မတ်မလီု၊ အဝ်ဂါတ် ၂၈
ပ္ဍဲတွဵုရးဍုၚ်မန် ဟိုတ်နူဍာ်ဇၞော်တုဲ သြောံဒးလီုလာ်ဇီုကပိုက်အာတံဂှ် ဒဒှ်ရထံက်ပၚ်ကဵုလဝ်မဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ကီုလေဝ် နတဲဏံ ကလိဂွံအရီုဗၚ်ဟွံမွဲပုဟ်ဂှ် သၟာဗ္ၚဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲရာသဳကသီုသာ်ဏံ ဟိုတ်နူဍာ်ဇၞော်ဍာ်ဗၠိုက်တုဲ ခံက်သြောံ ဒးလီုအာတံဂှ် နူကဵုသ္ကိုပ်ဝန်ဇၞော် တွဵုရးဍုၚ်မန် ဥူအံၚ်ကျဳတုၚ် သ္ကိုပ်သ္ကတုဲ ပ္ဍဲဂိတုအဝ်ဂါတ် ၂၆ တေံ ဒဒှ်ရထံက်ပၚ်ကဵုလဝ်မ ပ္ဍဲၝောံခန်တွဵုရးဍုၚ်မန် ဍုၚ်မတ်မလီုဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
ဆ္ဂး သွက်ပွိုၚ်ဍုၚ် ဍာ်ဇၞော်ဍာ်ဗၠိုက်လဝ်တံဂှ် ထံက်ပၚ်ကဵုလဝ်မ မူစိ၊ ထံက်ပၚ်ကဵုအာ နဗီုပြၚ်သာ်လဵုရောဟီုဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ် ဟွံမွဲရ။
ဟိုတ်နူဍာ်ဇၞော်ဍာ်ဗၠိုက်တုဲ သၟာဗ္ၚနူကဵုပွိုၚ်ဍုၚ်ပံၚ်မွဲတၠ ဒးဆောံလေၚ်အာလဝ်ဗ္ၚ ဟွံအောန်နူကဵု ၁၀ ဨကဂှ် လ္ပာ်ကံၚ်ဇြဳပၞာန် ၜိုန်လလောၚ်ပ္တိတ်လဝ် ဒဒှ်ရထံက်ပၚ်ကဵုလဝ်မသြောံတံကီုလေဝ် နတဲဏံ ထံက်ပၚ်ကဵု ဟွံမွဲပုဟ်ဂှ် ဟီုရ။
အေန်တာဗျူ− သၟာဗ္ၚမွဲတၠ နူပွိုၚ်ဍုၚ်ပံၚ်
“လ္ပာ်ပိုယ်တံဂှ်တှ်ေ ရမျာၚ်ထံက်ပၚ်ကဵုမတံဂှ် ဟွံမိၚ်ပုဟ်။ ကံက်စရၚ်တံမုတံလေဝ် ဟွံမိၚ်ဏီပုဟ်။ ထံက်ပၚ်ကဵုမတံ မုတံလေဝ် ဟွံမွဲပုဟ်။ ဟွံမွဲဟဂှ်ရ” သာ်ဝွံ သ္ဂးရ။
လ္ပာ်ကံၚ်ဇြဳပၞာန်ဂှ် အခန်ကၞာထံက်ပၚ်မသြောံတံဂှ် ကၠောန်လဝ်ကဆံၚ်တွဵုရးဏောၚ် သ္ဂးကီုလေဝ် သၟာဗ္ၚနူအပ္ဍဲဒေသဗွဲမဂၠိုၚ် ဟွံဂွံတီကေတ်တုဲ သၟာဗ္ၚ ဒးလီုအာလဝ် ဟိုတ်နူဍာ်ဇၞော်ဍာ်ဗၠိုက်တံဂှ်လေဝ် ဟွံဂွံမွဲသာ် ဒှ်ဒၟံၚ်ဗီုပြၚ် ကော်ကဵုလဝ် သၟာဗ္ၚ ညးမစုက်ကဵုဍေံတံရဏောၚ်ဂှ် သၟာဗ္ၚဂမၠိုၚ် ပါ်ပါဲလဝ်ရ။
