ပ္ဍဲလှာဒကှ် လွဟ်ဇၞော်စှ်ေတုဲ ကောန်အရာပ်မွဲတၠ ချိုတ်တုဲ၊ ၜါတၠ ကလိဂွံဝပ်

လှာဒကှ်၊ ဒဳဇြေမ်ဗာ ၂၀

ဟိုတ်နူဒပ်ကံၚ်ဇြဳပၞာန် ပန်ပှော်ကၠုၚ်လွဟ်ဇၞော်ကြာန်န် ပ္ဍဲကွာန်(ဝင်းထောင်း) ပွိုၚ်ဍုၚ်လှာဒကှ် တွဵုရးကရေၚ်ဂှ်တုဲ ကောန်အရာပ်မွဲတၠ ချိုတ်တုဲ ၜါတၠ ဇီုကပိုက်ကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ် ပ္ဍဲဂိတုဒဳဇြေမ်ဗာ ၁၇ တေံ ကရောၚ်ပၞာန်ဒပ်ကံၚ်ဇြဳပၞာန် မကဵုကၠုၚ်ပၞာန်ရီု ဇရေၚ်ဗျူဟာအနာန်ကွေန်ဂှ်ဝွံ ပန်ပှော်ကၠုၚ်လွဟ်ဇၞော်ကြာန်န် နူကဵုကွာန်လှာၜိုပ်ဂှ်တုဲ ပ္ဍဲကွာန်(ဝင်းထောင်း) ဂှ် ပရေၚ်ဗ္တိုဟ်ထ္ကးက္တဵုဒှ်အာလဝ်ရ။

ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ ဥူအံၚ်ချေတ် အာယုက် ၇၀ သၞာံ နွံဒၟံၚ်ပ္ဍဲသ္ၚိဂှ်ဝွံ ချိုတ်အာပ္ဍဲဒၞါဲဂှ်ရတုဲ ဒဝ်မူလေန်ကျဳ ဒဝ်ကျဳပ အာယုက်မၞုံ ၅၀ သၞာံတံ ဇီုကပိုက်ကလိဂွံအာလဝ်ဝပ်ရ။

အတိုၚ်ဂလာန်ညးဒေသတံဂှ်မ္ဂး ဒပ်ကံၚ်ဇြဳပၞာန် ပန်ပှော်လဝ်လွဟ်ဇၞော်ဂှ်ဝွံ ဒှ်ကရောၚ်ပၞာန် နူဒပ်ဝါကလိ ပွိုၚ်ဍုၚ်ဇြပ်ဗု မကၠုၚ်ကဵုအရီုပၞာန် ပ္ဍဲဗျူဟာအနာန်ကွေန်ဂှ်ရောၚ် ဂွံတီကေတ်ရ။

ဒပ်ကံၚ်ဇြဳပၞာန်ဝွံ ညံၚ်ဗျူဟာအနာန်ကွေန် ဒပ်ပံၚ်ကောံ ဂကောံဇြဟတ်ပၠန်ဂတးတံ မဗိုၚ်ဗ္တိုက်ဒၟံၚ်ဂှ် ဟွံဂွံစှ်ေအာဂှ် ဗလးလဝ်ပၞာန်အရီု ဇြဟတ်ဗ္ဒါဲ ၂၀၀ ရ။

ဟိုတ်နူဒပ်ကံၚ်ဇြဳပၞာန် ဗလးလဝ်ပၞာန်အရီုဂှ်တုဲ ပ္ဍဲဒေသအနာန်ကွေန်ဂှ် ပေါဲဗ္တိုက်က္တဵုဒှ်ဒၟံၚ် အရိုဟ်ဒဒှ်တ္ၚဲတုဲ ညးဍုၚ်ကွာန်ဒေသ ဂၠိုၚ်ကဵုလ္ၚီ ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−CJ