လ္ဂုၚ်၊ သေပ်တေမ်ဗာ ၂၇
ဒၞါဲအမာတ်ကလုတ် စပ်ကဵုဍုၚ်ဗၟာဂှ် ဂျပါန် ထ္ပက်အဇာတုဲ သွက်ဂွံခါန်ကၞက်အာ ညးစၞးကဆံၚ်သဝ်ဝ်မွဲတၠဂှ် စဳဇန်ဒၟံၚ်တုဲ သွက်ဂွံယှအ်ဖျေံကဆံၚ် ပရေၚ်ဆက်ဆောံကလုတ်တမာန် ကုကံၚ်ဇြဳပၞာန်ဂှ် ဒှ်ကၠုၚ်ဍုၚ် လက္ကရဴအိုတ်ရ။
အမာတ်ကလုတ်ဂျပါန် စပ်ကဵုဍုၚ်ဗၟာလၟုဟ် မေဿတာ အဳချဳရိုဝ် မာရူယာမာဝွံ ခြာဟွံလအ် အာယုက်ဌာနန္တရညး အိုတ်ရဏောၚ်တုဲ ဒၞါဲညးဂှ် ထ္ပက်အာအဇာ ကုညးဒုၚ်တာလျိုၚ်ပရေၚ်ဍုၚ်သ္အာၚ် ကလုတ်ကဆံၚ်ဒုတိယဂှ်ဏောၚ်ဂှ် တမ်ရိုဟ်ပရိုၚ် ဂွံတီကေတ်လဝ် ပရေၚ်ဏံ ဟီုလဝ်ရ။
အခိၚ်လၟုဟ် မေဿတာ ယိချဳတာကဳ နဒဒှ်ညးဒုၚ်တာလျိုၚ်ပရေၚ်ဍုၚ်သ္အာၚ်ဂှ်ဝွံ ကေတ်ဒၟံၚ်တာလျိုၚ် နူဂိတုသေပ်တေမ်ဗာ ၁၅ တေံတုဲ လၟုဟ် နွံဒၟံၚ်လ္ဂုၚ်ဂှ် ဂွံတီကေတ်ရ။
အမေရိကာန်၊ ဗျိတိၚ်၊ အဝ်သတြေလျ ကေုာံ ဍုၚ်ပလိုတ်တံဂှ်တှ်ေ ဒၞါဲအမာတ်ကလုတ်စပ်ကဵုဍုၚ်ဗၟာတံဂှ် ခါန်ကၞက်ပ္တိုန် ညးဒုၚ်တာလျိုၚ်ပရေၚ်ဍုၚ်သ္အာၚ်တံတုဲ ယှအ်ဖျေံလဝ်ကဆံၚ် ပရေၚ်ဆက်ဆောံကလုတ်တမာန် ကုကံၚ်ဇြဳပၞာန် မဒှ်ရ။
ကုကံၚ်ဇြဳပၞာန် ဗ္တိုက်ဒၟံၚ်ပၞာန်ကျာ ကုညးဍုၚ်ကွာန်ကောန်အရာပ်တံ၊ သီုဖံက်ပ္ကဝ်ဒၟံၚ်အခေါၚ်အရာမၞိဟ်တံဂှ် ယှအ်ဖျေံကဆံၚ် ပရေၚ်ကလုတ်တမာန် သာ်ဏံဂှ်ဝွံ ဒှ်ပြဝတးပါဲကၠေံ ပရေၚ်လုပ်သၞောဝ်ညးတံဏောၚ်ဂှ် ဒုၚ်ဂိုၚ်ကေတ်ရ။
စပ်ကဵုအစဳဇန်ဏံတုဲ သွက်ဂွံသၟာန်သၟုက်ဂှ် ပ္ဍဲဂိတုသေပ်တေမ်ဗာ ၂၄ တေံ ဆက်စၠောံလဝ် ရုၚ်ကလုတ်ဂျပါန် လ္တူဍုၚ်လ္ဂုၚ်ဂှ်ကီုလေဝ် ဟွံဂွံလဝ်အဆက်ရ။
အမာတ်ကလုတ်ဂျပါန် မာရူယာမာဝွံ ပ္ဍဲသၞာံ ၂၀၂၁ ဂိတုမာတ်ချ် အခိၚ်ဒပ်ပၞာန် ပါ်ထ္ကး ညးထ္ၜးဆန္ဒ ဗွဲမၜိုဟ်လလမ်တံ အသိၚ်ခိုဟ်ဒၟံၚ်ဂှ် ဆဵုဂဗကဵု ဝန်ဇၞော်ကာဍုၚ်သ္အာၚ်ကံၚ်ဇြဳပၞာန်တုဲ သွက်ဂွံဒေါအ်ဒေၚ်ကဵု ပရေၚ်ဂစိုတ်ဂယိုၚ်ဒၟံၚ်တံဂှ်ကီု၊ သွက်ဂွံကလေၚ်ဗလးကဵု ညးမဒစဵုဒစး အလဵုအသဳတံဂှ် အာတ်မိက်လဝ်ရ။
သၞာံဏံ ဂိတုဖေဖဝ်ဝါရဳ တ္ၚဲပၞာန်သီအဝဵုပေၚ်ပိသၞာံဏံဂှ် ဝန်ဇၞော်ကာဍုၚ်သ္အာၚ်ဂျပါန် ယိုဝ်ကိုဝ် ကာမဳကာဝါဝွံ ဒပ်ပၞာန်ဝွံ ဂွံဂၠါဲသွဟ် သွက်ပရေၚ်ၜိုဟ်လလမ်ဂှ် ဟွံကၠောန်သ္ပမွဲသာ် ထပ်ပပဵုပ္တိုန်ဒၟံၚ်အာယုက် တၚ်လလောၚ်တြး အကာဲအရာကာတၟေၚ်တံဂှ်ရ ပ္တိုန်ဒုဟ်ဟီုဗျိလဝ်တုဲ ဟိုတ်နူပရေၚ်ဗ္တိုက်ပၞာန်ကျာတံတုဲ ညးဍုၚ်ကွာန်ဒုဟ်ဒဏ်ဟွံမွဲတံ ဒးချိုတ်ဒၟံၚ် အရိုဟ်တ္ၚဲရောၚ် ဟီုလဝ်ရ။
အလဵုအသဳဂျပါန်ဂှ် တုဲကၠုၚ်ဂိတုမေတေံ ကော်ဘိက်လဝ် ညးစၞးအလဵုအသဳညဳသၟဟ်ဂကူ၊ ညးစၞး ဂကောံရပ်လွဟ်ကောန်ဍုၚ်အရၚ်တံဂှ်တုဲ ဒဒှ်ရမိက်ဂွံရီုဗၚ်ကဵု ပ္ဍဲအရာဂၠါဲသွဟ်ပရေရၚ်ၜိုဟ်လလမ်တံဂှ် ဟီုလဝ်ရ။
Ref: The Diplomat