မာၚ်တဝ်၊ အဝ်ဂါတ် ၂၈
အပ္ဍဲပေါဲဗ္တိုက်သီဍုၚ်မာၚ်တဝ် တွဵုရးရခေၚ်ဂှ် ရပ်ဂွံလဝ် ဂၠုဲပၞာန်ဗွဲမဂၠိုၚ်ဂၠေၚ်တုဲ ဇွသၞတံ ၁၀၀ ပြၚ်ဂှ်လေဝ် တိုပ်ကဵုလဝ် ခိုဟ်ဟ်ဂေါဝ်ဝ်ရောၚ် ဒပ်ပၞာန်ရခေၚ် AA လလောၚ်ပ္တိတ်ကဵုလဝ်သမ္တီရ။
ဒပ်ပၞာန်ရခေၚ် AA ဝွံ လုပ်မံၚ်ပေါဲဗ္တိုက် သီဍုၚ်မာၚ်တဝ်တုဲ အပ္ဍဲဍုၚ်ဂှ်လေဝ် ပေါဲဗ္တိုက်တံ က္တဵုဒှ်ဒၟံၚ် ဇၞော်ကဵုဇြဟတ်ရ။
နူဂိတုအဝ်ဂါတ် ၂၄ စဵုကဵု ၂၆ ပွိုၚ်ပိတ္ၚဲ လုပ်မံၚ်ပေါဲဗ္တိုက်သီဍုၚ်ဂှ် ဒပ်ကံၚ်ဇြဳပၞာန်ကဵု ကောန်ဒပ်ရပ်လွဟ် မူသလေမ် ၁၀၀ ပြၚ် ချိုတ်တုဲ အပ္ဍဲဍုၚ်ကဵု မ္ၚးဍုၚ်ဂှ်လေဝ် ရပ်ဂွံလဝ် ဂၠုဲပၞာန်ဗွဲမဂၠိုၚ်ဂၠေၚ်ရ။
အခိၚ်လၟုဟ် နကဵုဒပ်ပၞာန်ရခေၚ် AA မ္ၚးနူကဵုကောန်ဒပ်ကံၚ်ဇြဳပၞာန်၊ ဂကောံရပ်လွဟ် မူသလေမ် စှ်ေနူတန်ဗ္တောန်ပၞာန်ကံၚ်ဇြဳပၞာန်တုဲ ဗ္ဂပ်ကဵုလဝ်လွဟ်တံဂှ် ဒၞါဲပၞာန်ဒုၚ် ဒပ် ARSA, RSO, ARA တံ ဗွဲမဂၠိုၚ်ဂှ် သီဂွံလဝ် မွဲတုဲမွဲရောၚ် ကဵုလဝ်သမ္တီရ။
ဍုၚ်မာၚ်တဝ်ဝွံ ဟိုတ်နူပရေၚ်ဗ္တိုက်ပၞာန်ထ္ပက် ဒပ်ပၞာန်ရခေၚ်တုဲ ခြာဟွံလအ် ဒှ်ကၠုၚ်ဍုၚ် ထိၚ်ဒက်အာ က္ဍိုပ်ကၠံပေၚ်ၚ်မွဲမာန်ရဏောၚ်ဂှ် ပ္ဍဲဂိတုအဝ်ဂါတ် ၂၄ တေံ AA လလောၚ်ပ္တိတ်လဝ် တၚ်လလောၚ်တြးရ။
ဒပ်ကံၚ်ဇြဳပၞာန် ဂွံဒးဗလးတဲ ဍုၚ်မာၚ်တဝ် ချိုတ်ပၠိုတ်ဒၟံၚ်ဂှ်ဝွံ အတိုၚ်ဒ္ဂေတ်မယုတ်မာပပ်ပဳဂှ် သ္ၚိလ္တူဍုၚ်တံဂှ် စံၚ်ပလီုပလာ်တုဲ ပ္ဍဲကဵုပေါဲဗ္တိုက်တံဂှ် နဲကဲသာ်လဵုဒှ်ဒှ် ဂြိပ်တိတ်ပါဲဒလေတ်ဒၟံၚ်ဏောၚ် AA သ္ဂးရ။
ဒပ်ပၞာန်ရခေၚ် AA ဝွံ အပ္ဍဲပရေၚ်ပၞာန် စလဝ် ပ္ဍဲဒေသရခေၚ်ဂှ် သီဂွံလဝ် ဍုၚ် ၉ ဍုၚ် နူကဵုတွဵုရးရခေၚ် ပါလုပ်သီုကဵု ဍုၚ်ပလက်ဝ တွဵုရးချေၚ်ဂှ်တုဲ ကၠုၚ်စိုပ်သၞာံ ၂၀၂၅ ဏံ သွက်ဂွံသီအာ အလုံတွဵုရးရခေၚ်မွဲဂှ် ရန်တၟံလဝ်ရ။
ပရိုၚ်−သြၚ်လောန်တိုၚ်(မ်)
ဗီု−AA