မတ်မလီု၊ အဝ်ဂါတ် ၂၃
အပ္ဍဲကာလသီအဝဵုပွိုၚ်ိပသၞာံပြၚ်ဏံ ကရောံၚုဟ်ဗၞိက်ဖျာသ္ဇိုၚ် ထ္ပက်တိုန်ကၠုၚ်ဒၟံၚ်ဂှ် ဟိုတ်နူပြသၞာ သြန်လုပ်ကဵု သြန်တိတ်ဟွံသၟဟ်တးတုဲ ညးဍုၚ်ကွာန်ဂမၠိုၚ်ဝွံ ဒှ်ကၠုၚ်ဒၟံၚ် အကြေပ်အဂြတ် ပရေၚ်စသုၚ်မံၚ်စံၚ်ရ။
ၚုဟ်ဗၞိက်စၞစသုၚ်သ္ဇိုၚ်တံဂှ်ဝွံ အပ္ဍဲကာလသီအဝဵုဏံ ကပေါတ်မွဲဂကူမ္ဂး ၚုဟ်သၠုၚ်တိုန်ကၠုၚ် အောန်အိုတ် နူကဵုပိဆ စဵုကဵု ၁၀ ဆပြၚ်ရ။
ပ္ဍဲကဵုဏံ ၚုဟ်သ္ၚု ညးဗြဴတၠသ္ၚိတံ ဒးရပ်စပ်ဒၟံၚ် ဟွံမွဲဟွံဂွံတံဂှ်လေဝ် ကၠာတေံ သ္ၚုမွဲရိုက် နွံကၠုၚ်လဝ် ၜိုတ် ၃၀၀၀၀ ဒ္ကေဝ်ဓဝ်ကီုလေဝ် အခါလၟုဟ်ဂှ်တှ်ေ မွဲရိုက်ဂှ် ထၠာ်တိုန်ကၠုၚ် စဵုကဵုမွဲကိုဋ်ဘာ်ပြၚ်ရ။
သ္အာၚ်နူဂှ်ပၠန် ၚုဟ်ကၠေၚ်စဂှ်လေဝ် နူစသီအဝဵုတေံ မွဲပသာ နွံကၠုၚ်လဝ် ၂၀၀၀ ဒ္ကေဝ်ဓဝ်ကီုလေဝ် အပ္ဍဲပွိုၚ်ပိသၞာံဘာ်ပြၚ်ဏံ မွဲပသာဂှ် ၚုဟ်သၠုၚ်တိုန်ကၠုၚ် စဵုကဵု ၂၀၀၀၀ ပြၚ် ဗ္ဒါဲ ၁၀ ဆရ။
ပ္ဍဲကဵုကပေါတ်ဗၞိက်အရပ်စပ်ဖဴ မပ္တံကဵုခၟာဲစာၚ်၊ ခၟာဲအဒါတံဂှ်လေဝ် မွဲမဂှ် ၚုဟ်တိုန်ကၠုၚ် နူ ၁၀၀ စဵုကဵု ၆၀၀ ဒ္ကေဝ်တုဲ ကဝ်ဖဳမေတ်မွဲထုပ်ဂှ်လေဝ် နူ ၁၀၀ စဵုကဵု ၆၀၀ ၚုဟ်သၠုၚ်တိုန်ကၠုၚ် ဗ္ဒါဲတြဴဆရ။
သ္အာၚ်နူဂှ်ပၠန် ၚုဟ်ကသိုန်ဗ္တာၚ် ကၠာတေံ မွဲပသာ နွံကၠုၚ်လဝ် ၜိုတ် ၆၀၀၀ ဒ္ကေဝ်ဓဝ်ဂှ်လေဝ် မွဲပသာ ဒှ်ကၠုၚ် စဵုကဵု ၃၀၀၀၀ ဒ္ကေဝ်ပြၚ်တုဲ ဖျုန်စာၚ်၊ ဖျုန်ကၠိက်တံဂှ်လေဝ် မွဲပသာဂှ် ဒှ်ကၠုၚ်ၚုဟ် စဵုကဵု ၂၅၀၀၀ ဒ္ကေဝ်ရ။
ညးဗြဴတၠသ္ၚိမွဲတၠဂှ်တှ်ေ ဟိုတ်နူၚုဟ်ဗၞိက်ဖျာတံ ၚုဟ်သၠုၚ်တိုန်ကၠုၚ် ကဵုဆတုဲ ဒးပသောၚ်ဒၟံၚ်ပရေၚ်ဗုၚ်ဂၞဴ နကဵုနဲကဲခၞေံရပ်တံဂှ် ဟီုကရောတ်ကၠုၚ်ရ။
“တိုန်ဒၟံၚ်ဟဂှ်။ သီုကၠေၚ် သီုဖအိုတ်ဂှ် ရာန်မွဲတဲတှ်ေ တိုန်မွဲတဲ။ စနူကဵုသၞေဝ်ကေဝ်တံဂှ် တိုန်ဒၟံၚ်။ တၞုၚ်ဝုန်မွဲစန်ဂှ် ဒှ်ဒၟံၚ် ၅၀၀ ယျ။ အရိုဟ်တွဵုမ္ဂး လှုဲၜိုတ် ၅၀၀၀ တှ်ေ ရပ်ဂွံမံၚ်ဏီ။ လၟုဟ်ဂှ် ၜိုတ် ၁၅၀၀၀၀ မှ ဂွံရပ်ရုမ်။ ညအ်ရဂှ် သ္ၚု၊ ကၠေၚ်၊ ၜဵုတံ နွံမံၚ်တုဲတုဲဏောၚ်။ ဒးခၞေံရပ်ဒၟံၚ်ရ။ ဟွံရပ် ဗီုလတေံရပုဟ်။ ကၠေၚ်တံမုတံဂှ် ရပ်ဖအောန်ဖျေံတုဲ ဒးဍုန်ဒၟံၚ်ရ။ ဟွံတၟေၚ်ပုဟ်ဂးတုဲ ရာန်ကေတ်ဖျုန်ညိည ၜိုတ်မွဲကလောံဂှ် ပရအ်စညးသ္ကအ်ရ၊ ဒးဖန်ဒၟံၚ်ဗီုဏံရ” သာ်ဝွံ သ္ဂးရ။
ၚုဟ်ဗၞိက်ဖျာတံဂှ်ဝွံ ဟိုတ်နူၚုဟ်မးသြန်ဗၟာ စှ်ေကၠုၚ်ကီု၊ ၚုဟ်ဗၞိက်ဖျာတံ တိုန်ကၠုၚ်ကဵုဆကီု၊ ပရေၚ်ပလံၚ်ဗစိုပ်တံ ဝါတ်ဂါတ်ကၠုၚ်ကီု၊ ဟိုတ်နူပဋိပက္ခရပ်လွဟ် က္တဵုဒှ်ဒၟံၚ် အလုံဍုၚ်မွဲတံဂှ်တုဲ ၚုဟ်ဗၞိက်ဖျာဂမၠိုၚ် သၠုၚ်တိုန်ကၠုၚ်ဒၟံၚ် အိုတ်ဍာ်ရ။
ၚုဟ်ဗၞိက်ဖျာဂမၠိုၚ် သၠုၚ်တိုန်ကၠုၚ်ဒၟံၚ် ဂၠိုၚ်ကဵုဆသာ်ဏံဂှ်ရ ညးဍုၚ်ကွာန်ဂမၠိုၚ်ဝွံ သြန်လုပ်ကဵုသြန်တိတ် ဟွံသၟဟ်တးရတုဲ သွက်ပရေၚ်စသုၚ်မံၚ်စံၚ်ဂှ် သာတုဲကြေပ်ဂြတ်ကၠုၚ်ရ။
“ၚုဟ်ဗၞိက်ဖျာဂှ်တှ်ေ တိုန်ကၠုၚ်ကွေံကွေံ။ တိုန်ကၠုၚ်ဟွံသာပုဟ်။ ၚုဟ်ဗၞိက်ဖျာတိုန်ဟီုဂှ် ကၠေၚ်ဓာတ်တံလေဝ် ၚုဟ်တိုန်။ တိုန်ဒၟံၚ်သီုဖအိုတ်ရ။ လၟုဟ် ပ္ဍဲကဵုဆေၚ်ဍာ်လက်ဖက်တံဂှ် ဍာ်လက်ဖက်မွဲခေါ် ဒှ်ဒၟံၚ် ၁၅၀၀ ဒ္ကေဝ်ယျ။ စနူကဵုဍာ်လက်ဖက်တံရဏောၚ်။ တိုန်ဒၟံၚ်ဖအိုတ်” သာ်ဝွံ ညးဍုၚ်ကွာန်ဒေသမွဲတၠ ဟီုရ။
