မတ်မလီု၊ အဝ်ဂါတ် ၂၇
ပ္ဍဲတွဵုရးဍုၚ်မန် ပွိုၚ်ဍုၚ်လ္ၚဵုတံဂှ် သွက်ဂွံဒက်ပ္တန် ဂကောံဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ်ဂှ် လ္ပာ်ကံၚ်ဇြဳပၞာန် ပကောံမၞိဟ်တၟိကဵု ဗက်စန်ဒက်တံ ကၠောန်ၜိုတ်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဂကောံပရေၚ်အုပ်ဓုပ်ကွာန်၊ အရာပ် ကံၚ်ဇြဳပၞာန်တံဂှ်ဝွံ စနူဂိတုအဝ်ဂါတ် သတ္တာဟလက္ကရဴအိုတ်တုဲ ပ္ဍဲကဵုပွိုၚ်ဍုၚ်ၜဳကလေၚ်၊ သဓီု၊ ၜါသွာၚ် ကေုာံ ပွိုၚ်ဍုၚ်ရေဝ်တံဂှ် သွက်ပရေၚ်ဂီုကၠီုညးဍုၚ်ကွာန်ကဵု သွက်ပရေၚ်ဗ္တိုက်သရိုဟ်ပွပကီုပရာပ်တံဂှ် ပကောံဒၟံၚ်မၞိဟ်တၟိရ။
ပ္ဍဲအရာပကောံမၞိဟ်တၟိသာ်ဏံဂှ် မ္ၚးနူကဵုဗ္ဂပ်ကဵုလွဟ် ကေုာံ ယူနဳဝှမ်တံဂှ် မွဲတ္ၚဲမ္ဂး ဒဒှ်ရထံက်ပၚ်ကဵုအာ ၆၈၀၀ ဒ္ကေဝ်ဂှ် ဗက်စန်ဒက်ဒၟံၚ်ရောၚ် ညးဒေသၜဳကလေၚ်မွဲတၠ လဴထ္ၜးလဝ်ရ။
လအာတုပ်သာ်ဂှ်ကီု ပ္ဍဲပွိုၚ်ဍုၚ်ရေဝ်ဂှ် စနူဂိတုအဝ်ဂါတ် ၂၄ တုဲ ဂကောံအုပ်ဓုပ်ကွာန်အရာပ် ကံၚ်ဇြဳပၞာန်တံ သွက်ဂွံဒက်ဂကောံဂီုကၠီုညးဍုၚ်ကွာန် ဇၟာပ်ပ်ကွာန်၊ ဇၟာပ်ပ်အရာပ် ဗွဲမပြဟ်ဂှ် ကၠောန်သ္ပပလေဝ်ပလေတ်ဒၟံၚ်ရ။
ကံၚ်ဇြဳပၞာန်ဂှ်တှ်ေ ကုကောန်ဂကောံဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ်တံဂှ် ဗ္ဂပ်ကဵုလွဟ်၊ ကပေါတ်ပၞာန် မကိတ်ညဳကဵုပေါဲဗ္တိုက်တံကီု၊ သွက်ဂွံဗပေၚ်ဇွောံမစၞစ ဗွဲမဂတာပ်အခိၚ်တံဂှ်တုဲ ရန်တၟံလဝ် သွက်ဂွံရပ်စပ်စကာ ပ္ဍဲကဵုကမၠောန်ပရေၚ်ထံက်ပၚ်တံဂှ်ရ။
သွက်ဂကောံဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ်ဂှ် ကော်အာ မၞိဟ်တြုံ အာယုက်လ္တူ ၃၅ သၞာံတံဏောၚ်တုဲ ကြဴနူကဵုတန်ဗ္တောန်ကုညးတံ ပွိုၚ်မွဲသတ္တာဟတုဲ ရပ်စပ်အာ သွက်ပရေၚ်ဂီုကၠီုကွာန်၊ အရာပ်တံဏောၚ် မဒှ်ရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် ကၟိန်ဍုၚ် ညံၚ်ဂွံကလေၚ်စိုပ် အကာဲအရာမူလဂှ် အရာမကၠောန်ၜိုတ်ထေက်တံဂှ် ဆက်ကၠောန်အာဏောၚ်ဂှ်ရ ထ္မံက်ရုပ်ရဴရေၚ်တၠုၚ်အာ သၞောတ်ဂီုကၠီုညးဍုၚ်ကွာန်တံပါလုပ်ဂှ်ဏောၚ် ပ္ဍဲဂိတုအဝ်ဂါတ် ၂၅ တေံ ဟီုလဝ်ရ။
