ကျာ်ထဝ်၊ အဝ်ဂါတ် ၂၅
တွဵုရးဍုၚ်မန် ပွိုၚ်ဍုၚ်ကျာ်ထဝ် အပ္ဍဲကွာန်ဝါဒက်ကွေန်ဂှ် ဟိုတ်နူမကမ်လွဟ်ဇၞော် ဒပ်ကံၚ်ဇြဳပၞာန် ပန်ပှော်ဏာလဝ် ဒတုံဗ္တိုဟ်ထ္ကးအာတုဲ ညးသၟတ်ဒေသမွဲတၠ ချိုတ်အာလဝ်ရောၚ် ဂွံတီကေတ် ဇရေၚ်ညးဒေသတံကဵု ဂကောံဇြဟတ်ပၠန်ဂတးတံရ။
ပ္ဍဲဂိတုအဝ်ဂါတ် ၂၄ အခိၚ်နူဂယး ၜိုတ် ၉ နာဍဳဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ အာစိုပ်ဗ္တိုက်ပန်ပှော်လဝ် တမ်ဒပ်ကံၚ်ဇြဳပၞာန် ဖျေံသ္ဇိုၚ်ကျာ်ထဝ် နကဵုလွဟ်ဇၞော်ဂမၠိုၚ်ရ။
ကြဴနူလၟေၚ်ဒဒှ်ဏံတုဲဂှ် ဒပ်ကံၚ်ဇြဳပၞာန်ဝွံ လ္ပာ်ကွာန်ဝါဒက်ကွေန်၊ တုၚ်ခွ၊ မုက္ခမအ်၊ သေတ်ကွေန်၊ ခယဲ ကေုာံ လ္ပာ်ကွာန်အခိုၚ်တံဂှ် ကၠောန်သ္ပပန်ပှော်လဝ်လွဟ်ဇၞော် ပွိုၚ်ၜါနာဍဳပြၚ်ရ။
အပ္ဍဲပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်ဂှ် မံၚ်ဆာန်မျေအ်အံၚ် အယုက် ၂၂ သၞာံ ဒၟံၚ်ကွာန်ဝါဒက်ကွေန် ကၠုၚ်ပလေဝ်ကွဳလိုန်ဓာတ်ဂှ်ဝွံ ဒးကဝေက်မကမ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
သ္အာၚ်နူဂှ်ပၠန် အပ္ဍဲကဵုကွာန်မုက္ခမအ် မကမ်လွဟ်ဇၞော်ဒတုံဗ္တိုဟ်ထ္ကးအာလဝ်ဂှ်လေဝ် ဂၠဴညးဒေသတံလွဳလဝ်ဂှ် ဒးအာပိတုဲ ချိုတ်အာလဝ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ဒပ်ကံၚ်ဇြဳပၞာန် ဖျေံသ္ဇိုၚ်ကျာ်ထဝ်ဂှ်ဝွံ ဟိုတ်နူဗ္ဒိုပ်ဒပ်ဍေံတံ ဒးဒုၚ်ဗ္တိုက်လဝ်တုဲ ပန်ပှော်ဒၟံၚ်လွဟ်ဇၞော် အပ္ဍဲကွာန်ဒၞါဲညးဍုၚ်ကွာန်ကောန်အရာပ်တံ မံၚ်တန်တဴဒၟံၚ်တံ သီုဗ္တံသီုတ္ၚဲရ။
တုဲကၠုၚ် ပ္ဍဲဂိတုဂျူလာၚ် ၂၃ တေံဂှ်လေဝ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် အပ္ဍဲကွာန်ပျေန်ကတိုဝ် ပွိုၚ်ဍုၚ်ကျာ်ထဝ်ဂှ်တုဲ ညးဒေသဒ္စါံတၠ ပါလုပ်သီုကဵုကောန်ကလောန်ကတိုၚ်ထဝ်တံ ချိုတ်အာတုဲ တြဴတၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−CJ