တၞၚ်သဳ၊ အဝ်ဂါတ် ၂၇
ပ္ဍဲရးတၞၚ်သဳ ပ္ဍဲကဵုပွိုၚ်ဍုၚ်တၞၚ်သဳဂှ် အပ္ဍဲပွိုၚ်မွဲတ္ၚဲ ဗ္ဒိုပ်ဒပ်ကံၚ်ဇြဳပၞာန် ဒးဒုၚ်လုပ်စိုပ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန်မွဲတၠ ချိုတ်လဝ်တုဲ မသုန်တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ကရောၚ်ပၞာန်ပံၚ်တောဲ ၂ ဒပ်စဵုဒၞါညးဍုၚ်ကွာန် ခရိုၚ်ဗိက်ရ။
တုဲကၠုၚ် ပ္ဍဲဂိတုအဝ်ဂါတ် ၂၄ တေံ ဒပ်ပံၚ်ကောံ စဵုဒၞါညးဍုၚ်ကွာန်တံ လုပ်စိုပ်ဗ္တိုက်လဝ် တမ်ဒပ်ကံၚ်ဇြဳပၞာန် ခမရ စၟတ် ၅၅၇ ဖျေံသ္ဇိုၚ်အံက်ကေန်၊ သၞေဟ်ကၚ်စၟဳတ် ဒဒန်တၞၚ်သဳ ကေုာံ ကုန်ဗ္ဒိုပ်လ္တူဒဵု မိုၚ်ခလိုဝ်ဝဵု နွံဗ္ဒါဲရုပ်ဗိုလ်ချုပ်ဂှ်ရ။
တမ်ဒပ်ခမရ စၟတ် ၅၇၇ ဖျေံသ္ဇိုၚ်အံက်ကေန်ဂှ် လုပ်စိုပ်ဗ္တိုက်လဝ် အခိၚ်နူဂယး ၜိုတ် ၈ နာဍဳကဝိုက်ဂှ်တုဲ ဂွံဗ္ဒါဲ ၁၅ မိနေတ်တုဲ ပရေၚ်ပန်ပှော်ၜါလ္ပာ် က္တဵုဒှ်လဝ်ရ။ လ္ပာ်ကံၚ်ဇြဳပၞာန်ဂှ် သၞာဲဒဴမွဲတၠကဵု အကြာပ်ဒပ်ၜါတၠ ဇီုကပိုက်ကလိဂွံလဝ်ဝပ်ရောၚ် သ္ဂးရ။
ကြဴနူဂှ်တုဲ အခိၚ်နူဂယး ၜိုတ် ၉ နာဍဳဂှ်လေဝ် ဒပ်ပံၚ်ကောံစဵုဒၞါညးဍုၚ်ကွာန်တံ ထပ်ဗ္တိုက်လဝ် သၞေဟ်ကၚ်ဒဒန်စၟဳတ် ဂၠံၚ်လုပ်ဍုၚ်တၞၚ်သဳဂှ်ကဵု ဗ္ဒိုပ်ဒပ် နွံဗ္ဒါဲရုပ်ဗိုလ်ချုပ်ဂှ်ရ။
ပ္ဍဲကဵုပရေၚ်ဗ္တိုက် သီုပိဝါဏံဂှ် လ္ပာ်ကံၚ်ဇြဳပၞာန် မွဲတၠ ချိုတ်တုဲ မသုန်တၠ ဇီုကပိုက်ကလိဂွံလဝ်ဝပ်ရောၚ် ညးဒုၚ်တာလျိုၚ် လလောၚ်ပရိုၚ် ကရောၚ်ပၞာန်ပံၚ်တောဲ−၂ ဒပ်စဵုဒၞါညးဍုၚ်ကွာန် ခရိုၚ်ဗိက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူဒပ်ကံၚ်ဇြဳပၞာန်တံ ဒးဒုၚ်ဗ္တိုက်တုဲ ပ္ဍဲကဵုသၞေဟ်ကၚ်စၟဳတ်လုပ်ဍုၚ်တံကဵု ဗ္ဒိုပ်ဒပ်တံဂှ် စၟဳတ်ကၠုၚ် ရဲကွာ်ဂၠံၚ်တံ ဗွဲမတေၚ်ဂြတ်ဂှ် ဂွံတီကေတ် အတိုၚ်ဂလာန် ဂကောံဇြဟတ်ပၠန်ဂတးတံရ။
တုဲကၠုၚ် ပ္ဍဲဂိတုအဝ်ဂါတ် ၈ တေံဂှ်လေဝ် ဒပ်ကံၚ်ဇြဳပၞာန် ကၠုၚ်ပလံၚ်ဇွောံမ ဇရေၚ်ဗ္ဒိုပ်ဒပ်ဖျေံသ္ဇိုၚ်ပွိုၚ်ဍုၚ်တၞၚ်သဳဂှ် ဒးဒုၚ်ကြတ်ဗ္တိုက်လဝ် ဟွံအောန်နူကဵုပိဝါတုဲ ကောန်ဒပ်ကံၚ်ဇြဳပၞာန် ၄ တၠ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media