ညးဍုၚ်ကွာန်ဒေသတံဂှ်တှ်ေ ဒပ်ပၞာန်ဝွံ စၞးဒးစဵုဒၞါညးဍုၚ်ကွာန်တံဂှ် ညးဍုၚ်ကွာန်တံဏောၚ် ဒှ်သဘဴဒးကလေၚ်စဵုဒၞါအာ ဒပ်ပၞာန်ဂှ်ရ ဒုၚ်တဲဟွံမာန်ပုဟ်ဂှ် ပါ်ပါဲလဝ်ရ။
ကံၚ်ဇြဳပၞာန် ကျဒၟံၚ်ပၞာန်ဂှ်ဝွံ သွက်ဂွံဗပေၚ်ဇြဟတ်ပၞာန်ဂှ် ပကောံဒၟံၚ်မၞိဟ် နကဵုတၚ်ထ္ၜးဟိုတ်ပၞာန်ညးဍုၚ်ကွာန်၊ သၞောဝ်ယိုက်ဂၠေၚ်လျိုၚ်ပၞာန်တံဂှ်ကီုလေဝ် ဟွံရုမ်ဂပ်ဒှ်ဒၟံၚ်ဂှ်ရ မၞိဟ်တြုံအလုံဍုၚ်မွဲတံသီုဖအိုတ် ဂွံလုပ်ကၠုၚ်ပၞာန်ဂှ် ပ္တိတ်ဒၟံၚ်ဇြဟတ် နကဵုနဲကဲနာနာသာ်ရ။
ပ္ဍဲကဵုဂကောံဗဟဵု ကောပ်ကာဲပရေၚ်ဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ် ကံၚ်ဇြဳပၞာန်ဂှ် ဝန်ဇၞော်ကေၚ်ကာပယျဵု ကေတ်လဝ်တာလျိုၚ် နဒဒှ်ဥက္ကဌတုဲ ဒုဝန်ဇၞော်ကာစဵုဒၞါဂှ် နဒဒှ်ဒုဥက္ကဌ (၁) ကေုာံ ဒုဝန်ဇၞော်ကာအပ္ဍဲဍုၚ်ဂှ် နဒဒှ်ဒုဥက္ကဌ (၂) ကေတ်လဝ်တာလျိုၚ်ရ။
သ္အာၚ်နူဂှ်ပၠန် သၞာဲဒဴနူကဵုရုၚ်သ္ကိုပ်က္ဍိုက်ပ်ကာစဵုဒၞါ (ပၞာန်တိုက်) တံမပါလုပ် ဒုသ္ကိုပ်ရး နူကဵုဌာန်ဂအုပ်ပၞာန်ရးဂမၠိုၚ်၊ ဝန်ဇၞော်ပရေၚ်ဂီုကၠီု ကေုာံ ကေၚ်ကာပယျဵု နူကဵုရးဒေသ ကေုာံ တွဵုရးဂမၠိုၚ်၊ ဂအုပ်ဒပ်ဗၠာဲသၟိၚ် နူကဵုကေၚ်ကာအပ္ဍဲဍုၚ်၊ သ္ကိုပ်ဌာန်ဂအုပ် ဂကောံကောန်ပၞာန်တြေံတြေံ၊ ဒုသ္ကိုပ်စၞောန်ပ္ညုၚ် နူကဵုဌာနက္ဍိုက်ပ်အုပ်ဓုပ်ကာနာနာ ကေုာံ ဌာနသိုဟ်ပၠိုတ်ပၟတ်တံလေဝ် ပါလုပ်ဒၟံၚ် နဒဒှ်ကောန်ဂကောံရ။
ဂကောံဇြဟတ်ပၠန်ဂတး ဖျေံသ္ဇိုၚ်တွဵုရးဍုၚ်မန်ဂှ်တှ်ေ ညးလဵုမွဲဟွံဟီု မပ္တိတ်ဇြဟတ် သွက်ဂွံဒက်ပ္တန် ဂကောံဂီုကၠီုညးဍုၚ်ကွာန်ဂှ် စၟတ်အာနဒဒှ်ပွန်ပရေၚ်ပၞာန်တုဲ ဗ္တိုက်အာဏောၚ်ဂှ် ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram