ဇြပ်ဗု၊ အဝ်ဂါတ် ၂၉
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် အကြာသုသာန်ဝါဒဝ် ကေုာံ ကွာန်ဗ္ဒိုပ်ဇၞော် ပွိုၚ်ဍုၚ်ဇြပ်ဗု တွဵုရးဍုၚ်မန်ဂှ် ကောန်ဒပ်ကံၚ်ဇြဳပၞာန်ပိတၠ ချိုတ်အာလဝ်ရောၚ် ကရောၚ်ပၞာန်ဒံၚ်ညဵု ဒပ်ပၞာန်ဗၠးၜးညးဍုၚ်ကွာန် လလောၚ်ပ္တိတ်လဝ်ရ။
တုဲကၠုၚ် ပ္ဍဲဂိတုအဝ်ဂါတ် ၂၆ တေံ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နကဵုဇြဟတ် ၆၀ ပြၚ် နူကဵုတမ်ဒပ်ဝါကလိ ပွိုၚ်ဍုၚ်ဇြပ်ဗုဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ အာစိုပ်မၚ်ဗ္တိုက်လဝ်ရ။
ဟိုတ်နူပရေၚ်ဗ္တိုက်ဏံတုဲ ပရေၚ်ပန်ပှော်ၜါလ္ပာ် က္တဵုဒှ်လဝ် ပွိုၚ် ၁၅ မိနေတ်တုဲ လ္ပာ်ကံၚ်ဇြဳပၞာန် ဇီုကပိုက်ချိုတ်အာတံ နွံလဝ်ရ။
ဟိုတ်နူဒးဒုၚ်မၚ်ဗ္တိုက်ဒၟံၚ်တုဲ ကောန်ဒပ်ကံၚ်ဇြဳပၞာန် ပိတၠ ချိုတ်တုဲ ညးဇီုကပိုက်ကလိဂွံဝပ်တံလေဝ် နွံဒၟံၚ်ရောၚ် ညးတာလျိုၚ်ကရောၚ်ပၞာန်ဒံၚ်ညဵုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကြဴနူဒးဒုၚ်ဗ္တိုက်တုဲဂှ် ကရောၚ်ပၞာန်ဂှ်ဝွံ ဆက်ချဳဒရာၚ်ဒၟံၚ် ဗ္ဒါဲကွာန်ယျေဝ်တဂေါန်၊ ကွာန်ဝါဒဝ် ကေုာံ ကွာန်ဗ္ဒိုပ်ဇၞော်တံဂှ်ကီုလေဝ် ဒဵုကဵုဂိတုအဝ်ဂါတ် ၂၈ အခိၚ်နူဂယးဂှ် ပေါဲဗ္တိုက်ၜါလ္ပာ် က္တဵုဒှ်လဝ် ဟွံမွဲဏီပုဟ်ဂှ် ဂွံတီကေတ်ရ။
ပရေၚ်ဗ္တိုက်ဏံဂှ် ကရောၚ်ပၞာန်ဒံၚ်ညဵု ကေုာံ တမ်ဒပ် ၂၇ ဒပ်ပၞာန်ဗၠးၜးကောန်ဂကူကရေၚ် KNLA တံ ပံၚ်တောဲဗ္တိုက်လဝ်တုဲ ဒပ်ပံၚ်ကောံပၠန်ဂတးတံ ဇီုကပိုက်ဒးဟွံမွဲမွဲသာ် ဆုတ်ကလေၚ်မာန်လဝ်ရောၚ် သ္ဂးရ။
အခိၚ်လၟုဟ် ပ္ဍဲကဵုကွာန်ဂမၠိုၚ် နူကဵုသ္ကုတ်ဂၠံၚ်ရေဝ်−ဇြပ်ဗုဂှ် ဒပ်ကံၚ်ဇြဳပၞာန် ထ္ပက်ကရောၚ်ပၞာန်လုပ်စိုပ်ချဳဒရာၚ်ဒၟံၚ်တုဲ ညးဒေသဂမၠိုၚ်ဝွံ ဟွံဂံၚ်အာကၠုၚ် အပ္ဍဲကၠအ်ဂူဝါတံအိုတ် ဒှ်ဒၟံၚ်ဂှ် ဂွံတီကေတ်ရ။
တုဲကၠုၚ် ပ္ဍဲဂိတုအဝ်ဂါတ် ၂၀ တေံဂှ်လေဝ် ကရောၚ်ပၞာန်ကံၚ်ဇြဳပၞာန် ဖျေံလဝ်ဗ္ဒိုပ် ဗ္ဒါဲဘာလကျာ် (တောၚ်ပေါက်) ကွာန်တၟိယျေဝ်တဂေါန်ဂှ်ဂှ် ဒးဒုၚ်ဗ္တိုက်ကဵုဒရုၚ်တုဲ ၜါတၠချိုတ်တုဲ ပိတၠ ကလိဂွံလဝ်ဝပ်ရ။
ဒပ်ကံၚ်ဇြဳပၞာန်ဝွံ စနူဂိတုဂျူလာၚ် သတ္တာဟလက္ကရဴအိုတ် တုဲကၠုၚ်တေံတုဲ သွက်ဂွံကလေၚ်ထိၚ်ဒက် သ္ကုတ်ဂၠံၚ်ရေဝ်−ဇြပ်ဗုဂှ် ထ္ပက်ကရောၚ်ပၞာန်ကီု၊ ဖျေံဗ္ဒိုပ်မံၚ်စံၚ်တံကီု ကၠောန်သ္ပဒၟံၚ်ဂှ်ရ ပရေၚ်ပၞာန်ၜါလ္ပာ် သာကြံၚ်မ္ၚိုဟ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန်ဒံၚ်ညဵု