လှာဒကှ်၊ အဝ်ဂါတ် ၂၇
ကွာန်အနာန်ကွေန် ပွိုၚ်ဍုၚ်လှာဒကှ် တွဵုရးကရေၚ် ပေါဲဗ္တိုက်သ္ကာတ်မြဟ်ဒၟံၚ်ဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ကဵုပၞာန်ကျာ ကေုာံ လွဟ်ဇၞော်တံဂှ်တုဲ ကြပ်အလုံဍုၚ်မွဲ ဇီုကပိုက်လီုလာ်အာယျဂှ် တမ်ရိုဟ်ပရိုၚ်အပ္ဍဲဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲကဵုကွာန်အနာန်ကွေန်ကဵု ကွာန်လောတ်ယှာန် နွံလ္တူဂၠံၚ်ကွဳစက် ကျာ်ပိ−ဇြပ်ဗု ပွိုၚ်ဍုၚ်လှာဒကှ်ဂှ် စနူဂိတုအဝ်ဂါတ် ၜိုတ်သတ္တာဟဒုတိယဂှ်တုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတး ဒပ်ပၞာန်ဗၠးၜးကောန်ဂကူကရေၚ် KNLA တံဂှ် ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
အပ္ဍဲပေါဲဗ္တိုက်ဂှ် ညံၚ်ဗ္ဒိုပ်သၞေဟ်ကၚ်လောတ်ယှာန် ကေုာံ ဗ္ဒိုပ်ဗျူဟာပၞာန်အနာန်ကွေန်တံ ဟွံဂွံစှ်ေအာဂှ် ဒပ်ကံၚ်ဇြဳပၞာန် ရပ်စပ်လွဟ်ဇၞော်ကဵု အရီုဗၚ်ပၞာန်ကျာတံဂှ်တုဲ ဗ္တိုက်ဒၟံၚ်ဗွဲမသ္ကာတ်မြဟ်ရောၚ် ဂွံတီကေတ် နူကဵုတမ်ရိုဟ်ပရိုၚ်အပ္ဍဲဒေသတံရ။
ဟိုတ်နူပရေၚ်ဗ္တိုက် ဒပ်ကံၚ်ဇြဳပၞာန်တုဲ ကွာန်အနာန်ကွေန် ကြပ်အလုံကွာန်မွဲ လီုလာ်လဝ်တုဲ အပ္ဍဲကဵုကွာန်လောတ်ယှာန်ဂှ် ဘာလကျာ် ကေုာံ စမြိုၚ်သ္ၚိဒၟံၚ်လ္ၚဵုတံ ဇီုကပိုက်ဒးလီုလာ်အာလဝ်ရောၚ် ဂွံတီကေတ်ရ။
စပ်ကဵုအကာဲအရာပရေၚ်ပၞာန် ဒေသအနာန်ကွေန်ဂှ်တုဲ လ္ပာ်ဗော်သွးကောန်ဂကူကရေၚ် KNU ကဵု ကံၚ်ဇြဳပၞာန်ဂှ် ဒဵုကဵုအခိၚ်လၟုဟ် လလောၚ်ပ္တိတ်လဝ်ပရိုၚ်ဂှ် ဟွံမွဲဏီရ။
ဒပ်ဒရုၚ်မွဲ ဂကောံဇြဟတ်ပၠန်ဂတး KNLA ပါလုပ်ဒၟံၚ် အပ္ဍဲပေါဲဗ္တိုက်ဂှ်တှ်ေ လုပ်ဒၟံၚ်ပေါဲဗ္တိုက် ကရောံဒပ်ပံၚ်ကောံမဟာမိတ်တံ အရိုဟ်ဒဒှ်တ္ၚဲရောၚ် ကဵုလဝ်သမ္တီရ။
ပ္ဍဲကဵုမုက်လိက်ဇာဇၞိက်ပရေၚ်မၞိဟ် ကံၚ်ဇြဳပၞာန် ကဵုဇြဟတ်ထံက်ဂလာန်တံဂှ် ဒပ်ပံၚ်ကောံ KNLA PDF တံ ကၠုၚ်စိုပ်ဗ္တိုက်လဝ် ဗျူဟာအနာန်ကွေန်ဂှ်ဝွံ ဂွံပိဝါယျတုဲ နကဵုပရေၚ်ဇီုကပိုက်ပြဟ်လလုဲဗွဲမဂၠိုၚ်ဂှ် ဒးဆုတ်ကလေၚ်အာလဝ်ရောၚ် ထ္မံက်ထ္ၜးလဝ်ရ။
အပ္ဍဲဒေသအနာန်ကွေန်လၟုဟ်ဂှ် ကံၚ်ဇြဳပၞာန် ဒးသ္ပပဓာန်ပတှ်ေဒၟံၚ် ပၞာန်ကျာကဵု အရီုဗၚ်လွဟ်ဇၞော်တံသၟးရတုဲ နူကဵုဗလးတိဏံ ဒပ်ပၞာန်အရီုဗၚ်ဂမၠိုၚ် ဒဵုကဵုအခိၚ်လၟုဟ် ကၠုၚ်စိုပ်ဟွံမွဲဏီပုဟ်ဂှ် တမ်ရိုဟ်ပရိုၚ်အပ္ဍဲဒေသတံ သ္ဂးအိုတ်ရ။
ဟိုတ်နူပေါဲဗ္တိုက်ဒေသအနာန်ကွေန်ဂှ်တုဲ ညးဍုၚ်ကွာန်ဒေသ နူကဵုကွာန်အနာန်ကွေန် လောတ်ယှာန် ဟွံအောန်နူကဵု ၅ ကွာန် လၟိဟ်ဗွဲမဂၠိုၚ်ဂှ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံတုဲ ဟိုတ်နူပေါဲဗ္တိုက်တုဲ ဒးကၟာတ်လဝ် ဘာဗ္တောန်လိက်မၞုံအပ္ဍဲဒေသတိဍာ်တံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KPSN