ဝါယှေန်တာန်၊ ဒဳဇြေမ်ဗာ ၁၂
ပ္ဍဲတွဵုရးရခေၚ် သ္ကုတ်သၟဝ်ကျာဂှ် ယဝ်ရပရေၚ်ဖံက်ပ္ကဝ်သၞောဝ်ဍုၚ်သ္အာၚ်တံ အသိၚ်သၠုၚ်တိုန်ကၠုၚ်မ္ဂး နကဵုညးတာလျိုၚ်ဂမၠိုၚ် ဒးဆေၚ်အာမုက်ကဵု ပရေၚ်စောဲဂဗုတ် နူကဵုရုၚ်သၞောဝ်ဓဝ်အမှုရာဇဝတ်ဍုၚ်နာနာ ICC ဏောၚ်ဂှ် ဂအုပ်ညးရေၚ်တၠုၚ်ဂဗုတ် ICC ကာရာန်ခါန် ကဵုလဝ်သတိရ။
ပရေၚ်ဂၠိုက်ဂၠါဲစၟဳတ် ICC ဂှ်ဝွံ ဗွဲအဓိက ဂၠိုက်ဂၠါဲထ္မံက်ပ္တိတ်လဝ် အမှုရာဇဝတ် ဒပ်ပၞာန်ဗၟာ မကလိလောန်လဝ်ကၠာတေံဂှ်ရ။
ဆ္ဂး အတိုၚ်အခေါၚ်ကၠောန် ICC ဂှ်မ္ဂး သွက်အရာမဖံက်ပ္ကဝ်ဒၟံၚ်သၞောဝ် မက္တဵုဒှ်ဒၟံၚ်လၟုဟ်တံဂှ်လေဝ် ကေတ်အရေဝ်မာန်ဂှ် ကာရာန်ခါန် ဟီုလဝ်ရ။
နကဵုဒပ်ပၞာန်ရခေၚ် AA ယဝ်ရဟွံဆက်စပ်ကဵု အမှုရာဇဝတ်ဍုၚ်သ္အာၚ်တံဂှ်ပုဟ်ဟီုမ္ဂး ဂွံဗၠးနူပရေၚ်စောဲဂဗုတ် ICC ဂှ်ဏောၚ်ဂှ် ဂအုပ်ညးရေၚ်တၠုၚ်ဂဗုတ်ဂှ် ဟီုရ။
သွက်ဂွံရပ်ဒက် က္ဍိုပ်သ္ကိုပ်ပၞာန် မေန်အံၚ်လှာၚ်ဂှ် ပ္ဍဲဂိတုနဝ်ဝေမ်ဗာ ၂၇ တေံ ကြဴနူအာတ်ပ္တိုန်လဝ် ရုၚ်သၞောဝ်ဓဝ် သွက်ဂွံပ္တိတ်ကဵုလိက်ဝါရာန်ဂှ်တုဲဂှ် အရာအာတ်ပ္တိုန်လဝ်တၞဟ်ဟ်တံလေဝ် နွံဂှ် ဂအုပ်ညးရေၚ်တၠုၚ်ဂဗုတ် ကာရာန်ခါန် သ္ပဒတန်ဟီုလဝ်ရ။
ပ္ဍဲအရာဆဵုဂဗကဵု ဌာန်ပရိုၚ် VOA လ္တူလပှ်ကျာဂှ် မေဿတာခါန်ဂှ်တှ်ေ ပရေၚ်ဂၠိုက်ဂၠါဲစၟဳတ်လၟုဟ်ဝွံ ဆက်စပ်ဒၟံၚ်ကဵု အမှုရာဇဝတ် မကလိလောန်လဝ် လ္တူရိုဝ်ဟေန်ဂျာ ပ္ဍဲတွဵုရးရခေၚ်တံဂှ်သၟးကီုလေဝ် နကဵု ICC သွက်အမှုရာဇဝတ်တၞဟ်သ္အာၚ်တံဂှ်လဝ် စောဲဂဗုတ်မာန်ဂှ် ဟီုလဝ်ရ။
ဍုၚ်ဗၟာဝွံ ဒှ်ဍုၚ်မလုပ်ဂကောံ Rome Statute ဟွံသေၚ်ကီုလေဝ် ညးမဇီုကပိုက်ဒးဂိဂမၠိုၚ်ဝွံ လုပ်စိုပ်စ္ၜုဲစ္ၜော် စိုပ်ဒၟံၚ်ဍုၚ်ဗေန်ဂလာဒေတ်အိုတ်ဂှ် ညးထံက်ထ္ၜးလဝ်ရ။
နကဵုညးဍုၚ်ကွာန်ဍုၚ်ဗၟာ ကေုာံ ရိုဝ်ဟေန်ဂျာတံ နွံပၟိက်ဒၟံၚ်ကဵု ပရေၚ်ဗဗွဲဓဝ်ဂှ်ရ ပွမဂရၚ်ပ္တီ ဇရေၚ်ရုၚ်သၞောဝ်ဓဝ်တံ၊ ပရေၚ်အာတ်မိက်ကၠုၚ်စပ်ကဵုလိက်ဝါရာန်တံ နွံကၠုၚ်မံၚ်ဏီဏောၚ်ဂှ် ဂအုပ်ညးရေၚ်တၠုၚ်ဂဗုတ်ဂှ် ဟီုရ။
Ref: VOA