မဂွဵု၊ ဒဳဇြေမ်ဗာ ၁၃
ရးမဂွဵု ပ္ဍဲပွိုၚ်ဍုၚ် (ပွင့်ဖြူ) ပ္ဍဲဗ္ဒိုပ်ဗၠာဲသၟိၚ် မေဝ်သလဳဂှ် ကောန်ဒပ်ကံၚ်ဇြဳပၞာန်ရေၚ်သ္ကအ်ဒှ်ပန်ပှော်တုဲ မွဲတၠ ချိုတ်အာလဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဒဳဇြေမ်ဗာ ၁၀ အခိၚ်နူဂယး ပယျာံ ၁ နာဍဳဂှ် ကောန်ဒပ်ကံၚ်ဇြဳပၞာန် နွံဒၟံၚ်ပ္ဍဲဗ္ဒိုပ်ဗၠာဲသၟိၚ်ဂှ်ရေၚ်သ္ကအ် က္တဵုဒှ်ပန်ပှော်တုဲ ပ္ဍဲကဵုတ္ၚဲဂှ် ပယျာံဂယးဂှ်ရ ကၠုၚ်စိုပ်ယိုက်ဏာလဝ် ညးမဇီုကပိုက်ကလိဂွံလဝ်ဝပ်တံကဵု ဇွမဒးပြဟ်လလုဲအာဂမၠိုၚ် နကဵုယာန်ဖ္ဍိုက်မၞိဟ်ယဲဂှ် ဂွံတီကေတ်ရ။
အခိၚ်သ္ဂာဗ္တံ ၜိုတ် ၁ နာဍဳပြၚ်ဂှ် ရမျာၚ်သေနာတ် ဗြုတိတ်ကၠုၚ် ပန်မသုန်လစုတ်တုဲ ပယျာံဂယးပြဟ်ဂှ် ဒဒှ်ရယိုက်ဖ္ဍိုက်ဏာ နကဵုယာန်ဖ္ဍိုက်မၞိဟ်ယဲတံဂှ် ညးဒေသဂၠိုက်ဂၠါဲဂွံတီကေတ်ဂှ်မွဲတၠ ဟီုဂးလဝ်ရ။
ပ္ဍဲဗ္ဒိုပ်မေဝ်သလဳဂှ် ကောန်ဒပ်ကံၚ်ဇြဳပၞာန်ကဵု ဗၠာဲသၟိၚ်တံ ဇြဟတ်ၜိုတ် ၄၀ ပြၚ်နွံတုဲ က္တဵုဒှ်လဝ်ပရေၚ်ပန်ပှော်ဂှ်ဝွံ ဒှ်ကောန်ဒပ်ကံၚ်ဇြဳပၞာန်ရေၚ်သ္ကအ်ရဂှ် ဂွံတီကေတ်ရ။
က္တဵုဒှ်ပရေၚ်ပန်ပှော်တုဲ ပ္ဍဲအခိၚ်နူဂယး ၜိုတ် ၇ နာဍဳဂှ်ရ ပျူသဝ်ထဳ နူကဵုကွာန် (ကျောၚ်းကုန်းကြီး) ကဵု သ္ကိုပ်ဗိုလ်မေန်ပိုၚ်သဵု နူကဵုဒပ် (ဝါစိုက်ပျိုးရေး) တံ ကၠုၚ်စိုပ်လဝ်ဂှ် ဂွံတီကေတ်ရ။
စပ်ကဵုကိစ္စဏံတုဲ ညးဒးဒၟံၚ်တာလျိုၚ် ပ္ဍဲဗ္ဒိုပ်မေဝ်သလဳတံဂှ်တှ်ေ ဟိုတ်နူ PDF တံပန်ပှော်တုဲ ကလေၚ်ပန်လဝ်ရောၚ် ဟီုဂးဒၟံၚ်ကီုလေဝ် ဗ္ဒိုပ်မေဝ်သလဳကဵု PDF တံဂှ် သ္ၚောဲဒၟံၚ်ရောၚ် ညးဒေသတံ ဟီုရ။
တုဲကၠုၚ် ပ္ဍဲဂိတုဒဳဇြေမ်ဗာ ၁ တေံဂှ်လေဝ် ကောန်ဒပ်နူဗ္ဒိုပ်ဗၠာဲသၟိၚ်မေဝ်သလဳမွဲတၠ ဂြိပ်တိတ်အာလဝ်ဂှ် ဂွံတီကေတ်တုဲ ဒးဂဗဒၟံၚ်ကဵုပြဒ္ဒညာ အပ္ဍဲဗ္ဒိုပ်တံဂှ်ရောၚ် ညးမစုက်လုက်မွဲတၠ ဟီုရ။
တုဲကၠုၚ် ပ္ဍဲဂိတုနဝ်ဝေမ်ဗာ ၂၇ တေံ ဂကောံစဵုဒၞါတံ ကြဴနူဗ္တိုက်လဝ် ဒဒန်မေဝ်သလဳဂှ်တုဲဂှ် စပ်ကဵုပရေၚ်ဖျေံလဝ်ဂီုကၠီုဒဒန်တံဂှ်တုဲ ပရေၚ်ကယျာန်ဓဝါန်တံ နွံဒၟံၚ်ဂှ် ဂွံတီကေတ်ရ။
အခိၚ်လၟုဟ် နူဗ္ဒိုပ်မေဝ်သလဳဂှ် ကောန်ဒပ်ဗၠာဲသၟိၚ် ၃ တၠ ကဵု ကောန်ဒပ်ကံၚ်ဇြဳပၞာန် ၁ တၠ ဂြိပ်တိတ်ကၠုၚ် နွံတုဲ၊ နူဒပ်(ဝါစိုက်ပျိုးရေး) ဂှ် ကောန်ဒပ်ကံၚ်ဇြဳပၞာန် ဂြိပ်တိတ်ကၠုၚ် နွံကၠုၚ် စဵုကဵု ၃ တၠယျဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