သၟာဗ္ၚမွဲတၠ နူကဵုပွိုၚ်ဍုၚ်ၜဳကလေၚ်ဂှ်လေဝ် ကၠာတေံ ခံက်သြောံတံ ဍာ်ဗၠိုက်ဍာ်ဇၞော်တုဲ ဒးလီုအာမ္ဂး လက်ထက်အလဵုအသဳတုဲကၠုၚ်တေံ ထံက်ပၚ်ကဵုတံ နွံလဝ်ကီုလေဝ် လက်ထက်ကံၚ်ဇြဳပၞာန်ဏံ စပ်ကဵုဝါဗ္ၚ ဒးလီုလာ်အာတံဂှ်တုဲ ဟွံသ္ပဂရုပုဟ်ဂှ် ဟီုရ။
အေန်တာဗျူ− သၟာဗ္ၚမွဲတၠ နူပွိုၚ်ဍုၚ်ၜဳကလေၚ်
“ ဒးဟီုသောၚ်ၚ်မ္ဂး လက်ထက်အလဵုအသဳညးဍုၚ်ကွာန်တေံ ဗီုတံဏံဒှ်တှ်ေ ရီုဗၚ်ကဵုတံ သွံကဵုမတံ ၜိုတ်ညးတံသ္ပမာန် ထံက်ပၚ်ကဵုခရိတ်သ္ဂောံကလေၚ်ပ္တန်ပ္တူတံရ၊ အခိၚ်လၟုဟ်ဂှ်တှ်ေ မတံဏံဂှ် ကံၚ်ဇြဳပၞာန် ဟွံသ္ပစၟတ်သမ္တီပုဟ်။ သၟာဗ္ၚတံ ဒှ်ဒၟံၚ်ဒဒိုက်ကဵုမ ကွေံကွေံဏောၚ်။ အခိၚ်ဍာ်ဇၞော်ဗီုဏံတှ်ေ ဂွံရံၚ်အလဵုရော။ ဟွံသ္ပဂရု ဟဂှ်ရ” သာ်ဝွံ သ္ဂးရ။
အခိၚ်လၟုဟ် ဍာ်ဇၞော်တုဲ သြောံဒးလီုအာတံဂှ် သၟာဗ္ၚဂမၠိုၚ် ဗွဲမဂတာပ်အခိၚ် ညံၚ်ဂွံတုဲဒှ်ဂှ် ဗီုညးကဵုညး ဂလေံကေတ်တုဲ ဒးတဵုလွဳဒၟံၚ်တံ နွံတုဲ နကဵုသၟာဗ္ၚလ္ၚဵုတံဂှ်လေဝ် အကာဲအရာကလေၚ်တဵုလွဳဟွံမာန်တံ က္တဵုဒှ်ဒၟံၚ်ရ။
ဆ္ဂး သၟာဗ္ၚဗွဲမဂၠိုၚ်ဝွံ သြောံဍာ်ဇၞော်ဍာ်ဗၠိုက်တုဲ လီုအာတံဂှ် သွက်ဂွံကလေၚ်တဵုလွဳဂှ် မွဲဨကမ္ဂး ခရိုၚ်အိုတ်နာနာ ဂၠိုၚ်ကဵုစှော်ကိုဋ် ပါလုပ်သီုကဵုခရိုတ်ပရေၚ်ပလံၚ်ဗစိုပ်၊ ကပေါတ်တမ်ရိုဟ်၊ မသြောံတံဂှ်တုဲ ကလေၚ်တဵုလွဳညးသ္ကအ် ဟွံမွဲရပုဟ်ဂှ် ဂွံတီကေတ်ရ။
ပ္ဍဲတွဵုရးဍုၚ်မန် စနူဂိတုဂျူလာၚ် သတ္တာဟလက္ကရဴအိုတ်တုဲကၠုၚ်တေံတုဲ ဗြဲဂူလဝ် ဟွံပိုတ်သ္ကုတ်တုဲ ဍာ်ဇၞော်ဍာ်ကလိုပ် က္တဵုဒှ်လဝ်ဂှ်ရ နူကဵုပွိုၚ်ဍုၚ်ၜဳကလေၚ်၊ သဓီု၊ ပံၚ်၊ ကျာ်မြဟ် ကေုာံ ပွိုၚ်ဍုၚ်မုဟ်ဍုၚ်တံဂှ် ဨကတဵုလွဳသြောံ ဂၠိုၚ်ကဵုလ္ၚီ ဒးလီုလာ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI