နေဗျဳဒဝ်၊ အဝ်ဂါတ် ၂၃
ကိုန်စဳမာန်ကြုက် နွံအပ္ဍဲဍုၚ်တံကဵု ဂီုကၠီုဗၠးဘဲ ညးယိုက်ဝန်တံဂှ် နကဵုဍုၚ်ဗၟာ စဵုဒၞါထိၚ်ဒဝ်ကဵုအာ ဗွဲမသၟဟ်အစောံဏောၚ် က္ဍိုပ်သ္ကိုပ်ပၞာန် ဟီုကဵု အမာတ်ကလုတ်ကြုက် မေဿ မာကျာရ။
ပ္ဍဲဂိတုအဝ်ဂါတ် ၂၁ တေံ အခိၚ်အမာတ်ကလုတ်ကြုက် စပ်ကဵုဍုၚ်ဗမာ မေဿမာကျာ ပအပ်လိက်ခါန်ကၞက်ညး ဇရေၚ်သ္ကိုပ်ပၞာန်ဇၞော် မေန်အံၚ်လှာၚ်ဂှ် က္ဍိုပ်သ္ကိုပ်ပၞာန် ဟီုလဝ်ရ။
အတိုၚ်တၚ်လလောၚ်တြး ရုၚ်ကလုတ်ကြုက် စပ်ကဵုဍုၚ်ဗၟာဂှ်မ္ဂး က္ဍိုပ်သ္ကိုပ်ပၞာန် စဵုဒၞါမၚ်မွဲကဵုအာ ပရေၚ်ၜိုဟ်သြိုၚ်ညိၚ်ဝတ် ဒေသပယျဵု ကြုက်−ဗၟာ နတဲစှ်ေစှ်ေဏောၚ်ဂှ် သ္ဂးရ။
ဟိုတ်ဂှ်ရ ကိစ္စလဵုဟွံဟီု မသ္ကဵုဇီုကပိုက်တဴ ဒတုဲဖဵု၊ ဂီုကၠီုဍုၚ်ကြုက်တံဂှ် ကဵုအာအခေါၚ်ဟွံသေၚ်ပုဟ်ဂှ် ဟီုလဝ်ရ။
ဆ္ဂး ပ္ဍဲကဵုကိုန်စဳမာန်ဓလိုက်တမ်ရိုဟ် ကြုက် နွံပ္ဍဲဍုၚ်ဗၟာဂမၠိုၚ် ကိုန်စဳမာန် နူကဵုအပ္ဍဲဒေသပေါဲဗ္တိုက်က္တဵုဒှ်တံကဵု ဒေသဆက်စပ်တံဂှ်တှ်ေ ဒးဒုၚ်ထိၚ်ဒဝ်လဝ် ပ္ဍဲတဲဂကောံပၠန်ဂတးတံရ။
အတိုၚ်တၚ်နၚ် ISP-Myanmar ဂှ်မ္ဂး ရးသေံသ္ကုတ်သၟဝ်ကျာကီု ပ္ဍဲကဵုဒေသသ္ကုတ်လဒေါဝ်ဍုၚ်ဗၟာ မဆက်စပ်ဂမၠိုၚ်တံဂှ် ပရေၚ်ဓလိုက်တမ်ရိုဟ်ကြုက် နွံဒၟံၚ် ၁၉ ဂှ် ၁၀ ဂှ် EAOs တံကဵု PDF တံ ထိၚ်ဒက်လဝ်ပေၚ်ၚ်ရ။
အပ္ဍဲကဵုရးသေံသ္ကုတ်သၟဝ်ကျာဂှ် ပၠံၚ်သၟုဟ်ဓာတ်သဘာဝ ကေုာံ ကၠေၚ်ဍေန် ကြုက်−ဗၟာ၊ လာၚ်ဇြဟတ်ဓာတ် တတ်ကၠောံပယျဵု ကေုာံ ဂၠံၚ်စၚ်ကြံတၟိ ပရေၚ်သွံရာန်ဗၞိက် ဂၠံၚ်ကုန်−ဂၠံၚ်ဍာ် ကဆံၚ်ဂၠးတိတံသၟးဟွံက ဂၠံၚ်သွံရာန်ဗၞိက် ကေုာံ ဂၠံၚ်ကွဳပၟတ် မူဇြေဝ်−မာန္တလေဝ်တံဂှ်လေဝ် EAOs တံ ထိၚ်ဒက်လဝ်ရ။
ပ္ဍဲကဵုတွဵုရးရခေၚ်ဂှ်လေဝ် ပ္ဍဲကဵုကိုန်စဳမာန်ဓလိုက်တမ်ရိုဟ်ကြုက် နွံ ၁၁ ဂှ် ၉ ဂှ်တှ်ေ ဒပ်ပၞာန်ရခေၚ် AA ထိၚ်ဒက်လဝ် မွဲဒကုတ်မွဲဒကဴရောၚ် တၚ်နၚ် ISP-Myanmar ထ္မံက်ထ္ၜးလဝ်ရ။
ပ္ဍဲကဵုဏံ သၞေဟ်က္ၜၚ်ဒမျိုဟ်ကျံက်ဖျူကဵု ကိုန်စဳမာန်ဒေသအပိုၚ်အခြာပရေၚ်ပိုန်ဒြပ်တၟေၚ်၊ ဂၠံၚ်ကွဳပၟတ် မာန္တလေဝ်−ကျံက်ဖျူ၊ ပၠံၚ်သၟုဟ်ဓာတ်သဘာဝ ကေုာံ ကၠေၚ်ဍေန်တံ မပါလုပ် ဂၠံၚ်သွံရာန်ဗၞိက်တံလေဝ် ပါလုပ်ဂှ် သ္ဂးရ။
ဗ္ဒိုပ်သွံရာန်ဗၞိက်မလုပ်သၞောဝ် နွံပယျဵုဗၟာ−ကြုက်ဂှ်ကဵု သၞေဟ် ၈ သၞေဟ်ဂှ် ၆ ဂှ်တှ်ေ ဂကောံရပ်လွဟ်ကောန်ဍုၚ်အရၚ် EAOs တံ ထိၚ်ဒက်လဝ်ရောၚ် ISP-Myanmar လလောၚ်ပ္တိတ်လဝ် ပ္ဍဲဂိတုအဝ်ဂါတ် ၁၉ တေံရ။
ပရိုၚ်−သြၚ်လောန်တိုၚ်(မ်)
ဗီု−MOI/Social Media