အိုဝ်တာဝါ၊ ဒဳဇြေမ်ဗာ ၁၉
ညံၚ်ပရေၚ်မၚ်ရံၚ်ထံၚ်ပရိုၚ်တံ ဇြဟတ်ဂွံခိုဟ်ဂှ်ကီု၊ သီုဒပ်ပံၚ်ကောံ ပရေၚ်ဗ္တိုက်သရိုဟ်အမှုရာဇဝတ် ကၠောံၜက်ဍုၚ်တံ မပါလုပ် အလဵုအသဳကနေဒါ ဒဒှ်ရထ္မံက်အာရုပ်ရဴ အစဳဇန်ဂီုကၠီုတၟိ မွဲဒမြိပ်ပယျဵု အမေရိကာန်−ကနေဒါဂှ်ဏောၚ်ဂှ် ကဵုလဝ်ကတိရ။
သွက်ဂွံတာဒၞါအာ ညးဆုဲပြံၚ်မံၚ်တန်တဴ ဓမ္မတာဟွံသေၚ်တံကဵု ပရေၚ်ဂဥုဲၜူမာဲ လုပ်စိုပ်ကၠုၚ်တံဂှ် ညံၚ်ပယျဵုၜါဍုၚ် ဂွံဂီုကၠီု ဟွံကၠောန်ပုဟ်ဟီုမ္ဂး ကံက်အာအခေါန် လ္တူကပေါတ်ဗၞိက် မပလံၚ်ပ္တိုန်နၚ် နူကနေဒါတံ ၂၅ တၟံကၠံဏောၚ်ဂှ် ဒဝ်နေဝ်ထြာပ် မဂွံဒုၚ်အာတဲ ကဆံၚ်သမ္မတ ပ္ဍဲဂိတုဂျာန္နဝါရဳဂှ် ကြဴနူဘပဠတုဲဂှ် အစဳဇန်အလဵုအသဳကနေဒါသာ်ဏံ မံက်တိတ်ကၠုၚ်လဝ်ရ။
ယဝ်ရကံက်ဂလိုၚ်ပ္တိုန် အကံက်အခေါန်သာ်ဏံမ္ဂး သွက်ပရေၚ်ပိုန်ဒြပ်ဍုၚ်ကနေဒါဂှ် ဒှ်ကၠုၚ်ပရေၚ်ဇီုကပိုက် ဇၞော်ဇၞော်မာန်ဂှ် တၠပညာပရေၚ်ပိုန်ဒြပ်တံ ကဵုလဝ်သတိရ။
ပ္ဍဲအရာလလောၚ်တြး အစဳဇန်ဏံ သောဲသောဲဗြောဲဗြောဲဂှ် ဌာနဝန်ဇၞော်ပရေၚ်ဘဏ္ဍာ ကေုာံ ကေၚ်ကာဂကောံအလဵုအသဳ ကနေဒါဂှ် နကဵုအလဵုအသဳဖေဝ်ဒရာ သွက်အစဳဇန်ဏံဂှ် ရပ်စပ်အာ ဒဝ်ဠာအမေရိကကာန် ၉၀၀ မဳလျာန်ဏောၚ်ဂှ် ထ္မံက်ထ္ၜးလဝ်ရ။
ပ္ဍဲအစဳဇန်ဏံ တိုၚ်အထံက်မသုန် အဓိကဂှ်ဝွံ သွက်ဂွံတာဒၞါ ပရေၚ်သွံရာန်ဂဥုဲၜူမာဲ ဖါန်တနာၚ်ဂှ်ကီု၊ ညံၚ်ပရေၚ်သၞောဝ်ဥပဒေအုပ်လဒံ ဇြဟတ်ဂွံခိုဟ်ကၠုၚ်ဂှ်ကီု၊ သွက်ပရေၚ်ပံၚ်တောဲရေၚ်တၠုၚ် ကုဌာနသၞောဝ်ဥပဒေ အမေရိကာန်တံ ဇြဟတ်ဂွံခိုဟ်ကၠုၚ်ဂှ်ကီု၊ သွက်ဂွံပါ်ပရအ် တၚ်နၚ်ပရိုၚ်တံကဵု ညံၚ်ဂွံဖအောန်ဖျေံ ပရေၚ်ယာန်ကွဳစက်အာကၠုၚ်တံ ပါလုပ်ရ။
ပ္ဍဲဗ္ဒါဲသၞေဟ်ကၚ်ပယျဵုတံဂှ် က္ၜၚ်ကျာသၞေၚ်ဝဲတံ၊ ဒရုၚ်တံ မပါလုပ် ပရေၚ်ထံၚ်ပရိုၚ် နူမှဲအကးတံလေဝ် ကၠောန်အာဏောၚ်တုဲ သွက်ဂွံဂၠါဲဂဥုဲၜူမာဲတံဂှ် ဒပ်ဗၠာဲသၟိၚ်ကနေဒါတံ ကၠောန်သ္ပပကတ်ပကေၚ်အာကၠဵုတံဏောၚ် မဒှ်ရ။
တ္ၚဲလဳဗလာန် ယိုက်ဂၠေၚ်တာလျိုၚ်ကၠာအိုတ် နဒဒှ်ဝန်ဇၞော်ပရေၚ်ဘဏ္ဍာကနေဒါဂှ် တၚ်လလောၚ်တြးသာ်ဏံ မံက်တိတ်ကၠုၚ်လဝ်ရ။
ဝန်ဇၞော် လဳဗလာန်ဝွံ အပ္ဍဲလၟေၚ်တရဴ သ္ကိုပ်ဝန်ဇၞော်ကနေဒါ ထရူဒိုဝ်ကဵု ဒဝ်နေဝ်ထြာပ်တံ ဆဵုဂဗညးသ္ကအ် ပ္ဍဲသ္ၚိဖလဝ်ရဳတာဂှ် ပါဗက်ကၠုၚ်လဝ်မွဲစွံဂှ် ဂွံတီကေတ်ရ။
ထြာပ်ဂှ်တှ်ေ ဘပဠလဝ် သီုမက္ကသဳကိုဝ် ဒဒှ်ရကံက်အာအကံက်အခေါန် ၂၅ တၟံကၠံ လ္တူကပေါတ်ဗၞိက်တံဂှ်တုဲ အာတ်မိက်လဝ် သွက်ဂွံတာဒၞါ ဂဥုဲၜူမာဲတံကဵု ညးဆုဲပြံၚ်မံၚ်တန်တဴတံရ။
Ref;BBC