ၜဳကလေၚ်၊ အဝ်ဂါတ် ၂၈
ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞာ် အပ္ဍဲကွာန်ဒံက်ယိတ် ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ်တုဲ ကောန်ၚာ်သၟတ်မွဲတၠ မပါလုပ် ညးဍုၚ်ကွာန်ကောန်အရာပ်ၜါတၠ ဇီုကပိုက်ကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုအဝ်ဂါတ် ၂၆ အခိၚ်လဒေါဝ်တ္ၚဲ ၜိုတ် ၁ နာဍဳဂှ် နူကဵုတမ်ဒပ်ခလရ စၟတ် ၈ ဖျေံလဝ်သ္ဇိုၚ် လ္တူဒဵုၜဳကလေၚ်ဂှ် ပေါဲဗ္တိုက်ဟွံမွဲမွဲသာ် ပန်ပှော်လဝ် လွဟ်ဇၞော် ဟွံအောန်နူကဵု ပန်မရ။
ဟိုတ်နူပရေၚ်ပန်ပှော်လွဟ်ဇၞော်တုဲ မာၚ်ဝေန်ကိုဝ်ဝ် အာယုက် ၉ သၞာံ ဒၟံၚ်ကွာန်ဒံၚ်ယိတ်ဂှ်ကဵု မၞိဟ်တြုံညးဒေသ အာယုက် ၃၀ သၞာံမွဲတၠတံ ဒးအာကဝေက်မကမ် ပ္ဍဲကဵုဇိုၚ်တုဲ ကလိဂွံလဝ်ဝပ်ရ။
အပ္ဍဲပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်ဂှ် သ္ၚိဒၟံၚ်ညးဒေသၜါမ လီုလာ်အာလဝ်တုဲ မၞိဟ်ဇီုကပိုက်ကလိဂွံဝပ်တံဂှ်တှ်ေ ပလံၚ်ဗစိုပ်လွဳကဵုလဝ် ပ္ဍဲရုၚ်ဂဥုဲၜဳကလေၚ် ကဵု ရုၚ်ဂဥုဲသဓီုဂှ် ဂွံတီကေတ်ရ။
ညးဒေသနူကဵုကွာန်ဒံၚ်ယိတ် ဒပ်ကံၚ်ဇြဳပၞာန် ပန်ပှော်လဝ်လွဟ်ဇၞော်ဂှ်ဝွံ အပ္ဍဲကာလသီအဝဵုဏံ မွဲဏှမွဲဏှဟီုဂွံ ဒးဂြိပ်ဒဴပါဲဒလေတ်ဒၟံၚ်တုဲ ပ္ဍဲကဵုဏံ ညးဍုၚ်ကွာန်ဒေသလ္ၚဵုတံဝွံ ပြံၚ်တိတ်အာဒတုဲလေဝ် နွံဒၟံၚ်ရ။
အတိုၚ်လိက်ဒုၚ်စဳရေၚ် ဇြဟတ်ရာမညဖေဝ်ဒရာခေတ်တၟိ NRFF ဂှ်မ္ဂး အပ္ဍဲဂိတုဂျူလာၚ်တုဲကၠုၚ်တေံ ပ္ဍဲတွဵုရးဍုၚ်မန် ဟိုတ်နူဒပ်ကံၚ်ဇြဳပၞာန် ဖံက်ပ္ကဝ်အခေါၚ်အရာမၞိဟ်တုဲ ကောန်အရာပ် ၂၁ တၠ ဒးဒုၚ်ဂစိုတ်လဝ်တုဲ ၃၃ တၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−CJ