ရေဝ်၊ အဝ်ဂါတ် ၃၀
ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲကွာန်ကျာ်၊ ကျာ်ပိမွဲဇံၚ် ကရပ်ကွာန်တၟအ်ကၞေၚ် ပွိုၚ်ဍုၚ်ရေဝ် တွဵုရးဍုၚ်မန်ဂှ် ဒးဒုၚ်ဗ္တိုက်တုဲ ဇီုကပိုက်ချိုတ်အာတံ နွံဒၟံၚ်ရောၚ် ညးမၞုံအခေါၚ်ဟီုဂး ဗော်ဍုၚ်မန်တၟိ AD ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် လုပ်စိုပ်ဖျေံဒၟံၚ်ဒပ် အပ္ဍဲကွာန်ကျာ် နကဵုဇြဟတ်ဒပ် ၂၀ ပြၚ်ဂှ် ပ္ဍဲဂိတုအဝ်ဂါတ် ၂၉ အခိၚ်နူဂယး ၜိုတ် ၈ နာဍဳဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ အာစိုပ်ဗ္တိုက်လဝ်ရ။
ဟိုတ်နူပရေၚ်ဗ္တိုက်ဏံတုဲ ပရေၚ်ပန်ပှော်ၜါလ္ပာ် က္တဵုဒှ်လဝ် ပွိုၚ်ပိစှော်မိနေတ်တုဲ ဒပ်အမၠံက်ကံၚ်ဇြဳပၞာန် ဖျေံသ္ဇိုၚ်ဍုၚ်ရေဝ်ဂှ် ဘိုၚ်ပန်ပှော်နၚ် လွဟ်ဇၞော်တံ နွံလဝ်ရ။
အပ္ဍဲပေါဲဗ္တိုက်ၜါလ္ပာ်ဏံဂှ် လၟိဟ်လ္ပာ်ကံၚ်ဇြဳပၞာန် ဇီုကပိုက်ချိုတ်အာ ချိုတ်တ်ပၠိုတ်တ်ဂှ် ဂၠိုက်ဂၠါဲဒၟံၚ်ရောၚ် ညးမၞုံအခေါၚ်ဟီုဂး ဗော်ဍုၚ်မန်တၟိဗ္တိုက်သရိုဟ်တၠအဝဵုပၞာန် NMSP AD နာဲဗညာမန် ဟီုရ။
ကြဴနူပေါဲဗ္တိုက်ဂှ်တုဲ အရီုဗၚ်ပၞာန် နူကဵုတမ်ဒပ်ခလရ စၟတ် ၁၀၆ ဖျေံသ္ဇိုၚ်ဍုၚ်လၟိုၚ် စိုပ်ကၠုၚ် ၅၀ ပြၚ်တုဲ ဆက်နွံဒၟံၚ် လ္ပာ်ကွာန်တၟအ်ကၞေၚ် ကွာန်တၟိဂှ် ဂွံတီကေတ် ဇရေၚ်ညးဒေသတံရ။
အတိုၚ်ဂလာန် ညးဒေသတံဂှ်မ္ဂး ဒပ်ကံၚ်ဇြဳပၞာန် ဒးဒုၚ်ဗ္တိုက်လဝ်ဂှ်ဝွံ လုပ်စိုပ်ဖျေံလဝ်ဒပ် အပ္ဍဲကျာ်ပိမွဲဇံၚ်ဂှ် ဂွံၜိုတ်မွဲသတ္တာဟပြၚ်ယျဂှ် ဂွံတီကေတ်ရ။
ပရေၚ်ဗ္တိုက်ဏံဂှ် ဗော်ဍုၚ်မန်တၟိ NMSP AD ၊ ဒပ်ပၞာန်ဗၠးၜးကောန်ဂကူကရေၚ် KNLA တမ်ဒပ် ၂၇ ကေုာံ ဒပ်စဵုဒၞါညးဍုၚ်ကွာန်ပွိုၚ်ဍုၚ်ရေဝ် YPDF ဒပ်ပံၚ်ကောံတံ ဗ္တိုက်လဝ်ရ။
တုဲကၠုၚ် ပ္ဍဲဂိတုအဝ်ဂါတ် ၂၃ တေံလေဝ် ပ္ဍဲကဵုပွိုၚ်ဍုၚ်ရေဝ် ကွာန်အံၚ်သာယာ ဗ္ဒါဲဘာလကျာ်ဂှ် ဒပ်ကံၚ်ဇြဳပၞာန် ကၠုၚ်တောပ်ဗ္တိုက်တံ ဒးဒုၚ်ဗ္တိုက်လဝ်တုဲ မွဲတၠ ချိုတ်တုဲ မသုန်တၠ ကလိဂွံလဝ်ဝပ်ရ။
ပ္ဍဲကဵုပွိုၚ်ဍုၚ်ရေဝ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် စနူဂိတုဂျူလာၚ်တုဲ ဒပ်ကံၚ်ဇြဳပၞာန် ထ္ပက်ကရောၚ်ပၞာန်ကီု၊ ဟိုတ်နူဖျေံဒပ်မံၚ်တန်တဴကၠုၚ် အပ္ဍဲကွာန်လ္ၚဵုတံဂှ်တုဲ ပေါဲဗ္တိုက်ၜါလ္ပာ် ကလေၚ်က္တဵုဒှ်ဒၟံၚ် စေအ်အ်ရ။
ပရိုၚ်−သြၚ်လောန်တိုၚ်(မ်)
ဗီု−CJ