နေဗျဳဒဝ်၊ အဝ်ဂါတ် ၂၄
သွက်ဂွံပလေဝ်သၞောဝ်သ္ဇိုၚ်ဒက်ပ္တန်ဍုၚ်ကီု သွက်ကိစ္စပရေၚ်ကၠောန်ဗဒှ်ပေါဲရုဲမာဲတံဂှ်တုဲ ကံၚ်ဇြဳပၞာန် ကဵု ဂကောံဗော်ပရေၚ်ဍုၚ်ကွာန်တံ သဳကၠဳလဝ်ရောၚ် နူကဵုပလက်ဝှမ်တြးဝါဒ ဒပ်ပၞာန်ထိၚ်ဒက်လဝ်တံ လလောၚ်ပ္တိတ်ကၠုၚ်ပရိုၚ်ရ။
ပ္ဍဲဂိတုအဝ်ဂါတ် ၂၁ ကဵု ၂၂ ဂှ် ကမ္မတဳပ္ညဳပ္ညပ်ပရေၚ်ၜိုဟ်လလမ် ကံၚ်ဇြဳပၞာန် NSPNC ကေုာံ ဂကောံဗော်ပရေၚ်ဍုၚ်ကွာန်ဂမၠိုၚ် ဆဵုဂဗသဳကၠဳလဝ် ပ္ဍဲနေဗျဳဒဝ် အလန်ဒုတိယရ။
ပ္ဍဲပရေၚ်ဆဵုဂဗဏံဂှ် ဥက္ကဌ NSPNC ဒုသ္ကိုပ်ဗိုလ်ဇၞော် ထောန်ထောန်နံၚ်ကဵု ကမ္မတဳဂမၠိုၚ်၊ က္ဍိုပ်သ္ကိုပ်ဂကောံဗော်ပရေၚ်ဍုၚ်ကွာန်ဂမၠိုၚ် ဥက္ကဌဗော်သ္ကိုပ်သ္ကရခေၚ် ဒံက်တာအေမံၚ် ကေုာံ ညးစၞးဂကောံကမၠောန်တံ တိုန်စိုပ်လဝ်အိုတ်ရ။
ပ္ဍဲကဵုပရေၚ်သဳကၠဳတ္ၚဲပထမဂှ် စပ်ကဵုတၚ်နၚ် ဒးပလေဝ်ထပ်ဗပေၚ် ပ္ဍဲသၞောဝ်သ္ဇိုၚ်ဒက်ပ္တန်ဍုၚ်ဂှ်တုဲ အခိၚ်ဆဵုဂဗလဝ်အလန်ပထမတေံ တၚ်နၚ်သှ်ေဒၟံၚ်သွက်ဂွံဆက်သဳကၠဳတံဂှ်ကဵု ဂလာန်ပ္တိုန်နၚ်နူကဵုၜါလ္ပာ်တံဂှ် သဳကၠဳလဝ်ညးသ္ကအ်ရ။
ပ္ဍဲတ္ၚဲဒုတိယဂှ် သဳကၠဳလဝ် သီုကဵုပရေၚ်ကၠောန်ဗဒှ်ပေါဲရုဲမာဲ ကေုာံ တၚ်နၚ်ဗပေၚ် သ္ဂောံပလေဝ်သၞောဝ်သ္ဇိုၚ်ဒက်ပ္တန် မဟွံတုဲဒှ်ဏီတံဂှ်ကီု သီုကဵုအကာဲအရာပရေၚ်ဍုၚ်ကွာန်လၟုဟ်ကဵု စပ်ကဵုပရေၚ်ဂီုကၠီုတံဂှ်ရောၚ် ကံၚ်ဇြဳပၞာန် သ္ဂးရ။
ဆ္ဂး စပ်ကဵုပရေၚ်ဗပေၚ်ပလေဝ်သၞောဝ်သ္ဇိုၚ်ဒက်ပ္တန်ဂှ်တုဲ သဳကၠဳလဝ် ပရူပရာလဵု ၝောံပိုဒ်လဵုရောဟီုဂှ် လ္ပာ်ကံၚ်ဇြဳပၞာန် ဒဵုကဵုအခိၚ်လၟုဟ် လလောၚ်ပ္တိတ်လဝ် ဗွဲလစှ်ေ ဂှ် ဟွံမွဲရ။
လအာတုပ်သာ်ဂှ်ကီု သွက်ဂွံကၠောန်ဗဒှ်ပေါဲရုဲမာဲကီု စပ်ကဵုပရေၚ်ဂီုကၠီုတံဂှ်တုဲလေဝ် ကၠောန်အာသာ်လဵုရောဟီုဂှ် ကံၚ်ဇြဳပၞာန် လလောၚ်ပ္တိတ်လဝ် ဗွဲလစှ်ေ ဟွံမွဲရ။
နကဵုသြၚ်လောန်တိုၚ်(မ်) စပ်ကဵုပရေၚ်သဳကၠဳၜါလ္ပာ်တုဲ ဆက်လဝ်ဖုၚ် ဇရေၚ်က္ဍိုပ်သ္ကိုပ်ဂကောံဗော်ပရေၚ်ဍုၚ်ကွာန်ဂမၠိုၚ် ဒံက်တာအေမံၚ် ၄ ဝါဟွံကကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် သၞာံ ၂၀၂၅ ဏံ ကၠောန်ဗဒှ်အာပေါဲရုဲမာဲဏောၚ် ပ္ဍဲဂိတုဂျောန် ၁၅ တေံ ဟီုပ္တိတ်လဝ်တုဲ ကမ္မတဳပ္ညဳပ္ညပ်ပရေၚ်ၜိုဟ်လလမ် ကံၚ်ဇြဳပၞာန် ကေုာံ ဂကောံဗော်သွးဂမၠိုၚ် ဆဵုဂဗလဝ်ညးသ္ကအ် စဵုကဵုၜါဝါရ။
