စွံပွန်ဗ္တိုက်လ္တူကောန်အရာပ်တံတုဲ ဗ္တိုက်ဒၟံၚ်တံဂှ် ကံၚ်ဇြဳပၞာန် ဆက်ကလိလောန်ဒၟံၚ်ရောၚ် KNU ဟီု

ဘာပန်၊ အဝ်ဂါတ် ၆

ပ္ဍဲခရိုၚ်ဘာပန် တိဍာ်အုပ်ဓုပ်ကဝ်တူလေဝ်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံဂှ် ပေါဲဗ္တိုက်ဆက်က္တဵုဒှ်ဒၟံၚ်တုဲ ပရေၚ်ဗ္တိုက်လွဟ်ဇၞော် ကေုာံ တရဴကျာ မစွံပွန် လ္တူကောန်အရာပ်တံဂှ် ဒပ်ကံၚ်ဇြဳပၞာန် ဆက်ကလိလောန်လဝ်ရောၚ် KNU ဗဟဵု လလောၚ်ပ္တိတ်လဝ်ရ။

ပ္ဍဲခရိုၚ်ဘာပန်ဂှ် တုဲကၠုၚ်နူဂိတုဂျူလာၚ် ၁ စဵုကဵု ၃၁ အပ္ဍဲပွိုၚ်မွဲဂိတု အကြာဒပ်ပၠန်ဂတး သၟဝ်သ္ကိုပ်သ္က ဒပ်ပၞာန်ဗၠးၜးကောန်ဂကူကရေၚ် KNLA တံကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက် က္တဵုဒှ်လဝ် စဵုကဵု ၁၀၁ ဝါရ။

အပ္ဍဲပေါဲဗ္တိုက်ဏံဂှ် ဒပ်ကံၚ်ဇြဳပၞာန် ၅၂ တၠ ချိုတ်အာလဝ်တုဲ ၁၂ တၠ ဇီုကပိုက်ကလိဂွံလဝ်ဝပ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ဗဟဵုရ။

သ္အာၚ်နူဂှ်ပၠန် စမြိုၚ်ဒပ်ကံၚ်ဇြဳပၞာန် ဒးအာ ၂ မတုဲ သီုကဵုချေံ ၂ ချိုတ်အာလဝ်တုဲ အပ္ဍဲပေါဲဗ္တိုက်ဂှ် လ္ပာ်ဒပ်ပံၚ်ကောံပၠန်ဂတး KNLA တံ ဇီုကပိုက်ဒးဟွံမွဲပုဟ်ဂှ် ထ္မံက်ထ္ၜးလဝ်ရ။

အပ္ဍဲပေါဲဗ္တိုက်တံဏံဂှ် လ္ပာ်ကံၚ်ဇြဳပၞာန် ဖျေံကဵုဒၟံၚ်ဇွောံမ နူကဵုက္ၜၚ်ကျာသၟးရဂွံတုဲ ပရေၚ်စွံပွန်ဗ္တိုက် အပ္ဍဲကွာန်ဒၞါဲညးဍုၚ်ကွာန်ဂမၠိုၚ် မံၚ်တန်တဴတံဂှ်ကဵု အပ္ဍဲဒၞါဲကမၠောန် နူကဵုလွဟ်ဇၞော် ကေုာံ တရဴကျာတံဂှ် ကၠောန်သ္ပလဝ် ဂၠိုၚ်ၚ်ကဵုဝါရောၚ် KNU ဗဟဵု သ္ဂးရ။

ဒပ်ပံၚ်ကောံပၠန်ဂတး သၟဝ်ပၠတရဴ ဒပ်မဟာ ၅ KNLA တံ ပ္ဍဲဂိတုဖေဖဝ်ဝါရဳကြပ်အိုတ်တေံ ကြဴနူဗ္တိုက်ထိၚ်ဒက်ဂွံ ဍုၚ်ဘာပန် တွဵုရးကရေၚ်တုဲဂှ် ဆက်ထ္ပက်ပၞာန်ဗ္တိုက်ဒၟံၚ် ဗ္ဒိုပ်တမ်ဒပ် ကေုာံ ကုန်ဗျူဟာ ဒပ်ကံၚ်ဇြဳပၞာန် နွံသ္ကုတ်သၠုၚ်ကျာဍုၚ်ဂှ်ရ။

ဟိုတ်နူပရေၚ်ဗ္တိုက်ကၟာတ်လဒဵု ဒပ်ပံၚ်ကောံပၠန်ဂတး ဒပ်မဟာ ၅ KNLA တံဂှ်တုဲ သီဂွံလဝ် တမ်ဒပ်ကံၚ်ဇြဳပၞာန် ခလရ ၁၉ ၊ စစန ၆၄၂၊ ခမရ ၄၃၄ မၞုံဗ္ဒါဲဍုၚ်ဘာပန်တံဂှ်တုဲ ဗျူဟာပၞာန်ဘာပန် သှ်ေဒၟံၚ်တံကဵု တမ်ဒပ် ခမရ ၃၄၀ ၊ ၃၄၁ တံဂှ် ဆက်ပူဗဵုၚ်ကၟာတ်လဒဵုတုဲ ဗ္တိုက်ဒၟံၚ်ဂှ်ရ ပေါဲဗ္တိုက်ၜါလ္ပာ်တံ ဆက်က္တဵုဒှ်ဒၟံၚ်ရ။

သ္အာၚ်နူဂှ်ပၠန် ဗ္ဒိုပ်ဒပ်ကံၚ်ဇြဳပၞာန် ၁၅ ဗ္ဒိုပ် ပါလုပ်သီုကဵုကျံက်ညှာတ်၊ ကဟဳကျိုဝ်၊ မဝ်ရေတ်ကျိုဝ် မစုက်လုက်ကဵုပယျဵုသေံ အပ္ဍဲတိဍာ်ဒပ်မဟာ ၅ ဂှ် ကလေၚ်သီဂွံလဝ်တုဲ တိဍာ်နွံမွဲဒမြိပ်ၜဳသၚ်လောန်သီုဖအိုတ်ဂှ် ကလေၚ်သီဂွံလဝ်ရောၚ် KNLA ဗဟဵု လလောၚ်ပ္တိတ်ကဵုလဝ်သမ္တီရ။

ပရိုၚ်−သြၚ်လောန်တိုၚ်(မ်)

ဗီု−KHRG