လှာဒကှ်၊ အဝ်ဂါတ် ၂၄
ဗ္ဒိုပ်ဗျူဟာအနာန်ကွေန် လ္တူဂၠံၚ်ကျာ်ပိ−ဇြပ်ဗု ပွိုၚ်ဍုၚ်လှာဒကှ် တွဵုရးကရေၚ် ညံၚ်ဟွံဂွံစှ်ေအာဂှ် လ္ပာ်ကံၚ်ဇြဳပၞာန် ဗ္တိုက်ဒၟံၚ်ကဵုပၞာန်ကျာ ကေုာံ ကဵုလွဟ်ဇၞော်တံ ဗွဲမသ္ကာတ်မြဟ်ရောၚ် တမ်ရိုဟ်အပ္ဍဲဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်ဗျူဟာအနာန်ကွေန်ဂှ် ဒပ်ပံၚ်ကောံပၠန်ဂတး ဒပ်ပၞာန်ဗၠးၜးကောန်ဂကူကရေၚ် KNLA တံ စနူဂိတုအဝ်ဂါတ် သတ္တာဟဒုတိယတုဲ ကၠောန်လဝ်ပရေၚ်ဗ္တိုက်ကၟာတ်လဒဵုတံဂှ်တုဲ ပေါဲဗ္တိုက်ပရေၚ်ပၞာန်ၜါလ္ပာ် သ္ကာတ်မြဟ်လဝ်ရ။
တုဲကၠုၚ်ပ္ဍဲဂိတုမေတေံ ဒပ်ပံၚ်ကောံပၠန်ဂတး KNLA တံ ဗ္တိုက်သီဂွံလဝ် ဗ္ဒိုပ်မုဟ်ဒဵု ဒပ်ကံၚ်ဇြဳပၞာန် နွံလ္တူဂၠံၚ်ကျာ်ပိ−ဇြပ်ဗုဂှ်တုဲ ဗ္ဒိုပ်ဗျူဟာအနာန်ကွေန် သ္ၚောဲဒၟံၚ်ကဵု ဗ္ဒိုပ်မုဟ်ဒဵု မိုၚ်ဟွံဂၠိုၚ်ဂှ် ဒပ်ပံၚ်ကောံပၠန်ဂတးတံ ဂွံသီမာန် ဆက်ကၠောန်သ္ပဒၟံၚ် ပရေၚ်ဗ္တိုက်တံရ။
အပ္ဍဲပေါဲဗ္တိုက်ဒေသအနာန်ကွေန်ဂှ် ညံၚ်ဗ္ဒိုပ်ဗျူဟာဟွံဂွံစှ်ေအာ ဒပ်ကံၚ်ဇြဳပၞာန် ကၠုၚ်စိုပ်ပန်ပှော်ကဵု က္ၜၚ်ကျာတံ ဂၠိုၚ်ၚ်ကဵုဝါသၟးဟွံက နူကဵုတမ်ဒပ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ဇြပ်ဗု တွဵုရးဍုၚ်မန်ဂှ်လေဝ် အရိုဟ်ဒဒှ်တ္ၚဲ ကၠောန်သ္ပဒၟံၚ် ပရေၚ်ပန်ပှော် ကဵုလွဟ်ဇၞော်တံရ။
ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် ကေုာံ ဗ္တိုက်ကဵုပၞာန်ကျာတံဂှ်တုဲ သ္ၚိဒၟံၚ်ညးဒေသ ဗွဲမဂၠိုၚ်ဂၠေၚ် ဒးဆောံလေၚ်အာလဝ်တုဲ သီုကွာန်အနာန်ကွေန် မပါလုပ် ညးဍုၚ်ကွာန်ဒေသ နူကဵုကွာန်ပိကွာန်ဟွံအောန်ဂှ် ဒးဂြိပ်ဒဴပါဲဒလေတ်ဒၟံၚ်ရောၚ် ညးဒေသဂမၠိုၚ် သ္ဂးအိုတ်ရ။
ပ္ဍဲကဵုဒေသအနာန်ကွေန်၊ အခၠဵုတဂေါန်ဒေၚ်၊ တၟအ်ဗြဴတံဂှ် ဒပ်ကံၚ်ဇြဳပၞာန် ပန်ပှော်ဒၟံၚ်ကဵု လွဟ်ဇၞော်တံ အရိုဟ်ဒဒှ်တ္ၚဲတုဲ ဟိုတ်နူကၠုၚ်စိုပ်ထံၚ်ပရိုၚ် နကဵုက္ၜၚ်ကျာတံလေဝ် နွံဒၟံၚ်ဂှ်ရ ပ္ဍဲကဵုကွာန်ဘာဗြ ကြပ်ကဵုကွာန်အနာန်ကွေန်ဂှ် ဘာဗ္တောန်လိက်တံ ဒးကၟာတ်လဝ်တုဲ ပ္ဍဲကဵုကွာန်လ္ၚဵုတံဂှ်လေဝ် သွက်ဂွံကၟာတ်ဘာဗ္တောန်လိက်တံဂှ် ပလေဝ်ပလေတ်ဒၟံၚ်ရောၚ် ညးဒေသတံ ဟီုရ။
ဟိုတ်နူအကာဲအရာပရေၚ်ပၞာန် အပ္ဍဲဒေသတံဂှ်တုဲ သ္ကုတ်ဂၠံၚ်အခၠဵုတဂေါန်ဒေၚ်−တၟအ်ဗြဴ−ဆုကၠ−မုဟ်ဍုၚ်၊ သ္ကုတ်ဂၠံၚ် အခၠဵုတဂေါန်ဒေၚ်−ပုလုၚ်−အၜေတ်−မုဟ်ဍုၚ်တံဂှ် ပရေၚ်အာကၠုၚ် သာခက်ခုဲကၠုၚ်ဒၟံၚ်တုဲ ခရိတ်အာတရဴတံ သာတုဲၚုဟ်က္ဍၚ်ကၠုၚ်ဒၟံၚ်ဂှ်လေဝ် ဂွံတီကေတ် ဇရေၚ်ညးဒေသတံရ။
ဗ္ဒိုပ်ဗျူဟာအနာန်ကွေန် ကံၚ်ဇြဳပၞာန်ဂှ်ဝွံ နွံဒၟံၚ် ပ္ဍဲပွိုၚ်ဍုၚ်ဝေန်ယျေ ဒပ်မဟာ ၆ ဗော်သွးကောန်ဂကူကရေၚ် KNU တုဲ ဇြဟတ်ဒပ် ဟွံအောန်နူကဵု ၄၀ ဖျေံဒပ်မံၚ်စံၚ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−KPSN