ဘာပန်၊ ဒဳဇြေမ်ဗာ ၁၅
တွဵုရးကရေၚ် ပ္ဍဲဒေသဘာပန် ဗ္ဒိုပ်ဒဵုပိမ ကေုာံ ဗ္ဒိုပ်(ဆင်စွယ်) ပၟိက်ဇၞော်ပ္ဍဲကဵုဗျူဟာပရေၚ်ပၞာန်တံဂှ် ဒးဒုၚ်ဗ္တိုက်သီလဝ်တုဲ ဒပ်ကံၚ်ဇြဳပၞာန်ဝွံ ညံၚ်ဗ္ဒိုပ်ကတိုၚ်တိ မၞုံဗ္ဒါဲဂှ် ဟွံဂွံစှ်ေအာဂှ် ပလံၚ်ဗစိုပ်ဒၟံၚ် ပၞာန်အရီုဗွဲမဂၠိုၚ်ဂၠေၚ်ရောၚ် တမ်ရိုဟ်ပရိုၚ်အပ္ဍဲဒေသသတံ ဟီုရ။
တုဲကၠုၚ် ပ္ဍဲဂိတုဒဳဇြေမ်ဗာ စၟတ်တ္ၚဲ ၇ ကဵု စၟတ်တ္ၚဲ ၁၁ ဂှ် ဒပ်ပံၚ်ကောံပၠန်ဂတး သၟဝ်သ္ကိုပ်သ္ကဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA ဗ္တိုက်သီဂွံလဝ် ဗ္ဒိုပ်ဒပ်ကံၚ်ဇြဳပၞာန် မၞုံပ္ဍဲခရိုၚ်ဘာပန် ဗ္ဒိုပ်ဒဵုပိမကဵု ဗ္ဒိုပ်(ဆင်စွယ်) တံဂှ်ရ။
အပ္ဍဲပေါဲဗ္တိုက်ဂှ် ကောန်ဒပ်ကံၚ်ဇြဳပၞာန်တံ ဂြိပ်တိတ်အာ လ္ပာ်ဗ္ဒိုပ်ဒပ်ကတိုၚ်တိ နွံလ္ပာ်သ္ကုတ်သၟဝ် ကွာန်(ဆင်စွယ်) ၊ ဒဵုပိမတံဂှ် ချိၚ်ကေတ်တုဲ ဂကောံပံၚ်ကောံပၠန်ဂတး ဒပ်မဟာ ၅ KNLA တံ ဗက်ဗ္တိုက်ပသောၚ်ဒၟံၚ် ကောန်ဒပ်ကံၚ်ဇြဳပၞာန် မဂြိပ်တိတ်အာလဝ်တံဂှ် ညးမၞုံအခေါၚ်ဟီုဂး ဒပ်မဟာ ၅ KNU သ္ကိုပ်ဗိုလ်ဇၞော်သဝ်ကလာဒိုဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်လၟုဟ် ဒပ်ပံၚ်ကောံပၠန်ဂတးတံ ပန်ပှော်ဗ္တိုက်ဒၟံၚ် ကုဗ္ဒိုပ်ကတိုၚ်တိ ဒပ်ကံၚ်ဇြဳပၞာန်ဂှ်တုဲ လ္ပာ်ကံၚ်ဇြဳပၞာန် ကၠုၚ်စိုပ်ဗ္တိုက်ဒၟံၚ် နကဵုပၞာန်ကျာတံဂှ်ရောၚ် ပရိုၚ်တိတ်ဒၟံၚ်ကီုလေဝ် စပ်ကဵုပရိုၚ်ဏံတုဲ သ္ပဒတန်ဟွံမာန်ဏီဂှ် သ္ကိုပ်ဗိုလ်ဇၞော် သဝ်ကာလဒိုဝ် သ္ဂးရ။
ဗ္ဒိုပ်ကတိုၚ်တိ ဒပ်ကံၚ်ဇြဳပၞာန်ဂှ်ဝွံ နွံဒၟံၚ် ပ္ဍဲကွာန်ကတိုၚ်တိ အကြာဍုၚ်ဘာပန် ကဵု ဍုၚ်ကမမံၚ် ခရိုၚ်ဘာပန်ဂှ်တုဲ မ္ၚးနူကဵုဗ္ဒိုပ်ဒပ်ပၞာန်မွဲဂှ် ဗ္ဒိုပ်ဌာန်ဂအုပ် တမ်ဒပ် ၁၀၁၃ ဒပ်မၚ်ပယျဵု BGF ဂှ်လေဝ် နွံဒၟံၚ်ရ။
ပ္ဍဲအကြာတ္ၚဲတံဏံ ဒပ်ကံၚ်ဇြဳပၞာန် ပ္တဝ်က္ဍိုပ်ကဵု လ္ပာ်ကွာန်ကတိုၚ်တိ မခြာဒၟံၚ်ကဵု ဗ္ဒိုပ်ဗျူဟာ ဖျေံသ္ဇိုၚ်ဍုၚ်ကမမံၚ် ဗၞတ် ၃၀ မိုၚ်ဂှ်တုဲ ပလံၚ်ဗစိုပ်ကဵုဒၟံၚ် ပၞာန်အရီုသွက်ပၞာန်ဗလးတိတံရ။
ဟိုတ်နူအကာဲအရာပရေၚ်ပၞာန် မက္တဵုဒှ်လဝ် အပ္ဍဲဒေသကတိုၚ်တိဂှ်တုဲ ညးဍုၚ်ကွာန်ဒေသ နူကဵုကွာန်ကတိုၚ်တိ၊ (ဘောကြိုလယ်) ဒးဂြိပ်ဒဴပါဲဒလေတ်ဒၟံၚ် လ္ပာ်ကွာန်ကမမံၚ်တံ အလုံကွာန်မွဲဂှ် ဂွံတီကေတ် ဇရေၚ်တမ်ရိုဟ်ပရိုၚ်အပ္ဍဲဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