သ္အာၚ်နူဂှ်ပၠန် ဟိုတ်နူၚုဟ်ဗၞိက်သၠုၚ်တိုန်ကၠုၚ်ဒၟံၚ် အဆက်က်တုဲ ညးဍုၚ်ကွာန်သ္ဇိုၚ်ဂမၠိုၚ်ဝွံ ပုၚ်ဗ္ဂါပ်ဂွံမှာန်ရဂှ် ဒးဂၠါဲစသုၚ်ဒၟံၚ် တၟာလှ်ေတုဲ ညးဒိုက်ဝါတ်တံဂှ်တှ်ေ ဒးဂဗကၠုၚ်ဒၟံၚ် အကာဲအရာ ဒးပံၚ်စဒၟံၚ် ပုၚ်ဗ္ဂါပ်ဂယးကဵု ဗ္ဂါပ်သဝ်တ္ၚဲရ။
မွဲလ္ပာ်ဂှ်ပၠန် ၚုဟ်ဗၞိက်ဖျာတံ တိုန်ကၠုၚ် ဂၠိုၚ်ကဵုဆကီုလေဝ် သြန်ဂိတုတံဂှ် ဟွံတိုန်ကၠုၚ်တုဲ စနူကဵုကပေါတ်ဗၞိက်စၞစသုၚ်တံဂှ် ဂွံက္ဍစိုပ်ဂှ် ခက်ခုဲကၠုၚ်ရ။
ကံၚ်ဇြဳပၞာန်ဂှ် သွက်ဗၞိက်ဖျာဂွံစှ်ေဂးတုဲ ဗက်ရပ်ဒၟံၚ် တၠကမၠောန်ထဝ်တံ၊ တၠကမၠောန်လှာဲလှုဲဍုၚ်သ္အာၚ်တံ၊ သၟာဗၞိက်သ္ၚုတံကဵု ညးတာလျိုၚ်နူကဵုသေန်တာရာန်ဖျာတံဂှ်ကီုလေဝ် ၚုဟ်ဗၞိက်ဖျာဂှ် ထပ်သၠုၚ်တိုန်ဒၟံၚ်ဖိုဟ်ရ။
တိုက်သြန်ဂၠးတိဂှ်တှ်ေ အပ္ဍဲကာလသီအဝဵုဏံ ပရေၚ်ပိုန်ဒြပ်ဍုၚ်ဗၟာ တောတက်ဂှ် ဒေါအ်ဒေၚ်ကၠုၚ်တုဲ ပရေၚ်ကျာတ်ဝါတ်တံ ပရေံစှ်ေကၠုၚ်တုဲ ဒမြိပ်သြန်ဖောဝ်ကဵု ကမၠောန်ကၟိတ်ဟွံမွဲတံ သ္ဂောံသၠုၚ်တိုန် နွံဒၟံၚ်တုဲ အကာဲအရာကျာတ်ဝါတ်ဂှ်ဝွံ အလုံဍုၚ်ဗမာမွဲ ပရေံဒၟံၚ်ဏီဏောၚ်ဂှ် ပ္ဍဲဂိတုဂျောန် ၁၂ တေံ လလောၚ်ပ္တိတ်လဝ်ရ။
သ္အာၚ်နူဂှ်ပၠန် ပ္ဍဲသၞာံ ၂၀၂၄ စတေံ လၟိဟ်မၞိဟ်ကၟိန်ဍုၚ် ၃၂ တၟံကၠံဂှ် စိုပ်ကၠုၚ်ဒၟံၚ်အကာဲအရာ ကျာတ်ဝါတ်တံတုဲ ကလေၚ်စိုပ်အာ အကာဲအရာဂွံညာတ်ကၠုၚ်လဝ် သၞာံ ၂၀၁၅ လောန်ကၠုၚ်တေံဂှ် ပါလုပ်ပ္ဍဲလိက်ဒုၚ်စဳရေၚ် တိုက်သြန်ဂၠးတိရ။
ပရိုၚ်−သြၚ်လောန်တိုၚ်(မ်)
ဗီု−CJ