မတ်မလီု၊ ဒဳဇြေမ်ဗာ ၁၄
ကံၚ်ဇြဳပၞာန် ကျဒၟံၚ်ပၞာန် အလုံဍုၚ်မွဲဂှ် ပ္ဍဲပရေၚ်ပကောံကောန်ပၞာန်တံဂှ် ကလေၚ်သၠုၚ်ပ္တိုန်အသိၚ်ပၠန်ဂှ်ရ ဒဒှ်ရရီုဗၚ်ကဵုအာ ညးမဒးဒုၚ်ပကောံပကောန်ပၞာန်တံဂှ်ဏောၚ်ဂှ် ဂကောံပျဳတုယေန်ခွေန် ကဵုသမ္တီလလောၚ်တြးကၠုၚ် ပ္ဍဲဂိတုဒဳဇြေမ်ဗာ ၁၂ တေံရ။
ဗွဲကြဴဏံ ကံၚ်ဇြဳပၞာန် ရပ်ဒက်ကၠုၚ်ညးသၟတ်ဂမၠိုၚ် ဟွံဗဗွဲကဵုသၞောဝ် သီုဟွံမွဲကဵုသၞောဝ်သၞောတ်တုဲ လၟေၚ်ဒဒှ်ကဵုယိုက်လျိုၚ်ပၞာန်တံဂှ် သၠုၚ်တိုန်ဒၟံၚ်ရ။
ဟိုတ်ဂှ်ရ ညးဒးဒုၚ်ပကောံပလဝ်ကောန်ပၞာန် ဟွံဗဗွဲကဵုသၞောဝ်တံကဵုဒှ်၊ နူကဵုမိမကောန်ဇာတ်သမ္ဘာတံမွဲကဆံၚ်ကဵုဒှ်၊ နူကဵုမိဿဟာဲဍုက်ကေဝ်တံကဵုဒှ် ကၠုၚ်စိုပ်ကေတ်အဆက် ချပ်ဂၞန်ကဵု ဂကောံပျဳတုယေန်ခွေန်တံမာန်တုဲ ညံၚ်ဂွံတိတ်စ္ဍးနူ ဒပ်ကံၚ်ဇြဳပၞာန် သီုလွဟ်လက်နက်ကဵုဒှ်၊ သီုမသက္ကုလွဟ်လက်နက်တံကဵုဒှ်ဂှ် ရီုဗၚ်ရေၚ်တၠုၚ်ကဵုဏောၚ် သ္ဂးရ။
ပ္ဍဲကဵုညးဒးဒုၚ်ပကောံပကောန်ပၞာန်ဂမၠိုၚ် ဟိုတ်နူကၠုၚ်စိုပ်ကေတ်အဆက် အာတ်အရီုဗၚ် ဇရေၚ်ဂကောံပျဳတုယေန်ခွေန်တံဂှ်တုဲ တမ်ဒပ်သၟဝ်တဲ NUG တံ၊ EROs တံကဵု ဂကောံပၠန်ဂတးအဖဝ်မိတ်တံ ပံၚ်တောဲတုဲ ပ္ဍဲကဵုရီုပ္တိတ်ဂွံလဝ်ဂမၠိုၚ် ကောန်ၚာ်အာယုက်ဟွံပေၚ်တံလေဝ် ပါလုပ်ဒၟံၚ်ရ။
ကံၚ်ဇြဳပၞာန်ဂှ်တှ်ေ ပ္ဍဲအရာကော်ကဵုလုပ်ပၞာန် ပ္ဍဲရးဒေသ ကေုာံ တွဵုရးတံဂှ် ညံၚ်ဟွံဂွံဒှ်ဗီုပြၚ် ကော်ကေတ်ဗွဲအဓမ္မဂှ် သွက်ဂွံရှ်ေသှ်ေ တၚ်စၞောန်ဂမၠိုၚ် လၟေၚ်ကမၠောန်သၞောဝ်အစာံတံဂှ် နွံပၟိက်ရောၚ် စၞောန်ကၠုၚ်လဝ်ရ။
