ဌာန်ဂအုပ်ပၞာန်ရးဨသာန် ဒးကျအာဂှ် ဒှ်နိဒါန် သၞောတ်တၠအဝဵုပၞာန် ဂွံသရိုဟ်စှ်ေဟာ

လာယှိုဝ်၊ အဝ်ဂါတ် ၆

ဌာန်ဂအုပ်ပၞာန်ရးဨသာန်ဒပ်ပၞာန်ဗၟာ ဖျေံသ္ဇိုၚ်လာယှိုဝ် နကဵုတဆိပ်သၟိၚ်တ္ၚဲ နူကဵုရးသေံသ္ကုတ်သၟဝ်ကျာဂှ်ဝွံ ပ္ဍဲလက်ထက်က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ်ဏံဂှ်တှ်ေ ဒးဆောံလေၚ်အာလဝ်ရ။

ဒပ်ပံၚ်ကောံ MNDAA တံ ပ္ဍဲဂိတုဂျူလာၚ် ၃ တေံ ဝေၚ်လဝ်ပရေၚ်ပၞာန် ကုဗ္ဒိုပ်ဒပ်ကံၚ်ဇြဳပၞာန် မွဲဒမြိပ်ဍုၚ်လာယှိုဝ်တံဂှ်တုဲ ပ္ဍဲဂိတုအဝ်ဂါတ် ၃ ဂှ် သီဂွံလဝ် ဌာန်ဂအုပ်ပၞာန်ရးဨသာန်ဂှ် ပေၚ်ၚ်ရောၚ် လလောၚ်ပ္တိတ်လဝ်ပရိုၚ် သီုကဵုဗီုဓာတ်ဂမၠိုၚ်ရ။

အပ္ဍဲပရေၚ်ပၞာန် ၁၀၂၇ လပှ်ဒုတိယဂှ် ဒပ်ပၞာန်မဟာမိတ် ဒဳမဝ်ကရေတ်တေတ်ကောန်ဂကူဗၟာ MNDAA သီဂွံလဝ် ဌာန်ဂအုပ်ပၞာန်ရးဨသာန် ဖျေံသ္ဇိုၚ်လာယှိုဝ်ဂှ်ဝွံ ကလိဂွံလဝ်ပေါဲအံၚ်ဇၞး ဍိုက်က်ပေၚ်ၚ်ရောၚ် သ္ဂးရ။

အကြာပ်ဒပ်ဇၞော် ဇြေယျ နူကဵုဒပ်ကျာ သ္ပလဝ် CDM ဂှ်တှ်ေ ဌာန်ဂအုပ်ပၞာန်ရး အာယုက်မၞုံ ၅၀ သၞာံပြၚ်ဏံ ညံၚ်ဂွံစှ်ေအာ ဗ္တိုက်မာန်လဝ်ဂှ်ရ ပ္ဍဲကဵုစိုတ်ဓာတ်ဂကောံပၠန်ဂတးဒၟံၚ်ဂမၠိုၚ်တံဂှ်တှ်ေ ဒှ်အာညံၚ်ထ္ၜးဏာဂၠံၚ်ယျဂှ် သ္ၚဳဂၠိပ်လဝ်ရ။

“အလုံဌာန်ဂအုပ်ပၞာန်ရး အာယုက်မၞုံ ၅၀ သၞာံပြၚ်ဏံမွဲဂှ် ညံၚ်ဂွံစှ်ေအာ ဗ္တိုက်မာန်ဟီုတှ်ေ ပ္ဍဲကဵုစိုတ် ဂကောံပၠန်ဂတးဒၟံၚ် ညးပၠန်ဂတးသှ်ေဒၟံၚ်တံဂှ် ဒှ်အာညံၚ်ရဴထ္ၜးဏာဂၠံၚ်ယျ။ ဒှ်အာတိုၚ်ခဳယျ။ ပိုယ်တံလေဝ် ညံၚ်ဂွံဂွံဗီုဏံ ကၠောန်ဏောၚ် ကသပ်သာ်ဏံ လုပ်အာယျ။ အေ ဂှ်တှ်ေ နကဵုဒပ်ပၞာန် ဂွံဗ္တိုက်သရိုဟ်ထပိုတ်ရိုဟ်ကၞက် ဂကောံပၠန်ဂတးဒၟံၚ်တံဂှ် ဒှ်ဟွံမာန်ရပုဟ်” သာ်ဝွံ သ္ဂးရ။

ပ္ဍဲဒပ်ပၞာန် ပ္ဍဲကဵုဒေသပၞာန်ရး နွံ ၁၄ ဂှ် ဌာန်ဂအုပ်ပၞာန်ရးဨသာန်ဂှ်ဝွံ ဒှ်ဒေသပၞာန်ရး အလေံအခိုက်ကၞာဇၞော်သၠဲမွဲတုဲ ပ္ဍဲကဵုပေါဲဗ္တိုက်ဗလးတိဏံဂှ်လေဝ် ဒှ်ဌာန်ဂအုပ်ပၞာန်ရး ဒးဗ္တိုက်ပၞာန်ဂၠိုၚ်အိုတ်မွဲရ။

