ကိဗ်၊ ဒဳဇြေမ်ဗာ ၂၆
ကောန်ပၞာန်ကိုဝ်ရဳယျာသၟဝ်ကျာ ၃၀၀၀ ပြၚ် မဗ္တိုက်ဒၟံၚ် ကရောံဒပ်ရုယှာ ပ္ဍဲဒေသကာသ် အိုဝ်ဗလက်ဂှ် ဒးပြဟ်လလုဲအာ ဟွံသေၚ်မ္ဂး ကလိဂွံဝပ်တံ နွံလဝ်ရောၚ် သမ္မတယူကရုၚ် ဗလဴဒဳမာ ဇြဳလာန်သကဳ ဟီုလဝ် ပ္ဍဲဂိတုဒဳဇြေမ်ဗာ ၂၃ တေံရ။
သွက်ဂွံဗလးကောန်ပၞာန်၊ လွဟ်လက်နက် ဇရေၚ်ရုယှာတံဂှ် ကိုဝ်ရဳယျာသၟဝ်ကျာ စဳဇန်ဒၟံၚ်ရောၚ် ကိုဝ်ရဳယျာသၠုၚ်ကျာ ကဵုကၠုၚ်လဝ်သတိ နူအခိၚ်ကာလပြဟ်ဟ်တေံရ။
ပ္ဍဲဒေသကာသ် ဍုၚ်ရုယှာဂှ် ကောန်ပၞာန်ကိုဝ်ရဳယျာသၟဝ်ကျာ ဗ္တိုက်ဒၟံၚ်ကရောံဒပ်ရုယှာတံ ချိုတ်အာကီု လၟိဟ်ဇီုကပိုက်ကလိဂွံဝပ်တံကီုဂှ်ဝွံ ၃၀၀၀ ပြၚ်အာယျဂှ် သမ္မတဇြဳလာန်သကဳ ဟီုလဝ်ရ။
ပရေၚ်ပံၚ်တောဲရေၚ်တၠုၚ် အကြာရုယှာကဵု ကိုဝ်ရဳယျာသၟဝ်ကျာတံ ဂၠိုၚ်ကၠုၚ်သာ်ဏံဂှ် က္တဵုဗဒှ်ကဵုအန္တရာယ် ကုတ္ကအ်ကိုဝ်ရဳယျာ ကေုာံ ဒေသပွဳပွူဗ္ဒါဲဗ္ဒါဲတံ ညံၚ်ဟွံဂွံညိၚ်ဝတ် ဒှ်မာန်ရောၚ် သမ္မတဂှ် ကဵုလဝ်သတိရ။
ဟိုတ်နူကိုဝ်ရဳယျာသၟဝ်ကျာ ပလံၚ်ဗစိုပ်လွဟ်လက်နက် ကေုာံ ကောန်ပၞာန် ဇရေၚ်ရုယှာတံဂှ်တုဲ အန္တရာယ်နွံဒၟံၚ်တုဲ နကဵုညးတံ ဗီုဒးရး ခၠေဝ်ပလန်အာဏောၚ်ဂှ်လေဝ် ဇြဳလာန်သကဳ ဟီုဗပေၚ်စုတ်လဝ်ရ။
ပ္ဍဲကဵုအစဳဇန် ကိုဝ်ရဳယျာသၟဝ်ကျာ ထပ်ပလံၚ်အာအရီုဗၚ် သွက်ရုယှာဂှ် မ္ၚးနူကဵုလွဟ်လက်နက်ပၞာန် ကေုာံ ကောန်ပၞာန်တံဂှ် ဒရုၚ်ခါမဳခါဇြဳ ( ဒုၚ်ဂစိုတ်) တံဂှ်လေဝ် ပါလုပ်ဏောၚ်ဂှ် ဌာန်ပရိုၚ် Yonhap နိဿဲကေတ် သ္ကိုပ်က္ဍိုက်ပ်ပၞာန်ကိုဝ်ရဳယျာသၠုၚ်ကျာတုဲ ထ္မံက်ထ္ၜးလဝ်ရ။
ကိုဝ်ရဳယျာသၟဝ်ကျာ ပလံၚ်ဗစိုပ်လဝ် လွဟ်ဇၞော် ဇရေၚ်ရုယှာတုဲ သွက်ဂွံလှာဲကဵု ကောန်ပၞာန်ညးတံ နွံဒၟံၚ်ပ္ဍဲရုယှာတံဂှ်ကီု သွက်ဂွံဗပေၚ်ဇြဟတ် ဒဒှ်ရပလေဝ်ပလေတ်ဒၟံၚ်ဂှ် ပရိုၚ်ထံၚ်ပရိုၚ်ဂမၠိုၚ် ထ္မံက်ထ္ၜးဒၟံၚ်ရောၚ် ကိုဝ်ရဳယျာသၠုၚ်ကျာ သ္ဂးရ။
ကောန်ပၞာန်ကိုