ပဠဝ်၊ အဝ်ဂါတ် ၂၉
ဒပ်ကံၚ်ဇြဳပၞာန် လုပ်စိုပ်ဖျေံလဝ်ဒပ် ပ္ဍဲကွာန်ယှာတ်ပုံကဵု ဗ္ဒိုပ်ကွာန် မဳလံၚ်ချံၚ် ပွိုၚ်ဍုၚ်ပဠဝ် ရးတၞၚ်သဳဂှ် ဒးဒုၚ်ဗ္တိုက်ကဵုဒရုၚ်တုဲ ကောန်ဒပ်ကံၚ်ဇြဳပၞာန်ပိတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်တမ်ဒပ် စၟတ် ၁ ခရိုၚ်ဗိက်ရ။
ပ္ဍဲကဵုကွာန်ယှာတ်ပုံ ကေုာံ ဗ္ဒိုပ်ဒပ် ကွာန်မဳလံၚ်ချံၚ်ဂှ် ဒပ်ကံၚ်ဇြဳပၞာန် ကၠုၚ်စိုပ်ဖျေံလဝ်ဒပ် နကဵုဇြဟတ် ဗ္ဒါဲ ၆၀ ဂှ် ပ္ဍဲဂိတုအဝ်ဂါတ် ၂၇ တေံ ဒပ်ပံၚ်ကောံစဵုဒၞါညးဍုၚ်ကွာန်တံ ထောံမခတိုဟ်ဒရုၚ်တုဲ ဗ္တိုက်လဝ်ရ။
ဟိုတ်နူဒပ်ပံၚ်ကောံစဵုဒၞါညးဍုၚ်ကွာန်တံ ထောံမခတိုဟ်ဗ္တိုက်တံဂှ်တုဲ ပ္ဍဲဗ္ဒိုပ်ဒပ်ကွာန်မဳလံၚ်ချံၚ်ဂှ် ကောန်ဒပ်ကံၚ်ဇြဳပၞာန်ပိတၠ ဇီုကပိုက်ကလိဂွံလဝ်ဝပ်ရောၚ် ညးဒုၚ်တာလျိုၚ် လလောၚ်ပရိုၚ် တမ်ဒပ် ၁ ခရိုၚ်ဗိက် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပရေၚ်ဗ္တိုက်ဏံဂှ် နူကဵုဒပ်ကံၚ်ဇြဳပၞာန် ဖျေံလဝ်ဗ္ဒိုပ် ပ္ဍဲကွာန်ယှာတ်ပုံကဵု ဗ္ဒိုပ်ဒပ်ကွာန်မဳလံၚ်ချံၚ်တံ ပန်ပှော်လဝ် လွဟ်ဇၞော်၊ လွဟ်ဍောတ်တံ ကြာန်န်ကီုလေဝ် လ္ပာ်ဒပ်ပံၚ်ကောံ ဒပ်စဵုဒၞါညးဍုၚ်ကွာန်တံ ဇီုကပိုက်ဒးဟွံမွဲပုဟ်ဂှ် သ္ဂးရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ နကဵုဇြဟတ်ဗွဲမဂၠိုၚ်ဂၠေၚ် မွဲဏှမွဲဏှ ထ္ပက်ကရောၚ်ပၞာန် လုပ်စိုပ်ဖျေံဗ္ဒိုပ် ပ္ဍဲကွာန်ယှာတ်ပုံတံတုဲ မံၚ်စံၚ်တံ နွံဒၟံၚ်ဂှ် ဂွံတီကေတ် အတိုၚ်ဂလာန်ဇြဟတ်ပၠန်ဂတးတံရ။
တ္ၚဲဏံ ပယျာံနူဂယးပြဟ်ဂှ်လေဝ် ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲကွာန်ယှာတ်ပုံကဵု အကြာဒပ်ပံၚ်ကောံ စဵုဒၞါညးဍုၚ်ကွာန်တံဂှ် ပေါဲဗ္တိုက်ၜါလ္ပာ်တံ က္တဵုဒှ်ဒၟံၚ်ရောၚ် သ္ဂးရ။
တုဲကၠုၚ် ပ္ဍဲဂိတုအဝ်ဂါတ် ၁၇ ကဵု ၂၆ တေံဂှ်လေဝ် ကုန်ဗ္ဒိုပ်တာဝါတိုၚ် ပရေၚ်ဆက်စၠောံကံၚ်ဇြဳပၞာန် နွံလ္တူဒဵုအံၚ်သာယာ ဗ္ဒါဲကွာန်မကျဳကုန် ပွိုၚ်ဍုၚ်ပဠဝ်ဂှ် ဒးဒုၚ်ဗ္တိုက်ကဵုဒရုၚ်တုဲ ကောန်ဒပ်ကံၚ်ဇြဳပၞာန်ၜါတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Myeik PDF