ဌာန်ဂအုပ်ပၞာန်ရး သာ်ဏံဂှ်ဝွံ ကံၚ်ဇြဳပၞာန်ဟီုဒၟံၚ် ဗ္တိုက်သရိုဟ်ကၠေံ ပၞာန်သၠဲတိ ဗော်ကောန်မျူနေတ်ဍုၚ်ဗၟာကဵု ပၞာန်သၠဲတိကူမေန်တာန်ဍုၚ်သ္အာၚ်တံ ဂၠိုၚ်ၚ်ကဵုဝါမာန်ကီုလေဝ် ပ္ဍဲပရေၚ်ပၞာန် ၁၀၂၇ ဏံဂှ်တှ်ေ ဒးအုပ်ကၠေံအာနိဂီုရ။

ဂကောံကရေၚ် KNU ၊ ဂကောံကရေၚ်ဍာဲ KNPP ကေုာံ ဂကောံချေၚ် CNF မပၠန်ဂတးဒၟံၚ် ကုကံၚ်ဇြဳပၞာန်တံဂှ်တှ်ေ စပ်ကဵုဌာန်ဂအုပ်ပၞာန်ရးဨသာန် ဒးသရိုဟ်စှ်ေအာဂှ်တုဲ ဒဒှ်ရမိပ်တဴစိုတ်ဗွဲမလောန်ဂှ် ပ္ဍဲဂိတုအဝ်ဂါတ် ၄ တေံ လလောၚ်ပ္တိတ်လဝ် လစွံစိုတ်ရ။

ပဒိုဝ်သဝ်တဝ်နဳ ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ဂှ်တှ်ေ ပၞာန်ရးဨသာန် ဒပ်ပၞာန်ဗၟာ လေပ်ဟီုကြီုဂှ်ဝွံ ဟွံထေၚ်လဝ်မွဲသာ် ဒးကျအာလဝ်ဂှ်ရ ပၞာန်ရးသှ်ေဒၟံၚ်တံဂမၠိုၚ်လေဝ် ဒှ်ဒၟံၚ်ဍာ်သရိုဟ်စှ်ေအာ သိုက်က်ရဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ဌာန်ဂအုပ်ပၞာန်ရးဨသာန် ဍေံတံပ္တိတ်လဝ်ဇြဟတ် တုဲတှ်ေ ဟီုကြီုစလေပ် ဒဒှ်ရကြံၚ်မ္ၚိုဟ်ဗိုန်ခိုၚ်ဗွဲမလောန် ပ္ဍဲကဵုဌာန်ရးပၞာန် ၁၄ ဂှ် လၟုဟ်တှ်ေ ဟွံထေၚ်လဝ်မွဲသာ် မွဲဂိတုလေဝ်ဟွံပေၚ်ဏီဂှ် ကျအာယျဟီုတှ်ေ ရးပၞာန်သှ်ေတံဂှ်လေဝ် ညံၚ်ရဴဒိုဝ်မဳနဝ် effect ကီု သရိုဟ်​စှ်ေအာ သိုက်က်ဏောၚ်ဟီုဂှ် စိုပ်ဒၟံၚ်ဍာ် ပိုယ်တံဂွံဆဵုကေတ်ဒၟံၚ် ချိုတ်တ်ပၠိုတ်တ်ဂှ်ယျ” သာ်ဝွံ သ္ဂးရ။

အတိုၚ်ဗီုဓာတ် ပြးထၞာန်ဒၟံၚ် ပ္ဍဲဇာဇၞိက်ပရေၚ်မၞိဟ် ပ္ဍဲဂိတုအဝ်ဂါတ် ၄ ဂှ်မ္ဂး MNDAA ရပ်ဂွံလဝ် သၞာဲဒဴဗိုလ်ပၞာန် ၃ တၠ ပါလုပ်သီုကဵု သ္ကိုပ်ရးပၞာန်တြေံ ဌာန်ဂအုပ်ပၞာန်ရးဨသာန် ဗိုလ်ဇၞော်သဵုတေအ်ရ။

မွဲလ္ပာ်ဂှ်ပၠန် ကောန်ဒပ်ကံၚ်ဇြဳပၞာန်တံကဵု ကောန်ဇာတ်ဂြောဝ်ဂတာ ၄၇၀၀ ပြၚ်ဂှ်လေဝ် ဒုၚ်ကျဖျေံလဝ်လွဟ်ရောၚ် ဂွံတီကေတ် အတိုၚ်ဌာန်ပရိုၚ်ဖျေံသ္ဇိုၚ်အပ္ဍဲဒေသတံရ။

