ကအ်သံၚ်၊ အဝ်ဂါတ် ၂၅
ပ္ဍဲရးတၞၚ်သဳ လ္တူဍုၚ်ကအ်သံၚ်ကဵု ကွာန်ရးတံဂှ် ဒပ်ကံၚ်ဇြဳပၞာန် ကၟာတ်လဒဵုလဝ် အခေါၚ်သွံရာန်သ္ၚုတုဲ ဒးဂဗဒၟံၚ်ကဵု အကာဲအရာရာန်သ္ၚုဟွံဂွံတံရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုအဝ်ဂါတ် ၂၀ တုဲကၠုၚ်တေံတုဲ ပ္ဍဲကဵုဆေၚ်သ္ၚု လ္တူဍုၚ်ကအ်သံၚ်တံဂှ် ကံၚ်ဇြဳပၞာန် ကၟာတ်ထောံ အခေါၚ်သွံရာန်သ္ၚုတံဂှ်ရ ဆေၚ်သ္ၚုလ္ပာ်ကွာန်ရးတံဂှ်တှ်ေ ရာန်သ္ၚုဟွံဂွံရပုဟ်ဂှ် သ္ဂးရ။
ဟိုတ်နူကၟာတ်ထောံ အခေါၚ်သွံရာန်သ္ၚုတံဂှ်တုဲ ပ္ဍဲကဵုပွိုၚ်ဍုၚ်ကအ်သံၚ် နူကဵုကွာန် (ရွှေပြည်စိုး၊ ရှစ်မိုင်၊ ကံပုံကြီးနား ၊ ဆယ်မိုင်၊ ၁၄ မိုင်၊ ၁၂ မိုင်၊ တာညုံပါဒ၊ ၁၅ မိုင်၊ ဘန်းကချွန်၊ ၂၂ မိုင် ကေုာံ မလိဝမ်း) နူကဵုကွာန် ၁၁ ကွာန်ဂှ် ပ္ဍဲဆေၚ်သ္ၚုတံ သ္ၚုပိုတ်ဒၟံၚ်ရ။
ညးဒေသနူကဵုကွာန်ဇြေဝ်မိုၚ် ဟွံမိက်ထ္မံက်ယၟုမွဲတၠဂှ် ဂြောဝ်ဂတာလ္ၚဵု ဒးကၟာတ်လဝ် အခေါၚ်သွံရာန်သ္ၚုတံဂှ်ဝွံ ဂွံစပုၚ်ဂှ် ဒးဗက်ဂလေံဒၟံၚ် ပ္ဍဲကဵုသ္ၚိသ္ၚုနွံတံတုဲ ဒးစသုၚ်ဒၟံၚ်ရောၚ် ဟီုရ။
ကံၚ်ဇြဳပၞာန်ဂှ်တှ်ေ ကၟာတ်ထောံလဝ် အခေါၚ်သွံရာန်သ္ၚုဂှ်ဝွံ နကဵုတၚ်ထ္ၜးဟိုတ် ထံက်ပၚ်လဝ်သ္ၚု ဇရေၚ်ဒပ်စဵုဒၞါညးဍုၚ်ကွာန် PDF တံဂးတုဲ ဆေၚ်သ္ၚုတံဂှ် ဟွံကဵုသွံလဝ်သ္ၚုရောၚ် သ္ဂးရ။
မွဲလ္ပာ်ဂှ်ပၠန် ဆေၚ်သ္ၚုလ္ၚဵု လ္တူဍုၚ်တံဂှ်တှ်ေ သ္ၚုညိညဂှ် သွံကဵုဒၟံၚ် နကဵုဗ္ၜတ် မွဲသ္ၚိမူစိကဠတ် နကဵုသၞောတ်မၞိဟ်ပြဟ်ဂွံတံဂှ်တုဲ ဒပ်ကံၚ်ဇြဳပၞာန်ကဵု သေဌဳခရိုဝ်နဳတံ ပံၚ်တောဲကၠောန်လဝ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ပြဟ်ဟ်ဏံ ပ္ဍဲကအ်သံၚ် သ္ၚုသေံ လုပ်နူလ္ပာ်သေံတံ နွံကီုလေဝ် သ္ၚုမွဲရိုက်ဂှ် ဂွံဒၟံၚ်ၚုဟ် ၁၀၀၀ ၝာတ်ဂှ်ရ နကဵုညးဍုၚ်ကွာန်သ္ဇိုၚ်ဂမၠိုၚ် ရာန်ဟွံမာန်တုဲ ဒှ်ဒၟံၚ်ဒဒိုက်အိုတ်ရ။
ပ္ဍဲရးတၞၚ်သဳဂှ် ပ္ဍဲကဵုဍုၚ်ပဠဝ်ကဵု ဍုၚ်တၞၚ်သဳ လလောၚ်တြးလဝ် အုပ်ဓုပ်ပၞာန်တံဂှ်တှ်ေ ကံၚ်ဇြဳပၞာန် ကၟာတ်လဝ်အခေါၚ်ယိုက်ဏာနၚ်ဂဥုဲဇဗ ပါလုပ်သီုကဵုသ္ၚုတံဂှ်တုဲ အခါလၟုဟ် ပ္ဍဲပွိုၚ်ဍုၚ်ကအ်သံၚ်ဂှ်လေဝ် ကၟာတ်လဒဵုလဝ် အခေါၚ်သွံရာန်သ္ၚုတံရ။
ပရိုၚ်−သြၚ်လောန်တိုၚ်(မ်)
ဗီု−CJ