သက်ကိုၚ်၊ အဝ်ဂါတ် ၂၉
သၞာံ ၂၀၂၄ နူဂိတုဂျာန္နဝါရဳ စဵုကဵုဂိတုဂျူလာၚ် ဟိုတ်နူလၟေၚ်ဒဒှ်ပရေၚ်ပကီုပရာပ်တံတုဲ ပ္ဍဲရးသက်ကိုၚ်ဂှ် ကောန်အရာပ် ဒးချိုတ်အာလဝ် ၄၉၉ တၠတုဲ ၄၆၀ ပြၚ် ဇီုကပိုက်ကလိဂွံလဝ်ဝပ်ရောၚ် လိက်ဒုၚ်စဳရေၚ် ဂကောံသုတေသန Data For Myanmar ထ္မံက်ထ္ၜးလဝ်ရ။
ပ္ဍဲကဵုမဒးချိုတ်အာလဝ် ၉၅ တၟံကၠံဂှ်ဝွံ စွံပွန်ဂစိုတ်ဂယိုၚ်လဝ် ကောန်အရာပ်တံကီု၊ ဟိုတ်နူပရေၚ်ဗ္တိုက်ပၞာန်ကျာ၊ လွဟ်ဇၞော်၊ ဒရုၚ်၊ မာၚ်တံ မဒှ်တုဲ ပ္ဍဲကဵုဏံ ညးဗြဴ ကေုာံ ကောန်ၚာ်သၟတ် ၃၁ တၟံကၠံ ပါလုပ်ရ။
ဟိုတ်နူကောန်ဒပ်ကံၚ်ဇြဳပၞာန်တံတုဲ ၄၂၈ တၠ၊ ဟိုတ်နူဂကောံပၠန်ဂတးတံတုဲ ၂၀ တၠ၊ ဟိုတ်နူဂကောံပျူသဝ်ထဳတံတုဲ ၉ တၠ ကေုာံ ဟိုတ်နူဒပ်ကူကဳတံတုဲ ၄ တၠ ဒးချိုတ်အာလဝ်ရောၚ် လိက်ဒုၚ်စဳရေၚ်ဂှ် သ္ဂးရ။
သ္အာၚ်နူဂှ်ပၠန် အခိၚ်ပေါဲဗ္တိုက်က္တဵုဒှ်ဒၟံၚ်ဂှ် ဒးချိုတ်အာကီု၊ ဟိုတ်နူလၟေၚ်ဒဒှ် သ္ပဒတန်ကောန်အရာပ်ရေၚ်သ္ကအ်၊ ဂိုဏ်ရာဇဝတ် ကေုာံ မၞိဟ်ကလိလောန်တၞဟ်ဟ်တံ ဟွံဂွံတုဲ ညးချိုတ်အာလဝ်ဂှ် ၃၈ တၠ နွံလဝ်ရ။
ပ္ဍဲကဵုရးသက်ကိုၚ်ဂှ်တှ်ေ ခရိုၚ်ကလေဝ်၊ ခရိုၚ်မုၚ်ယဲ၊ ခရိုၚ်ယှိုဲဗိုဝ် ကေုာံ ခရိုၚ်သက်ကိုၚ်တံဂှ်တှ်ေ ပရေၚ်ကောန်အရာပ်ချိုတ်တံ ဂၠိုၚ်နူကဵုခရိုၚ်တၞဟ်ဟ်တံ တီတီတုဲ အပံၚ်ဖအိုတ် ၃၄၉ တၠ နွံဒၟံၚ်ဂှ် Data For Myanmar ထ္မံက်ထ္ၜးလဝ်ရ။
အတိုၚ်တၚ်လ္ၚတ်စၟဳတ် ပါလုပ် ပ္ဍဲလိက်ဒုၚ်စဳရေၚ်ဂှ်မ္ဂး အပ္ဍဲရးသက်ကိုၚ်ဂှ် ရံၚ်ကေတ်ပရေၚ်ကောန်အရာပ်ချိုတ် လၟေၚ်ဂိတုတံဂှ်မ္ဂး ဟိုတ်နူပွပကီုပရာပ်တံတုဲ ကောန်အရာပ်ဒးချိုတ် လၟေၚ်ဂိတု ၇၁ တၠကဵု မၞိဟ်ကလိဂွံဝပ် ၆၆ တၠ နွံဒၟံၚ်ရ။
ဟိုတ်ဂှ်ရ ဂကောံရပ်လွဟ်တံသီုဖအိုတ် စွံပွန်ဗ္တိုက်ကဵု ကောန်အရာပ်တံတုဲ သွက်ဂွံဒေါအ်ဒေၚ်ကဵု ပရေၚ်ဗ္တိုက်တံ ဗွဲမပြဟ်ဂှ်ကီု၊ ၜိုဟ်သၟဟ်အစောံ သွက်ဂွံဒ္ဂေတ်ဗက် ဒ္ဂေတ်ဝတ်ပရေၚ်ပၞာန်တံအိုတ်ဂှ် Data for Myanmar ကဵုလဝ်ကသပ်ရ။
ပရိုၚ်−သြၚ်လောန်တိုၚ်(မ်)
ဗီု−ဌာန်လလောၚ်ပရိုၚ်ခေန်ဥူ