နေဗျဳဒဝ်၊ အဝ်ဂါတ် ၂၇
ညံၚ်ကၟိန်ဍုၚ်ဂွံကလေၚ်စိုပ် အတိုၚ်အကာဲအရာမူလ ကမၠောန်မဒးကၠောန်ထေက်တံဂှ် ဆက်ကၠောန်ၜိုတ်အာဏောၚ်ဂှ်ရ ထ္မံက်ရုပ်ရဴရေၚ်တၠုၚ်အာ သၞောတ်ဂီုကၠီုညးဍုၚ်ကွာန်တံ ပါလုပ်ဂှ်ဏောၚ် က္ဍိုပ်သ္ကိုပ်ပၞာန် ဟီုရ။
ပ္ဍဲဂိတုအဝ်ဂါတ် ၂၅ တေံ ပ္ဍဲကဵုပေါဲဆဵုဂဗ ကုကောန်ဂကောံအလဵုအသဳရးမာန္တလေဝ်၊ ကုညးတာလျိုၚ် နူကဵုဌာနမဆေၚ်စပ် ကဆံၚ်ရးတံဂှ် ညးက္ဍိုက်ပ်ဒပ်ပၞာန် မကျဒၟံၚ်ပၞာန် အလုံဍုၚ်မွဲ သ္ကိုပ်ပၞာန်ဇၞော် မေန်အံၚ်လှာၚ် ဟီုလဝ်ရ။
စပ်ကဵုပရေၚ်ဂီုကၠီုညးဍုၚ်ကွာန်တုဲ စၟအ်အ်မၞိဟ် တီကၠိုဟ်ကေတ်ပရေၚ်ဂီုကၠီုတုဲ နွံပၟိက်ဒးကၠောန်ၜိုတ်အာဏောၚ်တုဲ ယဝ်ရဒက်ပ္တန် သၞောတ်ဂီုကၠီု ဂၠံၚ်၊ အရာပ်၊ ကွာန်တံဂှ်မ္ဂး သွက်ပရေၚ်ဂီုကၠီုတိဍာ်ဂှ် စိုပ်တရဴဏောၚ် သ္ဂးရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ် ဒေသညးတံဝွံ ဟိုတ်နူဟွံဂီုကၠီုတုဲ လ္ပာ်ကံၚ်ဇြဳပၞာန် လလောၚ်ပ္တိတ်ကဵုကၠုၚ်စၞောန် သာ်ဏံဂှ်ဝွံ အကြာညးဍုၚ်ကွာန်တံကဵု ဂကောံပၠန်ဂတးတံဂှ် လညာတ်ဟွံတုပ်သၟဟ်တံ ဒှ်ကၠုၚ်မာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဒေသပိုယ်တံဂှ် ဒှ်ဒေသဟွံညိၚ်ဝတ်ရ။ လလောၚ်ပ္တိတ်သာ်ဏံတုဲ အကြာညးဍုၚ်ကွာန်တံကဵု ဂကောံပၠန်ဂတးတံဂှ် လညာတ်ဟွံတုပ်သၟဟ်တံ ဒှ်ကၠုၚ်မာန်ဏောၚ်။ လ္ပာ်ညးတံ ဒှ်ကၠုၚ်သံသယမာန်ဏောၚ်။ အေ ဂှ်တှ်ေ ညးဍုၚ်ကွာန်ပိုယ်တံ သ္ဇက်ဂွံကြေပ်လဒေါဝ်နွံရ။ မွဲလ္ပာ်ဂှ်လေဝ် ကဵုဇြဟတ်ဂရိုဟ်။ ရဲတံဏံလေဝ် ထောံဍုၚ်ကွာန်ဟွံမာန်ပုဟ်ဟီုမ္ဂး စပ်ကဵုဇြဟတ်ဂရိုဟ်တုဲ ဗီုလဵုဂွံကလေၚ်ခၠေဝ်ဂှ်ရော။ လ္ပာ်ဏံ ဟွံကၠောန်ပုဟ်ဟီုတှ်ေ လ္ပာ်ဍေံတံ (စကစ) ဂှ် ကေတ်ကၠုၚ်အရေဝ်တံ နွံကၠုၚ်မာန်ဟာ။ ကၠောန်မ္ဂးလေဝ် ကုဒပ်ပၠန်ဂတးတံဂှ် စပ်ကဵုပရေၚ်ဏံတုဲ ပြသၞာနွံမာန်ဏောၚ်။ အကြာၜါလ္ပာ်ဂှ် ညးဍုၚ်ကွာန်တံဂှ်တှ်ေ ကြေပ်ဂြတ်ဒၟံၚ်ကွေံကွေံဏောၚ်” သာ်ဝွံ သ္ဂးရ။
နကဵုကံၚ်ဇြဳပၞာန် အပ္ဍဲပရေၚ်ပၞာန်သီအဝဵုဏံ ဒးဗလးလဝ်တဲ ဌာန်ဂအုပ်ပၞာန်ရးမွဲ အလန်ကိုပ်ကၠာအိုတ်တုဲ ဒက်ပ္တန်လဝ် ဂကောံဗဟဵု ကောပ်ကာဲဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ်ရ။
တာလျိုၚ်ကမၠောန် ဂကောံဏံဂှ်တှ်ေ ပ္ဍဲကဵုနေဗျဳဒဝ်ကီု ရးဒေသ ကေုာံ တွဵုရး၊ ခရိုၚ်၊ ပွိုၚ်ဍုၚ် ကေုာံ စဵုကဵုကွာန်၊ အရာပ် ဂကောံကွာန်တံဂှ် သွက်ဂွံဒက်အာ ဂကောံဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ် မဒှ်ရ။
ကဵုတန်ဗ္တောန် ကုကောန်ဂကောံတံကီု၊ ဗ္ဂပ်ကဵုလွဟ်လက်နက်ကီု၊ ကဵုထံက်ပၚ်ပလံၚ်ဗစိုပ်တံကီု ကေုာံ သွက်ဂွံဟံၚ်ပြာ် ပဆုဲပ္တိတ် ညးကလိဂွံဝပ်တံ တာလျိုၚ်သာ်တံဏံဂှ်လေဝ် သွက်ဂွံကဵုအာဂှ် ကံၚ်ဇြဳပၞာန် စဳဇန်လဝ်ရ။
ဗွဲမစိုပ်တရဴ ဂွံလုပ်ပေါဲဗ္တိုက်မာန်ဂှ်လေဝ် နဲကဲဗျူဟာ မကိတ်ညဳကဵု အကာဲအရာတံဂှ် ပ္ကတ်ပ္ကေၚ်ကဵုကီု၊ ပ္ဍဲကဵုတာလျိုၚ်ဂီုကၠီုတိဍာ် ကေုာံ ပရေၚ်စဵုဒၞါ၊ တာလျိုၚ်ဗလးမုက်ပၞာန်တံဂှ်လေဝ် သွက်ဂွံရပ်စပ်စကာအာ ကောန်ဒပ်တံဏံ မဒှ်ရ။
ဟိုတ်ဂှ်ရ မၞိဟ်တြုံ အကြာအာယုက် ၃၅ စဵုကဵု ၆၅ သၞာံတံဂှ် ကဵုပါလုပ် ပ္ဍဲဂကောံကောပ်ကာဲဂီုကၠီုညးဍုၚ်ကွာန်တံတုဲ ကဵုတန်ဗ္တောန်ပၞာန် ပွိုၚ်မွဲဂိတုတုဲ ဒးယိုက်ဂၠေၚ်အာတာလျိုၚ်ဂီုကၠီု ပ္ဍဲကွာန်၊ အရာပ်တံဏောၚ် မဒှ်ရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠပၠန်ဂှ်လေဝ် ပြဝကံၚ်ဇြဳပၞာန်လၟုဟ်ဂှ်ဝွံ ဒှ်ဟွံထေက်ဂှ်ကီု၊ ဇြဟတ်လေဝ်ဟွံမွဲတုဲ အစောံစရာဲရေၚ်တၠုၚ်မာန်တံလေဝ် အိုတ်အာဂှ်ရ ဒှ်သဘဴဂၠါဲကလောန်ရဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“မိက်ဂွံဟီုဂှ်တှ်ေ ဒှ်ဟွံထေက်ပုဟ်။ ဆ္ဂး လ္ပာ်ဍေံတံ အစောံစရာဲအိုတ်အာတုဲ ဒှ်သဘဴဂၠါဲဒၟံၚ်ကလောန်အတေၚ်ရ။ သီုညးဖအိုတ်ဂှ် ဇြဟတ်ဟွံမွဲပုဟ်။ မၞိဟ်လ္ပာ်ညးတံ အာယုက် ၃၀၊ ၄၀ လ္ၚဵုတံဂှ်တှ်ေ ထံက်ဂလာန် ကုစကစဂှ် ဂၠိုၚ်ဒၟံၚ်ဏောၚ်။ လ္ပာ်ဍေံတံ အခိၚ်သၞာဲဒဴဒေါအ်ဇူတံ ဂၠိုၚ်ဒၟံၚ်ဂှ် မၞိဟ်ညးတံ ရပ်လွဟ်ဗွဲမလုပ်သၞောဝ်တုဲ ဒှ်သဘဴပ္တိတ်ကဵုလဝ် နဒဒှ်ဂကောံမွဲကီုရ။ တုဲပၠန် နဒဒှ်ဇြဟတ်ဍုၚ် ဇြဟတ်ကွာန် ပ္ဍဲကဵုအကာဲအရာစွံထောံ ညးလ္ၚဵုလ္ၚဵုတံ နဒဒှ်ပၞာန်မၚ်ကွာန်ဂှ်တှ်ေ အကြာကွာန်၊ အကြာအရာပ်တံဂှ် ပရေၚ်ထ္ၜးအဝဵုတံ သာတုဲဒှ်ကၠုၚ်မာန်ဏောၚ်” သာ်ဝွံ သ္ဂးရ။
က္ဍိုပ်သ္ကိုပ်ပၞာန်ဂှ်တှ်ေ ပ္ဍဲသၞောတ်ဂီုကၠီုညးဍုၚ်ကွာန်ဂှ် ညးဍုၚ်ကွာန်တံပါလုပ်မ္ဂး ပရေၚ်ညိၚ်ဝတ်ၜိုဟ်သြိုဟ် ကေုာံ ပရေၚ်အုပ်ဓလီုသၞောဝ်ဓဝ်တံ ခိုဟ်ကၠုၚ်တုဲ ထ္မံက်အာရုပ်ရဴ သၞောတ်ဒဳမဝ်ကရေဇြဳဗော်ဇဳဂှ်မာန်ဏောၚ် သ္ဂးရ။
ဆ္ဂး ညးဍုၚ်ကွာန်တံဂှ်တှ်ေ ဒပ်ပၞာန် စၞးဒးစဵုဒၞါညးဍုၚ်ကွာန်ဂှ် ညးဍုၚ်ကွာန်တံဏောၚ် ဒှ်သဘဴ ဒးကေလၚ်စဵုဒၞါမံၚ် ဒပ်ပၞာန်ဂှ်ရ ဒုၚ်တဲဟွံမာန်တုဲ ပ္ဍဲကၟိန်ဍုၚ် ဒပ်ပၞာန်သီအဝဵုဟွံမွဲမှဟေၚ် ၜိုဟ်သြိုဟ်ဏောၚ်ဂှ် သ္ပလဝ်တၚ်စၟတ်ရ။
နကဵုကံၚ်ဇြဳပၞာန် အပ္ဍဲပရေၚ်ပၞာန်သီအဝဵုဏံ ဒးပံက်လဝ်မုက်ပၞာန် ကုပၞာန်ပၠန်ဂတး အလုံဍုၚ်မွဲတံ ဗွဲမဂၠိုၚ်တုဲ ဒးဆောံလေၚ်လဝ် တိဍာ်ဗ္ဒိုပ်ဒပ်တံဂှ်တုဲ ပရေၚ်ဇြဟတ်လေၚ်ဒိုက်တံလေဝ် ဒးဆေၚ်ဒၟံၚ်မုက် ဇၞော်ကဵုဇြဟတ်ရ။
ဟိုတ်ဂှ်ရ ဂယိုၚ်ပ္တိုန်လဝ် သၞောဝ်ယိုက်ဂၠေၚ်လျိုၚ်ပၞာန်ညးဍုၚ်ကွာန်တံဂှ်တုဲ အခိၚ်လၟုဟ် စဵုကဵုလၟေၚ် (၅) ကဵုလဝ်တန်ဗ္တောန်ကွတ်ပၞာန်တံကီုလေဝ် ဟိုတ်နူနွံပၟိက်ကဵုဇြဟတ်တုဲ ပ္တိတ်ကၠုၚ်ဇြဟတ် သွက်ဂွံထ္မံက်ရုပ်ရဴ သၞောတ်ဂီုကၠီုညးဍုၚ်ကွာန်တံဂှ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ စနူပရေၚ်ပၞာန် ၁၀၂၇ တုဲ ဒဵုကဵုအခိၚ်လၟုဟ် အလုံဍုၚ်မွဲ ဒးဗလးလဝ်တဲ အပံၚ်ဍုၚ် ၈၀ ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram