နေဗျဳဒဝ်၊ အဝ်ဂါတ် ၂၈
ကံၚ်ဇြဳပၞာန် ဒးဂဗဒၟံၚ် ပရေၚ်ကျဗြံ အပ္ဍဲပေါဲဗ္တိုက်တံ အဆက်က်ဂှ်ဝွံ သွက်ဂွံဒက်ပ္တန်သၞောတ်ဂီုကၠီုတိဍာ်တုဲ စကၠုၚ်အစဳဇန် ကဵုမၞိဟ်တြုံအာယုက်လ္တူ ၃၅ တံ မၚ်ကၚ်ကေတ်ဂီုကၠီုရ။
နူကဵုဂကောံဗဟဵု ကောပ်ကာဲဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ် ကံၚ်ဇြဳပၞာန် မဒက်ပ္တန်လဝ် ပ္ဍဲဂိတုအဝ်ဂါတ် ၁၆ တေံဂှ် ပကောံဒၟံၚ်ကောန်ဂကောံဂမၠိုၚ် နူကဵုရးဒေသ၊ တွဵုရး၊ ခရိုၚ်၊ ပွိုၚ်ဍုၚ် ကေုာံ စဵုကဵုအရာပ်ကွာန်၊ ဂကောံကွာန်တံရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် ဟိုတ်နူပြဝကံၚ်ဇြဳပၞာန်တုဲ ညးဍုၚ်ကွာန်တံ ကြေပ်အာအကြာတုဲ ဒှ်သဘဴပၠာံဗ္ဇးတုဲ ကဵုလုပ်ပၞာန်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အေန်တာဗျူ− နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF
“ကၠောန်သ္ပသာ်ဏံဂှ်တှ်ေ နကဵုညးဍုၚ်ကွာန်တံ ကြေပ်အာအကြာဏောၚ်ဂှ် အဲညာတ်ရ။ ရဲဂွံထောံသ္ၚိ ဟွံပြေပြံၚ်တံလေဝ် နွံတုဲ မွဲလ္ပာ်ဂှ်လေဝ် လှေံပၠာံဗ္ဇးဏာ ကဵုလုပ်ပၞာန်ဏောၚ်။ ကံၚ်ဇြဳပၞာန်တံဂှ်တှ်ေ ညးဍုၚ်ကွာန်တံ ဒှ်မံၚ်ဒဒိုက်ဟဍေံ သွက်ဒတုဲဖဵုဍေံတံ ကဵုကၠုၚ်ဇြဟတ်ဂရိုဟ် ရပ်လွဟ် ဗွဲအနိၚ်အပိုၚ်သာ်ဏံတုဲ ဗဇဵုဒၟံၚ် ကုရဲပၠန်ဂတးတံရောၚ် အဲညာတ်ရ” သာ်ဝွံ သ္ဂးရ။
နကဵုကံၚ်ဇြဳပၞာန် ဒးပံက်လဝ်မုက်ပၞာန် ကုပၞာန်ပၠန်ဂတးတဝ်စၞေဟ် အလုံဍုၚ်မွဲတံ ဗွဲမဂၠိုၚ်တုဲ ဒးဆောံလေၚ်လဝ် တိဍာ်ဗ္ဒိုပ်ဒပ်ဂၠိုၚ်ကဵုကၠံတုဲ ဇြဟတ်ဒပ်လေၚ်ဒိုက်တံလေဝ် ဒးဆေၚ်ဒၟံၚ်မုက် ဇၞော်ကဵုဇြဟတ်ရ။
ဟိုတ်ဂှ်ရ ဂယိုၚ်ပ္တိုန်သၞောဝ်ယိုက်ဂၠေၚ်လျိုၚ်ပၞာန်တုဲ ကောန်ဒပ်စှ်ေနူတန်ဗ္တောန်ကွတ်ပၞာန်တၟိတၟိ ကော်ကေတ်လဝ် နကဵုဟိုတ်နာနာသာ်တံဂှ် စကာကၠုၚ် စဵုကဵုလုပ်ပေါဲဗ္တိုက် ပ္ဍဲကဵုမုက်ပၞာန်ဗလးတိတေံရ။
ဆ္ဂး အပ္ဍဲပေါဲဗ္တိုက်ဂှ် ပြဟ်လလုဲအာကီု၊ ဖျေံလွဟ်ကီု ကေုာံ ဂြိပ်တိတ်တံလေဝ် နွံလဝ်တုဲ ဇြဟတ်ဒပ်နွံပၟိက်တံဂှ် ဗပေၚ်ဟွံမာန်ဂှ်ရ ထ္မံက်ကၠုၚ်ရုပ်ရဴ သၞောတ်ဂီုကၠီုညးဍုၚ်ကွာန်သာ်ဏံရ။
ဥူမာၚ်ၚ်ဇြိုဲ ညးမၞုံအခေါၚ်ဟီုဂး ဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG ဂှ် ဆက်စၠောံကဵုညးဍုၚ်ကွာန် နွံပ္ဍဲကွာန်အရာပ်ဇကုတံဂှ်တုဲ ပံၚ်တောဲတုဲသွက်ဂွံတဝ်စၞေဟ်အာ သၞောတ်ဂီုကၠီုညးဍုၚ်ကွာန်ဂှ် စၞောန်ပ္ညုၚ်လဝ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အေန်တာဗျူ− ဥူမာၚ်ၚ်ဇြိုဲ ညးမၞုံအခေါၚ်ဟီုဂး ဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG
“နကဵုပိုယ်တံလေဝ် ဂကောံပကဖ ဒက်ပ္တန်လဝ် ပ္ဍဲကဵုပွိုၚ်ဍုၚ် တမ်ဒပ်နွံတံဂှ် ဆက်စၠောံကဵုညးဍုၚ်ကွာန် နူကဵုဒေသဇကု ပွိုၚ်ဍုၚ်ဇကု ကွာန်အရာပ်တံဂှ်တုဲ ပံၚ်တောဲတုဲသွက်ဂွံတဝ်စၞေဟ်အာ သၞောတ်ဂီုကၠီုညးဍုၚ်ကွာန် ကံၚ်ဇြဳပၞာန်ပကီုပရာပ်ဂှ် ကဵုလဝ်စၞောန်ရ။ နကဵုညးဍုၚ်ကွာန်ဂမၠိုၚ် အလန်ဏံရုန်ဂ္စါန်ညဳညဳသာသာတုဲ နူကဵုဘဝဍိက်ပၞာန်ဏံ သီုညးဖအိုတ် ဗၠးဂှ်ဒးဗၠးဏောၚ်။ ဟိုတ်ဂှ်ရ သီုညးဖအိုတ် သွက်ဂွံပံၚ်တောဲရေၚ်တၠုၚ်ကဵုအိုတ်ဂှ် မိက်ဂွံဖ္တိုက်ဖ္အောဝ်ရ” သာ်ဝွံ သ္ဂးရ။
ဟိုတ်ဂှ်ရ နကဵုညးဍုၚ်ကွာန်ဂမၠိုၚ် ကေတ်အဆက်ကဵု ဒပ်စဵုဒၞါညးဍုၚ်ကွာန်၊ ဂကောံဂီုကၠီုညးဍုၚ်ကွာန်၊ ဒပ်တမ်ဒပ်ဂမၠိုၚ်၊ ဂကောံဇြဟတ်ပၠန်ဂတး နွံအပ္ဍဲဒေသဇကုတံဂှ်တုဲ သွက်ဂွံကေတ်ကသပ်အိုတ်ဂှ် ညးကဵုလဝ်ကသပ်ရ။
ကံၚ်ဇြဳပၞာန်ဂှ်တှ်ေ ကုညးမပါလုပ် ပ္ဍဲဂကောံဂီုကၠီုညးဍုၚ်ကွာန်တံဂှ် ကဵုတန်ဗ္တောန်ကွတ်ပၞာန်ကီု၊ ဗ္ဂပ်ကဵုလွဟ်ကီု၊ ပလံၚ်ဗစိုပ်ထံက်ပၚ် ကေုာံ ဆုဲပြံၚ်ရီုဗၚ် ကုညးကလိဂွံဝပ်တံဒှ်တမ် ပအပ်ကဵုအာ တာလျိုၚ်တံဏံရောၚ် စဳဇန်လဝ်ရ။
သ္အာၚ်နူဂှ်ပၠန် သွက်ဂွံလုပ်ပေါဲဗ္တိုက် ဗွဲမစိုပ်တရဴမာန်ဂှ်လေဝ် ပ္ကတ်ပ္ကေၚ်ကဵု နဲဗျူဟာ မကိတ်ညဳကဵု အကာဲအရာတံကီု၊ ကောန်ဒပ်တံဂှ် သွက်ဂွံရပ်စပ်စကာအာ ပ္ဍဲကဵုတာလျိုၚ်ဗလးမုက်ပၞာန်၊ တာလျိုၚ်စဵုဒၞါ ကေုာံ ဂီုကၠီုတိဍာ်တံ မဒှ်ရ။
နဲနဂါဂှ်တှ်ေ ယဝ်ရဂကောံဂီုကၠီုညးဍုၚ်ကွာန်ကဵု ဂကောံရပ်လွဟ်ကောန်ဍုၚ်အရၚ်တံ ဒှ်ကၠုၚ်ပေါဲဗ္တိုက်ဆေၚ်မုက်မ္ဂး စွံသတိဗွဲတၟေၚ်တုဲ ဒးရေၚ်တၠုၚ်အာဏောၚ်ဂှ် သ္ဂးရ။
အေန်တာဗျူ− နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF
“ ဂကောံဂီုကၠီုညးဍုၚ်ကွာန် ကံၚ်ဇြဳပၞာန် စဳဇန်ဒၟံၚ်သာ်ဏံဂှ် ယဝ်ရဒှ်ကၠုၚ်မ္ဂး နကဵုဂကောံရပ်လွဟ်ပိုယ်တံလေဝ် ပေါဲဗ္တိုက်ဆေၚ်မုက် ကုဂကောံတံဏံ ဒှ်ကၠုၚ်မ္ဂး စွံသတိဗွဲတၟေၚ်တုဲ ဒးရေၚ်တၠုၚ်အာဏောၚ်ဂှ် အဲညာတ်ရ။ မုဟိုတ်ရောဟီုတှ်ေ ညးဍုၚ်ကွာန်တံဏံဝွံ ဆန္ဒညးတံ ဟွံပါမွဲသာ် ကဵုရပ်လွဟ်ဗွဲအနိၚ်အပိုၚ် ကဵုလုပ်ဒၟံၚ်ပေါဲဗ္တိုက်ဂှ်ရ စၞးဒးၚးတးပသောၚ်အာ ညးဍုၚ်ကွာန်တံဏံဂှ် ဇြဟတ်မၞိဟ်တံဏံ ညံၚ်ဂွံဒှ်ဖဵု သွက်ပၠန်ဂတး မွဲနဲမွဲဗီုဂှ် ချူခၞံအစဳဇန်တုဲမှ ဒးလုပ်ပၞာန်ဏောၚ်ဂှ် အဲညာတ်ရ” သာ်ဝွံ သ္ဂးရ။
က္ဍိုပ်သ္ကိုပ်ပၞာန်ဂှ်တှ်ေ ကၟိန်ဍုၚ် ညံၚ်ဂွံကလေၚ်စိုပ် အကာဲအရာမူလတေံဂှ် အရာမကၠောန်ထေက်တံဂှ် ကၠောန်အာဏောၚ်တုဲ ထ္မံက်အာရုပ်ရဴ သၞောတ်ဂီုကၠီုညးဍုၚ်ကွာန်တံ ပါလုပ်ဂှ်ဏောၚ် ဟီုလဝ်ရ။
အတိုၚ်ဂကောံသုတေသန ပရေၚ်ဍုၚ်ကွာန်၊ ပရေၚ်ပၞာန် မဗၠးၜးတံ တော်ခယျလဝ်ဂှ်မ္ဂး နကဵုကံၚ်ဇြဳပၞာန် ဌာန်ဂအုပ်ပၞာန်ရးမွဲမပါလုပ် ဒးဆောံလေၚ်လဝ် ဗ္ဒိုပ်ဒပ် ကေုာံ ဌာန်ဂအုပ်တမ်ဒပ်တံ ၂၅၀၀ ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram