မတ်မလီု၊ အဝ်ဂါတ် ၂၅
ပ္ဍဲတွဵုရးဍုၚ်မန် ပွိုၚ်ဍုၚ်မတ်မလီုဂှ် မ္ၚးနူကဵုဒပ်ကံၚ်ဇြဳပၞာန်၊ ဗၠာဲသၟိၚ်၊ ပၞာန်မၚ်ကွာန်တံဂှ် ညးမကော်လဝ်ကဵုတ္ၚဲတုဲ ကဵုကျိုၚ်လဝ်ကယျိုၚ်ပၞာန်တံဂှ် နကဵုဟိုတ်ပရေၚ်ဂီုကၠီုဂှ် ကၠောန်သ္ပဒၟံၚ်လ္တူညးဍုၚ်ကွာန်တံ ကြာန်န်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ပံၚ်ကောံသၟဝ်တဲကံၚ်ဇြဳပၞာန်တံဝွံ သ္ပပဓာန်ကဵုလွဟ်တုဲ စနူဇိုၚ်သဝ်တ္ၚဲတုဲ ထ္ၜးဇြဟတ်တုဲ ဒၞါဲမၞိဟ်ဂၠိုၚ်တံကဵု ဒၞါဲဟွံထေၚ်လဝ်တံဂှ် ကၟာတ်လဒဵုစၟဳတ်ကီု၊ ထ္ၜးဟိုတ်ကဵုပရေၚ်ဂီုကၠီုတုဲ ဂေတ်ကၚ်ကီု၊ လုပ်စိုပ်စၟဳတ်စရၚ်ကၟုဲတံဂှ် ကၠောန်ၜိုတ်ဒၟံၚ်ရ။
ပ္ဍဲအရာဂေတ်ကၚ်ဂီုကၠီု သ္ပပဓာန်ကဵုလွဟ်လက်နက်ဂှ်လေဝ် မ္ၚးနူကဵုကွဳစက်၊ ကွဳလိုန်ဓာတ် အာကၠုၚ်ဒၟံၚ် လ္တူဍာန်တံဂှ် ကွဳစက်၊ ကွဳလိုန်ဓာတ် ကၠုၚ်နူကဵုဂၠံၚ်မွဲလ္ပာ်တေံဂှ်လေဝ် ထ္ၜးလွဟ်တုဲ ကဵုဒေါအ်သ္ကဲဂၠံၚ်၊ ဟွံဒေါအ်မ္ဂး လက်ဒေါန်ဘပဠဒၟံၚ်တံ နွံရောၚ် ဂွံတီကေတ်ရ။
ဂကောံဒပ်ပံၚ်ကောံကံၚ်ဇြဳပၞာန်ဝွံ ပ္ဍဲအရာဂေတ်ကၚ် နကဵုတၚ်ထ္ၜးဟိုတ်ပရေၚ်ဂီုကၠီုဂှ်လေဝ် သီကေတ် ကၠေၚ်စက် နူဆေၚ်သ္ကဲဂၠံၚ်တံ၊ လုပ်ကေတ်ဗဳယျာ နူကဵုဆေၚ်ဗဳယျာတံသၟးဟွံက ကၠောန်သ္ပဒၟံၚ်ပြဝ ဟွံမွဲကဵုသၞောဝ်သၞောတ်တံဂှ်ရောၚ် ညးဒေသမတ်မလီုမွဲတၠ ဟီုရ။
“လ္တူဍုၚ်မတ်မလီုမွဲဂှ်တှ်ေ ဍုၚ်တၞဟ်ဟ်တံဂှ် ဟွံမွဲပုဟ်။ လ္တူဍုၚ်မတ်မလီုဂှ် ရဲပြးဒၟံၚ်လ္တူဂၠံၚ်ဍာန်တံ၊ ကောန်ဂကောံ မဘသတံ၊ မသကလောကောဒေံ မဆက်စပ်ကဵု ကောန်ဂကောံပျူသဝ်ထဳတံဂှ် မွဲတ္ၚဲ ကဵု ၈၀၀၀ တုဲ အခိၚ်ဗ္တံမ္ဂး ကျိုၚ်တိုန်ယူနဳဝှမ်တုဲ ဗက်ရပ်ဒၟံၚ် ဆေၚ်သွံဒၟံၚ်ကၠေၚ် သ္ကဲဂၠံၚ်တံဂှ်ရ။ သီဒၟံၚ်ကၠေၚ်တံရ။ ပ္ဍဲဆေၚ်ဗဳယျာတံဂှ် လုပ်ကေတ်ဒၟံၚ်ဗဳယျာတံရ။ ဗီုမိက်ဂွံကၠောန် ကၠောန်ဒၟံၚ် ညံၚ်ရဴဟွံမွဲကဵုသၞောဝ်သၞောတ်တံရ။ အခိၚ်ဗ္တံတှ်ေ ပရေံကွေံကွေံဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ဒၞါဲကၟာတ်လဒဵုစၟဳတ် ညးကွာ်ဂၠံၚ်တံဂှ်လေဝ် ကွဳစက်၊ ကွဳလိုန်ဓာတ် ဒဳအသိၚ်ၜက်အာတံဂှ် တေအ်ကဵုဇိုၚ်တုဲ ဗဒေါအ်ကီု၊ ထ္ၜးသေနာတ်တုဲ ဘပဠသၟးဟွံက စနူကဵုၜုၚ်တက်တံဂှ် ဗီုဒးစိုတ် ကၠောန်ဒၟံၚ်ရောၚ် ညးဆက်ဟီုရ။
ဍုၚ်မတ်မလီုဝွံ အပ္ဍဲကာလသီအဝဵုဏံ ဒှ်ဍုၚ်ကံၚ်ဇြဳပၞာန် ထိၚ်ဒက်လဝ် ပေၚ်ၚ်မွဲတုဲ ဒေသကောန်ဒပ်စဵုဒၞါညးဍုၚ်ကွာန်တံ လုပ်တိတ်ဟွံဂွံမွဲလေဝ် မဒှ်တုဲ ဌာန်ဂအုပ်ပၞာန်ရးအဂၞဲ ဖျေံလဝ်သ္ဇိုၚ်ရ။
ညးဒေသမတ်မလီုမွဲတၠပၠန်ဂှ်လေဝ် ကောန်ဒပ်ကံၚ်ဇြဳပၞာန်တံ ပ္ဍဲဒၞါဲဂေတ်ကၚ်ဂှ် ဂေတ်ကဵုဇြဟတ်ဗွဲမဂၠိုၚ်ဂၠေၚ်တုဲ ဗက်စၟဳတ်ဒၟံၚ် သီုကဵုဆေၚ်စသုၚ် ကေုာံ ဗ္ဒမ်ဇူဒီုတံဂှ်တုဲ ဗီုပၟိက်စိုတ် ရပ်ဒက်ဒၟံၚ်တံ နွံဒၟံၚ်ရောၚ် ဟီုရ။
“ဂေတ်ကၚ်ဂှ်တှ်ေ ဂေတ်ဒၟံၚ်ဖအိုတ်ရဏောၚ်။ အခိၚ်ဗ္တံ ကြဴနူ ၉ နာဍဳတုဲမ္ဂး ဍေံတံဂေတ်ကၚ်ရဏောၚ်။ လဆောဝ်လဆောဝ် ဂေတ်ဒၟံၚ် နကဵုကွဳစက် ၜိုတ် ၁၀ ဖ္ဍိုက်၊ ၁၂ ဖ္ဍိုက်။ ဍေံတံဂှ် အာကဵုဂကောံ ရေၚ်ဒၟံၚ်ဟဂှ်ရ။ တုဲတှ်ေ လုပ်အာဒၞါဲကွဳစက် (မြေနီကုန်း)။ ဆေၚ်စသိုၚ်တံနွံတုဲ ဍေံတံ ဗက်စၟဳတ်အဏံ။ ဗက်စၟဳဒၟံၚ် သီုဗ္ဒမ်ဇူဒီုတံ၊ သီုတၞးကာဒ်ကောန်ဍုၚ်တံ၊ ဖုၚ်တံမုတံရ။ အခိၚ်ဗ္တံလေဝ် ရပ်ဒက်ဒၟံၚ်ရ” သာ်ဝွံ သ္ဂးရ။
ညးဒးဒုၚ်ရပ်လဝ်သာ်ဏံတံဂှ် လ္ပာ်ဒပ်ပံၚ်ကောံကံၚ်ဇြဳပၞာန်တံ အာတ်မိက်သြန်ဗွဲမဂၠိုၚ်ဂၠေၚ်တုဲ ကလေၚ်ဗလးကဵုတံနွံတုဲ ညးကဵုလှုဲဟွံမာန်တံဂှ်တှ်ေ တပ်စုတ်ၝောံပိုဒ်နာနာတုဲ ရပ်ဒက်ဖျေံထံၚ်တံ နွံဒၟံၚ်ရောၚ် ဂွံတီကေတ်ရ။
ကောန်ဒပ်ပံၚ်ကောံကံၚ်ဇြဳပၞာန်တံ ပ္ဍဲအရာဂေတ်ကၚ် နကဵုဟိုတ်ပရေၚ်ဂီုကၠီုဂှ်လေဝ် သုၚ်စဗ္ၜူတုဲ ကြာန်ဒၟံၚ်ဂှ်ရ နကဵုညးဍုၚ်ကွာန်အကြာအရာပ်ဂမၠိုၚ် ဒးဖေက်ဒၟံၚ်အိုတ်ရောၚ် ညးဒေသလ္တူဍုၚ်ဂမၠိုၚ် ဟီုရ။
ပ္ဍဲဍုၚ်မတ်မလီုဂှ်တှ်ေ နကဵုတၚ်ထ္ၜးဟိုတ် ပရေၚ်ဂီုကၠီုတုဲ မၞိဟ်ကံၚ်ဇြဳပၞာန် ကော်လဝ် ဗွဲမဂၠိုၚ်ဂှ်ဝွံ ဒှ်ညးစုက်လုက်ကဵုကံၚ်ဇြဳပၞာန်၊ ကောန်ဂကောံ မဘသတံ၊ ကောန်ဗော်ကျဖောအ်တံ၊ ရဲထံက်ဂလာန်ဒပ်ပၞာန်တံသၟးဟွံက မၞိဟ်ကြာန်န်အပ္ဍဲအရာပ်တံ ပါလုပ်ဒၟံၚ် ဂၠိုၚ်အိုတ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−MOI