လံၚ်လုၚ်၊ အဝ်ဂါတ် ၂၄
အပ္ဍဲပရေၚ်ပန်ပှော်ၜါလ္ပာ် မက္တဵုဒှ်လဝ် ပ္ဍဲကွာန်ကျံက်နဳမဝ် ပွိုၚ်ဍုၚ်လံၚ်လုၚ် ရးတၞၚ်သဳဂှ် ကောန်ဂကောံပျူသဝ်ထဳ ညးဗြဴမွဲတၠ ချိုတ်အာလဝ်ရောၚ် ဂွံတီကေတ် ဇရေၚ်ဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ်ရ။
ဂိတုအဝ်ဂါတ် ၂၂ အခိၚ်နူဂယး ၜိုတ် ၁၀ နာဍဳဂှ် ကောန်ဒပ်စဵုဒၞါညးဍုၚ်ကွာန်တံ ဂွံကၠာတဲ လုပ်စိုပ်ဍိုက်ဗ္တိုက်လဝ် ဒၞါဲကောန်ဒပ်ပျူသဝ်ထဳတံကောံ ကွာန်ကျံက်နဳမဝ်ဂှ်ရ။
အပ္ဍဲပရေၚ်ဗ္တိုက်ဏံဂှ် ကောန်ဒပ်ပျူသဝ်ထဳသီုဖအိုတ် ဂြိပ်တိတ်ဗၠးအာလဝ်ရောၚ် ညးဒုၚ်တာလျိုၚ် လလောၚ်ပရိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကြဴနူဂှ်တုဲ နဒဒှ်ပွန်ဒုတိယ အခိၚ်လုပ်စိုပ်ဍိုက်ဗ္တိုက် သ္ၚိဒၟံၚ်က္ဍိုပ်သ္ကိုပ်ပျူသဝ်ထဳ ဥူကျဳဖျူဂှ် ဥူကျဳဖျူဝွံ ကလေၚ်တဝ်စၞေဟ်ကဵု လွဟ်လက်နက်ဍောတ်တုဲ အပ္ဍဲပရေၚ်ဗ္တိုက် ဂြိပ်တိတ်ဗၠးၜးအာဂှ် ညးမဒှ်သမ္ဘာ ကောန်ဂကောံပျူသဝ်ထဳ ဒဝ်အေန်ယှိုဲ ချိုတ်အာလဝ်ရ။
ကြဴနူပရေၚ်ဗ္တိုက်ဂှ်တုဲ သ္ၚိဒၟံၚ်ဥူကျဳဖျူ က္ဍိုပ်သ္ကိုပ်ဂကောံပျူသဝ်ထဳဂှ် ဒပ်ပံၚ်ကောံပၠန်ဂတးတံ စံၚ်ဏာလဝ်ဂှ် ဂွံတီကေတ် အတိုၚ်ဂလာန် ညးဒေသတံရ။
အပ္ဍဲပရေၚ်ပန်ပှော်ၜါလ္ပာ်ဂှ် နူကဵုကုန်ဗ္ဒိုပ်တာဝါတိုၚ် ဒပ်ကံၚ်ဇြဳပၞာန်ဂှ် ဘိုၚ်ပန်ပှော်လဝ် လွဟ်ဇၞော် ဟွံအောန်နူကဵု ၄ မကီုလေဝ် လ္ပာ်ဒပ်ပံၚ်ကောံစဵုဒၞါညးဍုၚ်ကွာန်တံ ဇီုကပိုက်ဒးဟွံမွဲမွဲသာ် ဆုတ်ကလေၚ်အာလဝ်ရောၚ် သ္ဂးရ။
အခိၚ်လၟုဟ် ဒပ်ကံၚ်ဇြဳပၞာန်ဝွံ သၠုၚ်ပ္တိုန်လဝ် ပရေၚ်ဂီုကၠီု ကွာန်ကျံက်နဳမဝ် နဗ္ၜတ်အလုံကွာန်မွဲတုဲ ပ္ဍဲဗလးၜဳဂှ် က္ၜၚ်ပၞာန်ဒပ်ဍာ် ဂေတ်ဒၟံၚ်ကၚ်ရောၚ် ဂွံတီကေတ် အတိုၚ်ဂလာန် ဂကောံဇြဟတ်ပၠန်ဂတးတံရောၚ်။
ပရေၚ်ဗ္တိုက်ဏံဂှ် နူကဵုဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ်ဂှ် ဒပ်လော်လေဝ် ၊ ဒပ်သ္ပဝ် ကေုာံ ဒပ်ဒမၠုက်အယဴတံ ပံၚ်တောဲရေၚ်တၠုၚ်လဝ်ရ။
တုဲကၠုၚ် ပ္ဍဲဂိတုဂျူလာၚ် ၂၆ တေံဂှ်လေဝ် နူကဵုကုန်ဗ္ဒိုပ်တာဝါတိုၚ် ကွာန်ကျံက်နဳမဝ်ဂှ် ကောန်ဒပ်ကံၚ်ဇြဳပၞာန် စှ်ေကၠုၚ်ရာန်ဖျာၜါတၠ ဒးဒုၚ်ပန်တုဲ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−LLPDF