မတ်မလီု၊ အဝ်ဂါတ် ၂၄
ကောန်ဒပ်ဗၠာဲသၟိၚ် သၟဝ်တဲကံၚ်ဇြဳပၞာန် နူအပ္ဍဲတွဵုရးဍုၚ်မန်တံဝွံ ညံၚ်ဟွံဒးဆုဲပြံၚ် ဒေသတၞဟ်ဟ်တံဂှ် ထ္ပက်ဒၟံၚ်လာပ် ဇရေၚ်ဒပ်ကံၚ်ဇြဳပၞာန်ကဵု ဇၞော်သ္ကိုပ်ကောန်ဒပ်ဗၠာဲသၟိၚ်တံ ဇၞော်ကဵုဇြဟတ်ဂှ် ဂွံတီကေတ် ဇရေၚ်ညးမစုက်လုက်ကဵု ကောန်ဒပ်ဗၠာဲသၟိၚ်တံရ။
ဒၞါဲကောန်ဒပ် မချိုတ်အာလဝ် ပ္ဍဲဒေသပေါဲဗ္တိုက်က္တဵုဒှ်တံဂှ် ဟိုတ်နူကံၚ်ဇြဳပၞာန် ကဵုတာလျိုၚ်ပြံၚ်ဒၟံၚ်ဒၞါဲ ကုကောန်ဒပ်ဗၠာဲသၟိၚ် သၟဝ်တဲဂမၠိုၚ်ဂှ်ရ ညံၚ်ဟွံဂွံဒးဆုဲပြံၚ်ဒၞါဲဂှ် ထ္ပက်ဒၟံၚ်လာပ်တံ နွံဒၟံၚ်ရ။
သ္အာၚ်နူဂှ်ပၠန် ကောန်ဒပ်ဗၠာဲသၟိၚ် ဒးဒုၚ်ဆုဲပြံၚ် နူအပ္ဍဲတွဵုရးဂမၠိုၚ်ဝွံ ပ္ဍဲကဵုပေါဲဗ္တိုက် ဒေသရးသေံသ္ကုတ်သၟဝ်ကျာ၊ ရခေၚ်၊ ကချေၚ် ကေုာံ ပ္ဍဲကဵုဒေသအညာတံဂှ် ချိုတ်ဂၠိုၚ်ဒၟံၚ်တုဲ ဇွရဂှ် ဟွံကလေၚ်ဂွံ ဒှ်ဒၟံၚ်အကာဲအရာသာ်ဏံဂှ်ရ အကြာကောန်ဒပ်ဗၠာဲသၟိၚ်တံဂှ် ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်ရောၚ် ဂွံတီကေတ်ရ။
ညံၚ်ဟွံဂွံဒးဆုဲပြံၚ် ပ္ဍဲအရာထ္ပက်လာပ်ဗဇဴဂှ် မ္ၚးနူကဵုသြန်လှုဲတံဂှ် ဒးကဵုဒၟံၚ် သီုကဵုကပေါတ်အရပ်စပ် မၞုံကဵုၚုဟ်မတံဂှ်တုဲ သမ္ဘာဗၠာဲသၟိၚ်တံဂှ်လေဝ် ဒးကၠောန်ၜိုတ်ကဵုဒၟံၚ် ပ္ဍဲကဵုသ္ၚိဇၞော်သ္ကိုပ်ဂမၠိုၚ် ညံၚ်ရဴဍိက်သ္ကအ်ဂှ် ညးမစုက်လုက်ကဵု ကောန်ဒပ်ဗၠာဲသၟိၚ်တံ လဴထ္ၜးလဝ်ရ။
မွဲလ္ပာ်ဂှ်ပၠန် ကောန်ဒပ်ဗၠာဲသၟိၚ် ဟွံစုက်လုက်ကဵု ဇၞော်သ္ကိုပ်ဗၠာဲသၟိၚ်တံကဵု ဒပ်ကံၚ်ဇြဳပၞာန်တံဂှ်လေဝ် ယဝ်ရဒးဒုၚ်ဆုဲပြံၚ် ဇရေၚ်ဒေသပေါဲဗ္တိုက်က္တဵုဒှ်တံဂှ်မ္ဂး ဂြိပ်နူဗၠာဲသၟိၚ်တုဲ လုပ်စိုပ်စ္ၜုဲစ္ၜော် ဇရေၚ်ဒပ်ပၠန်ဂတးတံလေဝ် နွံဒၟံၚ်ဂှ် ဂွံတီကေတ်ရ။
ဥူအံၚ်ကျဳတုၚ် သ္ကိုပ်ဝန်ဇၞော် တွဵုရးဍုၚ်မန် ကံၚ်ဇြဳပၞာန်ခါန်ကၞက်ဂှ်တှ်ေ အပ္ဍဲတွဵုရး ညံၚ်ဗၠာဲသၟိၚ်ဂြိပ်တိတ်တံ ဟွံဂွံမွဲဂှ် အပ္ဍဲဂိတုနဝ်ဝေမ်ဗာ သၞာံတုဲကၠုၚ်တေံ ဗက်စန်ဒက်ဒၟံၚ် ပ္ဍဲဗ္ဒိုပ်ဗၠာဲသၟိၚ်တံတုဲ ကုကောန်ဒပ်ဗၠာဲသၟိၚ် ချိုတ်အာ အပ္ဍဲပေါဲဗ္တိုက်တံဂှ်လေဝ် ပ္တိုန်အာဂုဏ်စရာဲ သ္ပစၟတ်သမ္တီ ဗွဲမထေက်ကြိုက်ဏောၚ်ဂးတုဲ စန်ဒက်လဝ်ရ။
အတိုၚ်ဂလာန် ညးမစုက်လုက်ကဵု ကောန်ဒပ်ဗၠာဲသၟိၚ်တွဵုရးဍုၚ်မန်တံဂှ်မ္ဂး အပ္ဍဲကာလသီအဝဵုဏံ ကောန်ဒပ်ဗၠာဲသၟိၚ် နူအပ္ဍဲတွဵုရးတံ ဂြိပ်တိတ်လဝ် ဟွံအောန်နူကဵု ၃၀၀ တုဲ ဗွဲမဂၠိုၚ်ဝွံ ဒးဒုၚ်ပလံၚ် ပ္ဍဲဒေသပေါဲဗ္တိုက်သ္ကာတ်မြဟ်တံကီု၊ ဗ္ဒိုပ်ဗၠာဲသၟိၚ်တံ ဒးဒုၚ်ဗ္တိုက်မွဲဏှမွဲဏှကီု၊ ဒှ်ကောန်ဒပ်ဗၠာဲသၟိၚ် နူကဵုဗ္ဒိုပ်ဗၠာဲသၟိၚ်ဒေသ လ္ပာ်ကံၚ်ဇြဳပၞာန်တံ ဒးဆောံလေၚ်အာလဝ် ပရေၚ်ဂီုကၠီုတိဍာ်တံဂှ် ဂွံတီကေတ်ရ။
အပ္ဍဲကာလသီအဝဵုဏံ တွဵုရးဍုၚ်မန် ပ္ဍဲကဵုပွိုၚ်ဍုၚ်ကျာ်ထဝ်၊ ၜဳကလေၚ်၊ သဓီု၊ ရေဝ်၊ ဇြပ်ဗု ကေုာံ ပွိုၚ်ဍုၚ်ကျာ်မြဟ်တံဂှ် ဒးဗလးလဝ်တဲ ဗ္ဒိုပ်ဗၠာဲသၟိၚ်တိဍာ်ကံၚ်ဇြဳပၞာန်ကဵု ဗ္ဒိုပ်ကၚ်ဗၠာဲသၟိၚ် ဗ္ဒါဲ ၁၀ တုဲ ဂကောံဇြဟတ် အာပံၚ်လဝ် ဇရေၚ်ဗ္ဒိုပ်ဗၠာဲသၟိၚ်လ္တူဍုၚ်တံ နွံဒၟံၚ်ရ။
အတိုၚ်တၚ်နၚ် အလဵုအသဳညဳသၟဟ်ဂကူ NUG ဂှ်မ္ဂး အပ္ဍဲကာလသီအဝဵုဏံ ကောန်ဒပ်ဗၠာဲသၟိၚ် ၁၀၀၀၀ ပြၚ် ပါလုပ်လဝ် ပ္ဍဲပရေၚ်ချဳဒရာၚ် ဒစဵုဒစးအဝဵု နနဲဟွံပကီုပရာပ် CDM ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