ဆ္ဂး ပ္ဍဲဗလးတိဂှ်တှ်ေ စန်ဒက်ကဵုလှုဲကီု၊ ရပ်ကော်ဗွဲအဓမ္မကီု၊ ကရေပ်ဓရတ်တုဲ ရပ်ကော်ကီု၊ နကဵုနဲကဲနာနာသာ်ဂှ် ပကောံဒၟံၚ်ကောန်ပၞာန်တၟိတၟိတံဂှ်ရောၚ် လိက်ဒုၚ်စဳရေၚ် ဂကောံလ္ၚတ်ပဋိပက္ခ ကေုာံ ကေၚ်ကာဍုၚ်ဗၟာ BACS သ္ဂးရ။
ဗိုလ်ဇၞော် ဇြေန်ယဝ် သ္ပလဝ် CDM ဂှ်ဝွံ အခိၚ်နွံပၟိက်ဒၟံၚ်ကဵုဒြဟတ်ဒပ်ကာမံက်တိုန်ဂှ် ၜိုတ်မၞိဟ်ဆဵုဂှ် တံၚ်ဂြဲဏာအပ္ဍဲဒပ်ပၞာန် အကာဲအရာသာ်ဏံဂှ် ဂွံဆဵုကေတ်ဒၟံၚ်ရောၚ် သ္ၚဳဂၠိပ်လဝ်ရ။
“ပ္ဍဲဒပ်ပၞာန်ဂှ်တှ်ေ ကၠာတေံဂှ် သၞောဝ်နွံဒၟံၚ်။ ရဲဒးထံၚ်တုဲဂှ် လုပ်ပၞာန်ဟွံဂွံပုဟ်။ လၟုဟ်ဂှ် စုတ်ကၠုၚ်ဒၟံၚ် သီုညးတိတ်နူထံၚ်တံဂှ် ဂွံဆဵုကေတ်ရ။ တုဲပၠန် သၞောဝ်ဒပ်ပၞာန်တြေံဂှ်တှ်ေ ရဲထ္ပက်လဝ်ယန်မၚ်သေအ်တံ စုတ်စရၚ်နဒဒှ်ကောန်ဒပ်ဟွံဂွံ။ ဆ္ဂး လၟုဟ်ဂှ် ၜိုတ်မၞိဟ်ဆဵုဂှ် အကာဲအရာဲတံၚ်ပၠောပ်ကၠုၚ်ဂှ် ဂွံဆဵုကေတ်ရ။ မူဟိုတ်ရောတှ်ေ ဍေံတံ နွံပၟိက်ဒၟံၚ်ကဵုဒြဟတ်ကာမံက်တိုန် ဒှ်ဒၟံၚ်ရ” သာ်ဝွံ သ္ဂးရ။
မွဲလ္ပာ်ဂှ်ပၠန် ကောန်ဒပ်စှ်ေနူတန်ဗ္တောန်ကွတ်ပၞာန်တၟိတၟိတံဂှ် ပလံၚ်ဏာမုက်ပၞာန်တေံကီု၊ ဂြိပ်တိတ်၊ ဇီုကပိုက်ချိုတ်တံ နွံကၠုၚ်တုဲ မၞိဟ်လိၚ်လုပ်ကဵုပၞာန်တံလေဝ် အောန်စှ်ေကၠုၚ်ဂှ် ဂွံတီကေတ် ဇရေၚ်တမ်ရိုဟ်ပရိုၚ်အပ္ဍဲဒေသတံရ။
အခိၚ်လၟုဟ်ဂှ်တှ်ေ သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် မပၠောပ်လဝ်လမျီုဂှ်ဝွံ ကြပ်ပေၚ်ကၠုၚ်မွဲသၞာံကီုလေဝ် နဲသၞောဝ်ဥပဒဂှ်ေ လလောၚ်ပ္တိတ်ဟွံမာန်ဏီတုဲ ဆ္ဂး သွက်တန်ဗ္တောန်ကွတ်ပၞာန်တံဂှ် ကော်ပကောံကၠုၚ်ဒၟံၚ် ကောန်ဒပ်တၟိတၟိတံ နကဵုနဲကဲနာနာသာ်ရ။
အကြာပ်ဒပ် ဇြေယျ နူကဵုဒပ်ကျာ မသ္ပလဝ်CDM ဂှ်တှ်ေ ပ္ဍဲတန်ဗ္တောန်လၟေၚ်တုဲတုဲတံဂှ် ဟိုတ်နူချိုတ်ကီု၊ ဂြိပ်တိတ်ကီုတံ နွံဒၟံၚ်တုဲ ဗွဲကြဴဏံ ပါဲဒလေတ်ကၠုၚ်ညးသ္ကအ်အိုတ်တုဲ ကံၚ်ဇြဳပၞာန် ရပ်စပ်ကၠုၚ်နဲကဲပကီုပရာပ်တံဂှ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အဓိကဂှ်တှ်ေ ပကီုပရာပ်ဂၠိုၚ်ကၠုၚ် နူကၠာတေံဟီုဂှ် ဒၟါနူနဲကဲဓမ္မတာတံ ဟွံဒှ်ကလောန်ရဏောၚ်။ ဗွဲကြဴဏံ ဂြိပ်တိတ်ကၠုၚ်ဂှ် ဂၠိုၚ်ကၠုၚ်။ မွဲပၠန်ဂှ် ရဲလုပ်လဝ်ကၠာတေံဂှ်တှ်ေ ၜိုတ်အဲတီဂှ်တှ်ေ အကြာအရာပ် ရဲစိုတ်ဟွံပေၚ် ညံၚ်ကဵုကြအ်ဒၟံၚ် ညံၚ်ကဵုယှောတ်ဒၟံၚ်တံ မၞိဟ်ဗီုတံဏံ ပါလုပ်ဒၟံၚ်တၟာဂလိုၚ်ဂှ် ဂွံတီကေတ်ရ။ သီုမၞိဟ်အာယုက်ဇၞော်ဇၞော်တံရဏောၚ်။ ၜိုတ်ဂွံဂှ် ကော်ပကောံလဝ်ဖအိုတ်။ အခိၚ်လၟုဟ်ဂှ် တီဒၟံၚ်သီုညးဖအိုတ်ရ၊ လုပ်ပ္ဍဲဒပ်ပၞာန်ဗၟာတှ်ေ ဒးအာဂၠံၚ်ချိုတ်ဏောၚ်ဟီုဂှ်လေဝ်၊ လၟေၚ်တုဲတုဲကၠုၚ်တေံ မုဒှ်လဝ်ရောဟီုဂှ် တီဒၟံၚ်သီုညးဖအိုတ်ရ။ ဟိုတ်ဂှ်ရ ဟွံမိက်လုပ် ပါဲဒလေတ်အိုတ်တုဲ ဗွဲကြဴဏံ ရပ်ကၠုၚ်ကြံၚ်ၚ်မ္ၚိုဟ်ဟ် ဂၠိုၚ်ကၠုၚ်ရ” သာ်ဝွံ သ္ဂးရ။
ပ္ဍဲတွဵုရးဍုၚ်မန်ဂှ်လေဝ် ပ္ဍဲပွိုၚ်ဍုၚ်လ္ၚဵု မလလောၚ်ပ္တိတ်လဝ် အမိၚ်ဒေသန္တရတံဂှ် ကုညးကလိလောန် ဖံက်ပ္ကဝ်အမိၚ်တံဂှ် ကံၚ်ဇြဳပၞာန် ရပ်ဒက်တုဲ ဂြဲစုတ်ပ္ဍဲဒပ်ပၞာန်တံလေဝ် နွံဒၟံၚ်ဂှ် ဂွံတီကေတ် ဇရေၚ်ညးဒေသတံရ။
ဟိုတ်နူအကာဲအရာတိဍာ်ကဵု ပရေၚ်ပၞာန်ကြံၚ်မ္ၚိုဟ်တံတုဲ စၟအ်အ်သၟတ် မကၠုၚ်စိုပ်ကေတ်အဆက်တံဂှ် နကဵုဂကောံပျဳတုယေန်ခွေန် ၜိုန်ရတီလဝ် ဒဒှ်မရီုဗၚ်ကဵု တၟံကၠံပေၚ်ၚ်မာန်ဟွံသေၚ်ဂှ်ကီုလေဝ် ယဝ်အခေါၚ်အရာဂွံရီုဗၚ် နွံဏောၚ်မ္ဂး မွဲတၠဒှ်ဒှ် ဂ္စါန်ဟံၚ်ပြာ်ကဵုအာဏောၚ်ဂှ် ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram