မတ်မလီု၊ အဝ်ဂါတ် ၂၉
ၜဲဇၞော်ကဵု ၜဲသဝ်ယျာ တိတ်နူတွဵုရးဍုၚ်မန်တံဝွံ အပ္ဍဲဗွဝ်ဖျာဂှ် ဟိုတ်နူဇြဟတ်ရာန် သၠုၚ်တိုန်ကၠုၚ်ဒၟံၚ်တုဲ ၚုဟ်သၠုၚ်တိုန်ကၠုၚ်ဒၟံၚ် အဆက်က်ရောၚ် သၟာဗၞိက်ၜဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲဗွဝ်ဖျာၜဲဂှ်တှ်ေ ဍုၚ်အိန္ဒိယ ဗ္ကန်ပ္တိုန်ဒၟံၚ် ၜဲဇၞော်တံ ဂၠိုၚ်ဒၟံၚ်တုဲ ၜဲသဝ်ယျာတံဂှ်တှ်ေ ရုၚ်စက်ကၠောန်ပ္တိတ်စၞ သွက်ပရေၚ်လွဳတိရစ္ဆာန်အပ္ဍဲဒေသတံ ရာန်ကေတ်ဂၠိုၚ်ဒၟံၚ်တုဲ ၚုဟ်သၠုၚ်တိုန်ကၠုၚ်ရ။
ၚုဟ်ၜဲသဝ်ယျာဂှ်ဝွံ အပ္ဍဲဂိတုအဝ်ဂါတ်ဏံ မွဲန ၂၀ ပသာ ၚုဟ်နွံကၠုၚ် မွဲကိုဋ်ဒ္ကေဝ်ပြၚ်ဂှ် ၚုဟ်သၠုၚ်တိုန်ကၠုၚ် စဵုကဵုဗ္ဒါဲမွဲကိုဋ်ပိဠက်ဒ္ကေဝ်တုဲ ၜဲသဝ်ယျာဂှ်လေဝ် မွဲန နူကဵုမွဲကိုဋ်မွဲဠက်ဒ္ကေဝ်ဂှ် ၚုဟ်ထၠာ်တိုန်ကၠုၚ် စဵုကဵုမွဲကိုဋ်ပန်ဠက်ဒ္ကေဝ်ပြၚ်ရ။
သၟာဗၞိက်ၜဲမွဲတၠဂှ်တှ်ေ ၚုဟ်ၜဲသဝ်ယျာ ဂွံစိုပ်ကၠုၚ်သၠုၚ်အိုတ်ဂှ်ဝွံ စၞးဒးပၠောပ်ပ္တိုန်နၚ်ၜဲ နူကဵုဍုၚ်သ္အာၚ်တံ သွက်စၞပရေၚ်လွဳတိရစ္ဆာန်တံဂှ် ရာန်သုၚ်စောဲကၠုၚ် ၜဲအပ္ဍဲဍုၚ်တံတုဲ ဒှ်လဝ်ရောၚ် ဟီုရ။
“ၜဲသဝ်ယျာဂှ်တှ်ေ မွဲအာယုက်ပိုယ်သွံမံၚ်ၜဲဏံဟီုတှ်ေ ညအ်ဒှ်ၚုဟ်သၠုၚ်အိုတ် ဟီုဂွံရ။ ၜဲသဝ်ယျာတံဏံဂှ်တှ်ေ ကၠာတေံ မွဲပသာ ၃၀၀၀ လၟုဟ် ၇၀၀၀ ပြၚ်အာယျ။ ဟိုတ်ဂွံဒှ်ဂှ်တှ်ေ ကၠာတေံၜဲဍုၚ်ပိုယ်တံ ရပ်စပ်ဒၟံၚ် ပ္ဍဲကဵုစၞစာၚ်တံဂှ် ကၠုၚ်နူဍုၚ်သ္အာၚ်ဏောၚ်။ ၜဲကၠုၚ်နူဍုၚ်သ္အာၚ် အရိုဟ်တွဵုတွဵုဂှ် မကၠုၚ်နူဍုၚ်သ္အာၚ်ဂှ် က္ဍၚ်တုဲ ဟွံရပ်စပ်တုဲ ၜဲသဝ်ယျာအပ္ဍဲဍုၚ်ဇကုတံဂှ် ဗုတ်နှဴထောံတုဲ သုၚ်စောဲဒၟံၚ်ဂှ်ရ ၚုဟ်ၜဲသဝ်ယျာဂှ်တှ်ေ အဏံ ဒှ်ၚုဟ်သၠုၚ်အိုတ်ရဏောၚ် ဟီုဂွံရ” သာ်ဝွံ ဟီုရ။
ဇြဟတ်ရာန်ၜဲသဝ်ယျာတံ သၠုၚ်တိုန်ကၠုၚ်တုဲ ၜဲဇၞော်ဂှ်လေဝ် ပ္ဍဲဍုၚ်အိန္ဒိယ လဗိုတ်ကျာလုပ်တုဲ ခံက်တဵုလွဳဂမၠိုၚ် လီုလာ်အာလဝ်ဂှ်ရ ပရေၚ်ရာန်ဂၠိုၚ်ကၠုၚ်ကီုလေဝ် ၜဲဇၞော်သှ်ဂှ်ေ အောန်ကၠုၚ်တုဲ ဂၠိုၚ်ၚ်ပလံၚ်ဟွံမာန်ရပုဟ်ဂှ် သၟာဗၞိက်ၜဲတံ ဟီုအိုတ်ရ။
ၜဲဇၞော်ကဵု ၜဲသဝ်ယျာ ၚုဟ်တိုန်ကၠုၚ်ကီုလေဝ် ဂကူၜဲတၞဟ်ဟ်တံဂှ်တှ်ေ ၚုဟ်ညိၚ်ဒၟံၚ်တုဲ ပရေၚ်သွံရာန်လေဝ် ညိၚ်ဒၟံၚ်ဂှ် ဂွံတီကေတ် ဇရေၚ်သၟာဗၞိက်ၜဲတံရ။
တွဵုရးဍုၚ်မန်ဝွံ အဓိကတဵုလွဳဒၟံၚ် ၜဲဇၞော်၊ ၜဲသ္ၚေက်၊ ၜဲသဝ်ယျာ ကေုာံ ၜဲသ္ၚေက် (ယှိုဲဝါ) တံတုဲ တိဨကတဵုလွဳဂှ်တှ်ေ မွဲကိုဋ်ထပှ်ဠက် ဨကပြၚ် နွံတုဲ လၟေၚ်သၞာံ လျိုၚ်တာန်ၜဲနာနာ တိတ်ဒၟံၚ် ပွဳပွူၜါဠက်ပြၚ်ရ။
ၜဲတိတ်ကၠုၚ်တံဂှ် အဓိကပလံၚ်ပ္တိုန်သွံတြးဒၟံၚ် ကုဍုၚ်အိန္ဒိယတုဲ ဍုၚ်သှ်ေသၟေဟ် ဍုၚ်ကြုက်၊ သေံ၊ သေန်ကပေါဝ်၊ နဳပဝ် ကေုာံ ဍုၚ်ပါကေဿတာန်တံဂှ်လေဝ် တန်တဴကဵုဂကူၜဲ ဗ္ကန်နၚ်တံဂှ်တုဲ ပလံၚ်ပ္တိုန်ဒၟံၚ်အိုတ်ရ။
ပရိုၚ်−သြၚ်လောန်တိုၚ်(မ်)