မတ်မလီု၊ ဒဳဇြေမ်ဗာ ၁၃
တွဵုရးဍုၚ်မန် ပ္ဍဲပွိုၚ်ဍုၚ်ဂမၠိုၚ် ပ္ဍဲသၞာံဏံ နူဂိတုဂျာန္နဝါရဳ ၁ စဵုကဵုဂိတုနဝ်ဝေမ်ဗာ ၃၀ အပ္ဍဲပွိုၚ် ၁၁ ဂိတုဏံ ဟိုတ်နူပဋိပက္ခပရေၚ်ပၞာန်တုဲ ညးဍုၚ်ကွာန်ဒေသ ဗ္ဒါဲ ၁၃၀ ချိုတ်အာလဝ်ဂှ် ဂွံတီကေတ် အတိုၚ်တၚ်လလောၚ်တြး လၟေၚ်လိက်လ္ဂန်အိန် မလလောၚ်ပ္တိတ်လဝ် ပ္ဍဲဂိတုဒဳဇြေမ်ဗာ ၁၂ တေံရ။
ညးမဒးချိုတ်အာဂမၠိုၚ်ဝွံ မာၚ်တိုပ်တိဗ္တိုဟ်ထ္ကးကီု၊ ဒးဒုၚ်ကၠတ်ပန်ဂစိုတ် ကေုာံ သီုကဵုဒးလွဟ်ဇၞော်တံဂှ်တုဲ ချိုတ်အာလဝ်ရောၚ် သ္ဂးရ။
ဟိုတ်နူပဋိပက္ခပရေၚ်ပၞာန်တုဲ ညးဒးချိုတ်အာအပံၚ်ဖအိုတ် ၁၂၇ တၠ နွံတုဲ မၞိဟ်တြုံ ၉၁ တၠကဵု မၞိဟ်ဗြဴ ၃၆ တၠ ပါလုပ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
သ္အာၚ်နူဂှ်ပၠန် ညးဇီုကပိုက်ကလိဂွံဝပ် နွံလဝ် စဵုကဵု ၂၅၉ တၠတုဲ ပ္ဍဲကဵုဏံ မၞိဟ်တြုံ ၁၄၈ တၠကဵု မၞိဟ်ဗြဴ ၁၁၁ တၠ ပါလုပ်ရောၚ် သ္ဂးရ။
နကဵုတၚ်စောဲစပ် ဆက်စပ်ဒၟံၚ်ကဵု PDF ဂှ် မၞိဟ်ဒးဒုၚ်ရပ်လဝ်ကဵု ကံၚ်ဇြဳပၞာန်တံဂှ် နွံဒၟံၚ် စဵုကဵု ၂၇၂ တၠတုဲ ဆက်စပ်ကဵုကံၚ်ဇြဳပၞာန်ဂးတုဲ ညးဒးဒုၚ်ရပ်ကဵုဂကောံပၠန်ဂတးတံဂှ်လေဝ် နွံဒၟံၚ်ကီုလေဝ် ဂွံကံက်ကေတ်စရၚ်ဝါတ်ဂါတ်ဂှ် ဂွံတီကေတ်ရ။
ပ္ဍဲတွဵုရးဍုၚ်မန်ဏံ အခိၚ်ပဋိပက္ခပရေၚ်ပၞာန်တံ က္တဵုဒှ်ဒၟံၚ်ဂှ် နကဵုကံၚ်ဇြဳပၞာန် ရပ်ဒက်ညးဍုၚ်ကွာန်ကောန်အရာပ်တံ ဟွံဗဗွဲကဵုသၞောဝ်ဂှ်ကီု၊ ကလေံပရိုၚ် ပြိုက်ဂစိုတ်လဝ်ကီု၊ ဍဵုဍိုက်ပျဲပျာံကီု၊ ရပ်စပ်စကာ နဒဒှ်မၞိဟ်ဒးဒုၚ်သ္ပဒၞန် အပ္ဍဲပေါဲဗ္တိုက်တံဂှ်ကီု၊ သီကေတ်ဒြပ်ရတ်ပိုန်ဟာန်ညးဍုၚ်ကွာန်တံ ပလီုပလာ်လဝ်တံဒှ်တမ် ဆက်ကၠောန်ဒၟံၚ် ပရေၚ်ဖံက်ပ္ကဝ်အခေါၚ်အရာမၞိဟ်တံဂှ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး လၟေၚ်လိက်လ္ဂန်အိန်ဂှ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media