ဝါယှေန်တာန်၊ ဒဳဇြေမ်ဗာ ၁၈
ကြဴနူသမ္မတ ပါယှာ အေဝ် အာသာတ် ဒးဒုၚ်ပလှ်ဖျေံတုဲဂှ် ရုယှာ စဆုတ်ကလေၚ်ဒၟံၚ် နူကဵုသဳရဳယျာ ပါလုပ်သီုကဵုကပေါတ်ကိရိယာပၞာန် ကေုာံ သီုကောန်ဒပ်တံ ဇၞော်ကဵုဇြဟတ်ဂှ် သၞာဲဒဴအမေရိကာန်ၜါတၠ၊ သၞာဲဒဴဍုၚ်ပလိုတ်မွဲတၠ မစုက်လုက်ကဵုပရေၚ်ထံၚ်ပရိုၚ်တံ ဟီုလဝ်ရ။
ဒပ်ရုယှာတံ ဆုတ်ကလေၚ်အာဂှ်ဝွံ ဒှ်ပရေၚ်ဆုတ်ကလေၚ် ဇၞော်ကဵုဇြဟတ်မွဲတုဲ စကၠုၚ်လဝ် ပ္ဍဲသတ္တာဟတုဲကၠုၚ်တေံကီုလေဝ် ဆုတ်ကလေၚ်အာထာဝရဟာဟီုဂှ် ဟွံဂွံတီကေတ် သောၚ်ၚ်ကၠးကၠးပုဟ်ဂှ် သၞာဲဒဴတံဂှ် ဟီုရ။
ပြဟ်ဟ်ဏံ သၞာဲဒဴရုယှာတံဂှ်တှ်ေ ပ္ဍဲဗ္ဒိုပ်ဖျေံသ္ဇိုၚ်ပၟိက်ဇၞော်လ္ၚဵုတံဂှ် ဒပ်ရုယှာတံ ဆက်မံၚ်ဂွံ၊ ဟွံဂွံဂှ် ပ္တိတ်ဒၟံၚ်ဇြဟတ် ဂွံဂွံအခေါၚ်သဳကၠဳ ကုညးမၞုံတာလျိုၚ် နူကဵုဂကောံရပ်လွဟ်ဇြဟတ်ဇၞော်အိုတ် ပ္ဍဲသဳရဳယျာဂှ်ရောၚ် တမ်ရိုဟ်ပရိုၚ်ထံၚ်ပရိုၚ် အမေရိကာန်ကဵု ဍုၚ်ပလိုတ်တံ ဟီုရ။
နကဵုရုယှာ ဆက်စၠောံလဝ်ကဵု ဒပ်ပၠန်ဂတး နွံပ္ဍဲဒမာတ်သကာတ်တံဂှ်ရောၚ် ညးမၞုံအခေါၚ်ဟီုဂး နန်ကရေမ္မလေန် ဒဳမဳထရဳ ပက်သကပ် ဟီုလဝ် ပ္ဍဲပေါဲသောၚ်ကလးလိက်ပရိုၚ် သတ္တာဟတုဲကၠုၚ်တေံရ။
ကောန်ဒပ်ညးတံ နွံဒၟံၚ် ပ္ဍဲစမြိုၚ်ဂှ်ဖိုဟ်ဂှ်တုဲ ဒးကေတ်အာအဆက် ကုဂကောံမထိၚ်ဒက်လဝ်ဗလးတိ ပ္ဍဲသဳရဳယျာတံဂှ်ဏောၚ်ဂှ် ညးမၞုံအခေါၚ်ဟီုဂးနန်ဂှ် ဟီုရ။
ကပေါတ်ပၞာန် အရပ်စပ်သွက်ဒပ်ဍာ် နွံပ္ဍဲသဳရဳယျာတံဂှ် ဆုဲပြံၚ်ဒၟံၚ် ပ္ဍဲဍုၚ်လေတ်ပျာရောၚ် သၞာဲဒဴအမေရိကာန်ဂမၠိုၚ် ဟီုလဝ်ရ။
သၞေဟ်ပ္ဍဲဍုၚ်ဗာန်ဂါဇြဳမွဲ ရုယှာဟီုလဝ် ရုယှာတံပိုၚ်ပြဳလဝ်ဂှ် ညံၚ်ဂွံချိုတ်ပၠိုတ်ဂှ် ရုယှာ ကဵုဒၟံၚ်ဇြဟတ်ဂရိုဟ် ကုသ္ကိုပ်ဒပ် ခါလဳဖာ ဟာဖတာ နူဒပ်ပၞာန်ကောန်ဂကူလေတ်ပျာဂှ်ရောၚ် သၞာဲဒဴကာစဵုဒၞါအမေရိကာန်မွဲတၠ ဟီုလဝ်ရ။
သၞေဟ်တာတုတ် ပ္ဍဲသဳရဳယျာဂှ် ဒးဗလးလဝ်တဲတုဲ ပ္ဍဲလေတ်ပျာ ယဝ်ဟွံပိုၚ်ပြဳသၞေဟ်ရပုဟ်ဟီုမ္ဂး နကဵုဒပ်ဍာ်ရုယှာ ဂွံတာဒၞါ ဂကောံယာန်ဍာ် သ္ကုတ်သၠုၚ်ကျာ ဂကောံနေတိုဝ်တံဂှ် ပ္ဍဲၜဳအပ္ဍဲတိဂှ် သၞေဟ်ဟွံမွဲ ဒှ်အာမာန်ဂှ် သၞာဲဒဴအမေရိကာန်ဂမၠိုၚ် ဟီုရ။
ၜိုတ်ဆဒးဆောံလေၚ်အာသၞေဟ် ပ္ဍဲဍုၚ်သဳရဳယျာညိကီုဂှ် နကဵုရုယှာ ဂွံပလံၚ်ဗစိုပ်ကပေါတ်ဟွံလုပ်သၞောဝ် ပ္ဍဲအာဖရိကဂှ် ခက်ခုဲအာဏောၚ်ဂှ် သၞာဲဒဴအမေရိကာန်ဂမၠိုၚ် ဟီုရ။
Ref: CNN