အပ္ဍဲပွိုၚ်မွဲဂိတု ဟိုတ်နူပရေၚ်ဗ္တိုက်ကံၚ်ဇြဳပၞာန်တုဲ ပ္ဍဲဒေသပၞာန်သ္ကုတ်သၠုၚ်ကျာဏံ မၞိဟ် ၁၇ တၠ ချိုတ်အာ

မတ်မလီု၊ ဒဳဇြေမ်ဗာ ၁၅

ဒေသပၞာန်သ္ကုတ်သၠုၚ်ကျာ အလဵုအသဳညဳသၟဟ်ဂကူ NUG ပ္ဍဲကဵုရးဗဂေါ၊ တွဵုရးဍုၚ်မန်၊ တွဵုရးကရေၚ် ကေုာံ ရးတၞၚ်သဳတံဂှ် ဟိုတ်နူပရေၚ်ဗ္တိုက် နူဒပ်ကံၚ်ဇြဳပၞာန်တံတုဲ အပ္ဍဲပွိုၚ်မွဲဂိတုဂှ် မၞိဟ် ၁၇ တၠ ချိုတ်အာလဝ်ရောၚ် ဌာနလလောၚ်ပရိုၚ် ဒေသပၞာန်သ္ကုတ်သၠုၚ်ကျာ ဒပ်ပၞာန်စဵုဒၞါညးဍုၚ်ကွာန် PDF လလောၚ်ပ္တိတ်လဝ်ပရိုၚ်ရ။

အပ္ဍဲဂိတုနဝ်ဝေမ်ဗာ ပွိုၚ်မွဲဂိတုတုဲကၠုၚ်တေံဂှ် ဒပ်ကံၚ်ဇြဳပၞာန် စွံပွန်ဗ္တိုက်ဒၟံၚ် လ္တူညးဍုၚ်ကွာန်ကောန်အရာပ်တံဂှ်တုဲ ညးဍုၚ်ကွာန် ၁၇ တၠ ချိုတ်တုဲ ၅၄ တၠ ဇီုကပိုက်ကလိဂွံလဝ်ဝပ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် အပ္ဍဲဂိတုနဝ်ဝေမ်ဗာဂှ် အကြာဒပ်ပံၚ်ကောံပၠန်ဂတးတံကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်ဆေၚ်မုက် က္တဵုဒှ်လဝ် ၄၂ ဝါ၊ ပန်ပှော်ဗ္တိုက်လဝ် ကရောၚ်ပၞာန်၊ ဗ္ဒိုပ်ဒပ်ကံၚ်ဇြဳပာန်တံ နကဵုဒရုၚ်ဂှ် ၃၈ ဝါပြၚ်၊ ကဵုလွဟ်လက်နက်ဇၞော် မာၚ်တံဂှ် ပန်ပှော်ဗ္တိုက်လဝ် ဟွံအောန်နူကဵု ၁၉ ဝါဂှ် ဂွံတီကေတ် အတိုၚ်တၚ်လလောၚ်တြးဂှ်ရ။

အပ္ဍဲပရေၚ်ဗ္တိုက်တံဂှ် ကောန်ဒပ်ကံၚ်ဇြဳပၞာန် ၁၄၉ တၠ ချိုတ်အာလဝ်တုဲ ၈၉ တၠ ဇီုကပိုက်ကလိဂွံဝပ်တုဲ ၆ တၠ လုပ်စိုပ်ဖျေံလဝ်လွဟ် ဇရေၚ်ဒပ်စဵုဒၞါညးဍုၚ်ကွာန် PDF တံဂှ် သ္ဂးရ။

သ္အာၚ်နူဂှ်ပၠန် ဒပ်ပံၚ်ကောံ KNLA/PDF/BPLA တံ ဗ္တိုက်သီဂွံလဝ် ဗ္ဒိုပ်ဒပ်ကံၚ်ဇြဳပၞာန်ၜါ ဗ္ဒိုပ်ကူသုက်ကဵု ဗ္ဒိုပ်မထဝ် ပွိုၚ်ဍုၚ်ဘာပန်ဂှ်တုဲ သီဂွံလဝ် လွဟ်လက်နက်မကမ်တံဂှ် လလောၚ်ပ္တိတ်လဝ်ရ။

လ္ပာ်ဒပ်ပံၚ်ကောံပၠန်ဂတးတံဂှ်တှ်ေ ကောန်သ္ဂံၚ် ၉ တၠ ပြဟ်လလုဲအာလဝ်တုဲ ၃၆ တၠ ဇီုကပိုက်ကလိဂွံလဝ်ဝပ်တုဲ ဒရုၚ်မွဲမ ဒးဆောံလေၚ်လီုလာ်အာနွံဂှ် ဌာနလလောၚ်ပရိုၚ် ဒေသပၞာန်သ္ကုတ်သၠုၚ်ကျာ ထ္မံက်ထ္ၜးလဝ်ရ။

ပေါဲဗ္တိုက်ဂှ်တှ်ေ တမ်ဒပ် PDF၊ ဒပ်ပၞာန်ဗၠးၜးကောန်ဂကူကရေၚ် KNLA ၊ ဒပ်ပၞာန်ဗၠးၜးညးဍုၚ်ကွာန်ဗၟာ BPLA ၊ ဒပ်ပၠတရဴဒဳမဝ်ကရေတ်တေတ်ကွးဘာအလုံဍုၚ်ဗၟာ ABSDF ၊ ဒပ်ပၠန်ဂတးဍုၚ်မန် MSRF ၊ ဒပ်ပံၚ်ကောံ ဗော်ဍုၚ်မန်တၟိ AD တံကဵု ဒပ်ပံၚ်ကောံဒရုၚ်တံ ပံၚ်တောဲတုဲ ဝေၚ်လဝ်ပရေၚ်ပၞာန်တံဂှ်ရောၚ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−CJ