတ်မၞုံကဵုၚုဟ်မး မပ္တံကဵုထဝ်သြန် ကေုာံ ဖုၚ်တဲတံရ။
ကြဴနူဂှ်တုဲ ပ္ဍဲဂိတုအဝ်ဂါတ် ၂ အခိၚ်ဇိုၚ်သဝ်တ္ၚဲ ပ္ဍဲကဵုပါ်ပရအ်ကပေါတ်တံဏံဂှ် မွဲကဵုမွဲ က္တဵုဒှ်လဝ်ပြသၞာတုဲ ပရေၚ်ပန်ပှော်ၜါလ္ပာ် က္တဵုဒှ်လဝ်ရောၚ် ညးဒုၚ်တာလျိုၚ်လလောၚ်ပရိုၚ် ဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ်ဂှ် လဴထ္ၜးလဝ် စပ်ကဵုအကာဲအရာဲ ဂၠိုက်ဂၠါဲဂွံတီကေတ်လဝ်တံဂှ်ရ။
အတိုၚ်ဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် ဂၠိုက်ဂၠါဲဂွံတီကေတ်ဂှ်မ္ဂး အပ္ဍဲပရေၚ်ပန်ပှော်ဏံဂှ် ကောန်ဒပ်ကံၚ်ဇြဳပၞာန် ၃ တၠ ချိုတ်အာလဝ်တုဲ ဟွံအောန်နူကဵု ၇ တၠ ဇီုကပိုက်ကလိဂွံလဝ်ဝပ်ရောၚ် သ္ဂးရ။
သ္အာၚ်နူဂှ်ပၠန် ကြဴနူပရေၚ်ပန်ပှော်က္တဵုဒှ်တုဲဂှ် ကွဳစက်ဖ္ဍိုက်မၞိဟ်ယဲဂမၠိုၚ် လုပ်စိုပ်ကၠုၚ် အပ္ဍဲဗ္ဒိုပ်ဗၠာဲသၟိၚ်ကဵု ရုၚ်သ္ကိုပ်အုပ်ဓုပ်ကာနာနာတံဂှ်တုဲ လၟိဟ်ကောန်ဒပ်ကံၚ်ဇြဳပၞာန် ဒးချိုတ်အာလဝ် ချိုတ်တ်ပၠိုတ်တ်ဂှ် ဟွံဂွံတီကေတ်ကီုလေဝ် ဇီုကပိုက်ကလိဂွံဝပ်တံ နွံဒၟံၚ်ရောၚ် ညးဒေသမွဲတၠပၠန်ဂှ် ဟီုရ။
အပ္ဍဲလၟေၚ်ဒဒှ်ဏံဂှ် ကောန်ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲဌာနက္ဍိုက်ပ်ပရေၚ်အုပ်ဓုပ်ကာနာနာ ပွိုၚ်ဍုၚ်လံၚ်လုၚ်တံဝွံ ပန်ပှော်လဝ်လွဟ်ဇၞော် ဗ္ဒါဲပွဳပွူ ဍုၚ်လံၚ်လုၚ် ကြာန်န်ရ။
သၞာံတုဲကၠုၚ်တေံဂှ်လေဝ် ပ္ဍဲဗ္ဒိုပ်ဗၠာဲသၟိၚ်ဍုၚ်လံၚ်လုၚ်ဂှ် ကောန်ဒပ်ကံၚ်ဇြဳပၞာန်ရေၚ်သ္ကအ် ဒှ်လဝ်ပန်ပှော်တုဲ မွဲတၠ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media