ဗိုလ်ဇၞော် CDM ဇြေန်ယဝ်ဂှ်တှ်ေ ညးဒုၚ်ကျဖျေံလွဟ် ဂၠိုၚ်ကဵုလ္ၚီတံဂှ်ဝွံ စိုတ်မိက်ဂွံစဵုဒၞါကဵု သ္ကိုပ်ဗိုလ်တံဂှ် ဟွံမွဲရတုဲ အလဵုသ္ကိုပ်ဗိုလ်ပၞာန်တံဂှ်လေဝ် ကောပ်ကာဲကောန်ဒပ် ကေုာံ ကောန်ဇာတ်ဂြောဝ်ဂတာတံဂှ်တုဲ ဗ္တိုက်ဟွံမာန်ဂှ် ပါ်ပါဲလဝ်ရ။

“ ၄၇၀၀ ဏံဂှ်လေဝ် စိုတ်မိက်ဂွံစဵုဒၞါကဵု သ္ကိုပ်ဗိုလ်တံဂှ် ဟွံမွဲရပုဟ်။ ဒှ်အာ ပ္ဍဲကဵု Standard Army ဏံဂှ် ညအ်ရ။ မူဟိုတ်ရောတှ်ေ သ္ကိုပ်ဗိုလ်ဏံပိတၠဂှ်တှ်ေ ပ္ဍဲကဵုလၟိဟ်မၞိဟ် ၄၇၀၀ ဂှ် ဗ္တိုက်ပၞာန်မာန်ဂှ် အောန်အိုတ်မွဲလ္ၚီ ဒးနွံဏောၚ်။ လွဟ်လ္ၚီဟီုဂှ်လေဝ် ဟွံမွဲဟွံဒှ်ပုဟ်။ မူဟိုတ်ရောတှ်ေ ဗ္ဒါဲဂှ်ဂှ် ဒပ်စြေက် ကပေါတ်လွဟ်ပၞာန် စၟတ် ၂၄၂ နွံမံၚ်ဏောၚ်။ ပ္ဍဲကဵုဍေံတံ ဒပ်အရန် လွဟ်လက်နက်မကမ်တံလေဝ် နွံလဝ်တုဲတုဲရ။ မကမ်လွဟ်ဟွံရုမ်လေဝ် ဟွံသေၚ်ပုဟ်။ အလဵုသ္ကိုပ်ဗိုလ်ပၞာန်တံဏံရ ကောပ်ကာဲကောန်ဒပ်သှ်ေတံကဵု ကောန်ဇာတ်ဂြောဝ်ဂတာတံဂှ်တုဲ ဗ္တိုက်ဟွံမာန်ရောၚ်” သာ်ဝွံ သ္ဂးရ။

ညးမၞုံအခေါၚ်ဟီုဂးကံၚ်ဇြဳပၞာန် သ္ကိုပ်ဗိုလ်ဇၞော် ဇြဝ်မေန်ထောန်ဂှ်တှ်ေ ဌာန်ဂအုပ်ပၞာန်ရးဨသာန် ဒးကျအာဂှ် ဒုၚ်လဝ်ဝန်တုဲ နကဵုကောန်ဒပ်လုပ်လဝ်ပေါဲဗ္တိုက် မၞုံကဵုသတ္တိအစောံစရာဲတံဂှ် သ္ပတဴစၟတ်သမ္တီရောၚ် ပ္ဍဲဂိတုအဝ်ဂါတ် ၅ တေံ လလောၚ်ပ္တိတ်လဝ်ပရိုၚ်ရ။

ဟိုတ်နူပရေၚ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ်တုဲ အပ္ဍဲပေါဲဗ္တိုက်ထပိုတ်ရိုဟ်ကၞက်ဗ္တိုက်သရိုဟ် သၞောတ်တၠအဝဵုပၞာန် က္တဵုဒှ်ကၠုၚ်ဂှ် နကဵုဒပ်ပၞာန် ဒးကျအာလဝ် ဌာန်ဂအုပ်ပၞာန်ရးမွဲ အလန်ကၠာအိုတ်ရ။

ညးခါတ်အကာဲပရေၚ်ပၞာန်တံဂှ်တှ်ေ ဌာန်ဂအုပ်ပၞာန်ရးမွဲ ကျဗြံဂှ်ဝွံ စိုပ်ကၠုၚ်ဒၟံၚ် နိဒါန်သၞောတ်တၠအဝဵုပၞာန်ဂွံသရိုဟ်စှ်ေ ဂကောံရပ်လွဟ်ကောန်ဍုၚ်အရၚ်တံကဵု ဒပ်ပၠန်ဂတးတံ မၞုံမံၚ်ပၟိက်တံဂှ်ယျဂှ် ထံက်ထ္ၜးလဝ်ရ။

ပရိုၚ်−သြၚ်လောန်တိုၚ်(မ်)

ဗီု−MNDAA