မွဲလ္ပာ်ဂှ်ပၠန် နကဵုကံၚ်ဇြဳပၞာန် ပ္ဍဲကဵုပၞာန်ထ္ပက် အလုံဍုၚ်မွဲဂှ် ဒးဗလးလဝ် ဍုၚ်ဒၞါဲဗ္ဒိုပ်ဒပ်နွံတံ ၇၀ ပြၚ်တုဲ ဒဵုကဵုအခိၚ်လၟုဟ် ပ္ဍဲကၟိန်ဍုၚ် သ္ကုတ်သၟဝ်ကျာတံကဵု သ္ကုတ်ပလိုတ်တံဂှ် ဒးဆေၚ်ဒၟံၚ်မုက် မုက်ပၞာန်ဗွဲမဂၠိုၚ်ရ။
ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ် သၞာံဏံကြပ်အိုတ်မ္ဂး ဘပဠစဵုကဵုနေဗျဳဒဝ်ဂွံ အကာဲအရာသာ်ဏံဂှ် ဂွံကၠောန်ဗဒှ်ပေါဲရုဲမာဲ လှဲလှဲလးလးဂှ် ရေၚ်တၠုၚ်ဟွံမာန်ပုဟ်ဂှ် သ္ၚဳဂၠိပ်လဝ်ရ။
“သၞာံ ၂၀၂၄ ကြပ်အိုတ်တှ်ေ ဘပဠစဵုကဵုနေဗျဳဒဝ်ဂွံ အကာဲအရာဒှ်ဒၟံၚ်သာ်ဏံဂှ် ပေါဲရုဲမာဲဝွံ ကုဂကောံဇြဟတ်ပရေၚ်ဍုၚ်ကွာန် မစှ်ေကဵုဒဳမဝ်ကရေဇြဳ ဗၠးၜးတံဂှ်ကဵု ဒဳမဝ်ကရေဇြဳ ဗွဲမလှဲလး ဂွံပါလုပ်ရေၚ်တၠုၚ်ဂှ် ဒှ်ဟွံမာန်ပုဟ်။ ဟိုတ်ဂှ်ရ ပေါဲရုဲမာဲဏံဂှ် ဍုၚ်သ္အာၚ်ဂမၠိုၚ် သ္ဇက်ဂွံသ္ပကၠုၚ်စၟတ်သမ္တီဂှ် ဟွံမွဲပုဟ်။ ဆ္ဂး ကံၚ်ဇြဳပၞာန်ဂှ်တှ်ေ အတိုၚ်အစဳဇန်ညးတြေံဂှ် သွက်ဂွံကၠောန်ဂှ် စဳဇန်ဒၟံၚ်ရ” သာ်ဝွံ သ္ဂးရ။
ဆ္ဂး ဍုၚ်ကြုက် ဍုၚ်ဇိုၚ်ဝုတ်ဒိုဟ်ကီု သီုဍုၚ်အာဇြဳယာန် ဆက်စပ်ဒၟံၚ်လ္ၚဵုတံဂှ်တှ်ေ ပေါဲရုဲမာဲ ကံၚ်ဇြဳပၞာန် ကၠောန်ဗဒှ်ဂှ် သ္ပဒတန်အာတံ ဒှ်ကၠုၚ်မာန်ရောၚ် ညးထံက်ထ္ၜးလဝ်ရ။
ဂကောံဗော်ပရေၚ်ဍုၚ်ကွာန်ဂမၠိုၚ်ဂှ် ပ္ဍဲဂိတုမေတေံ ကလေၚ်ဒက်ပ္တန်လဝ် နကဵုညးစၞး ရုဲစှ်လဝ် နူကဵု ၁၆ ဗော် မဂွံလဝ်အခေါၚ်ပ္တိုန်စရၚ် ကဝ်မယှေန်ပေါဲရုဲမာဲ ကံၚ်ဇြဳပၞာန် မခါန်ကၞက်ပ္တန်လဝ် ကဵုလဝ်အခေါၚ်ဂှ်ရ။
ဂကောံဏံဂှ် က္ဍိုပ်သ္ကိုပ်ပန်တၠ နူကဵုဗော်ကျဖောအ် USDP ၊ ဗော်ညးဍုၚ်ကွာန် PP၊ ဗော်သ္ကိုပ်သ္ကရခေၚ် AFP ကေုာံ ဗော်ဒဳမဝ်ကရေတ်တေတ် သေံကောန်ဍုၚ်အရၚ်တံ က္ဍိုက်ပ်ညးမွဲမွဲအလန်ရ။
ပရိုၚ်−သြၚ်လောန်တိုၚ်(မ်)
ဗီု−MOI