ဝါယှေန်တာန်၊ ဒဳဇြေမ်ဗာ ၂၂
သမ္မတအမေရိကာန် ဂျဵုဗိုၚ်ဒေန် မဒစးဒုၚ်ပလေဝ်ပလေတ်လဝ် သွက်ဂွံတိတ်စ္ဍးအာ နူကဵုရုၚ် ကၠာပေါဲယဵုဒုၚ်သစ္စာဒဝ်နေဝ်ထြာပ် ပ္ဍဲဂိတုဂျာန္နဝါရဳဏံ ဟွံဂွံစိုပ်ဂှ် ပ္ဍဲဂိတုဒဳဇြေမ်ဗာ ၂၀ ဂှ် ဒဒှ်ရထပ်ကဵုလဝ်အခေါၚ် သွက်ဂွံကဵုအရီုဗၚ်ပရေၚ်စဵုဒၞါ သွက်ထိုၚ်ဝါန် ၅၇၁ ပြကောဋိကိုဋ်ဒဝ်ဠာဂှ် သ္ၚိဗု ဟီုလဝ်ရ။
နကဵုပရေၚ်ကလုတ်တမာန်ဂှ် အမေရိကာန် ဟွံသ္ပလဝ်စၟတ်သမ္တီ ကုထိုၚ်ဝါန် ဗွဲမလုပ်သၞောဝ်ကီုလေဝ် ဒှ်မဟာမိတ်စှ်ေကဵုဗျူဟာ ကၟိန်ဍုၚ်တ္ကအ် မအုပ်ဓုပ်ဒၟံၚ်ကေတ်တ်ဂှ်တုဲ သီုဒှ်ဍုၚ်ထံက်ပၚ်ကဵုဒၟံၚ်လွဟ် အဓိကမွဲရ။
ပ္ဍဲသၞာံတုဲကၠုၚ် ဟွံလအ်တံဏံဂှ် ဍုၚ်ကြုက်ကဵုကၠုၚ်ဒၟံၚ်ဇြဟတ်ဂရိုဟ် ကုထိုၚ်ဝါန် သီုပရေၚ်ဍုၚ်ကွာန် သီုပရေၚ်ပၞာန် မသၠုၚ်ပ္တိုန်ဒၟံၚ်အသိၚ်ဂှ် ကဵုကၠုၚ်လဝ်သတိ ကုအမေရိကာန် သွက်ဂွံဒေါအ်ဒေၚ်ကဵုပရေၚ်ထံက်ပၚ်ကဵုဒၟံၚ်လွဟ်လက်နက်တံဂှ် ဂၠိုၚ်ၚ်ကဵုဝါရ။
အလဵုအသဳကြုက်ဂှ်တှ်ေ ထိုၚ်ဝါန်ဝွံ ဒှ်ဒေသညးတံပိုၚ်ပြဳလဝ်ဏောၚ် ဟီုလဝ်တုဲ ညံၚ်ဂွံကလေၚ်စွံ သၟဝ်အုပ်ဓုပ်ညးတံဂှ် နွံပၟိက်မ္ဂး ရပ်စပ်အာဇြဟတ်ပၞာန်တံဏောၚ်ဂှ် ဟီုလဝ်ရ။
ကြုက်ဝွံ ပ္ဍဲသတ္တာဟတုဲကၠုၚ်တေံ ကၠောန်ကၠုၚ်လဝ် ပွပ္ကတ်ပ္ကေၚ်ပရေၚ်ပၞာန်ဇၞော်အိုတ်ဂှ်ရောၚ် သၞာဲဒဴထိုၚ်ဝါန်တံ ဟီုလဝ်ရ။
နူဗ္ဒါဲတ္ကအ်သ္ကုတ်သၠုၚ်ကျာဍုၚ်ဂျပါန် စဵုကဵုၜဳကြုက်သၠုၚ်ကျာဂှ် ကြုက် ဖျေံလဝ် က္ၜၚ်ပၞာန် ဗၞတ် ၉၀ ဖ္ဍိုက်ဂှ် ဂွံတီကေတ်ရ။
စပ်ကဵုပရေၚ်ပ္ကတ်ပ္ကေၚ်ပရေၚ်ပၞာန်တံဂှ်တုဲ အလဵုအသဳကြုက် သ္ပဒတန်ဟီုဂးလဝ် ဟွံမွဲရ။
သမ္မတဒဳမဝ်ကရေတ်တေတ် ဗိုၚ်ဒေန် ဒဒှ်ရကဵုအခေါၚ် သွက်ဂွံကဵုအရီုဗၚ်ပရေၚ်ပၞာန် သွက်ထိုၚ်ဝါန် ၅၇၁ ဒဿမ ၃ ပြကောဋိကိုဋ်ဒဝ်ဠာဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးသ္ၚိဗုဂှ်ကီုလေဝ် ထ္မံက်ထ္ၜးလဝ် ဗွဲလစှ်ဂှ်ေ ဟွံမွဲရ။
ကြဴနူအမေရိကာန် ပအပ်ကဵုလဝ်ထိုၚ်ဝါန် ၅၇၆ ပြကောဋိကိုဋ်ဒဝ်ဠာ ကုထိုၚ်ဝါန်တုဲဂှ် ဟွံဂွံပေၚ်ပိဂိတုဏီဂှ် ဒဒှ်ရထပ်ကဵုလဝ်အရီုဗၚ်သြန်လှုဲတံဂှ် လလောၚ်တြးလဝ်ရ။
ပရေၚ်ထံက်ပၚ်ဍုၚ်သ္အာၚ် မပအပ်ကဵုလဝ်ထိုၚ်ဝါန်တံဂှ် နူကဵုဍုၚ်ကြုက် လေပ်ခၠေဝ်ပၠန်ကၠုၚ် သီုဒေါသမဇၞော်တုဲ အမေရိကာန်ဝွံ လုပ်ပထုဲဒၟံၚ် ပ္ဍဲကာအပ္ဍဲဍုၚ်ညးတံဂှ်ရောၚ် စောဲစပ်လဝ်ရ။
ကြုက်ဂှ်တှ်ေ ကရပ်ထိုၚ်ဝါန်ဂှ် ဗလးဒၟံၚ်က္ၜၚ်ပၞာန်၊ ဒရုၚ် ကေုာံ က္ၜၚ်ကျာပၞာန်တံ ကြပ်လၟေၚ်တ္ၚဲရ။
Ref: AFP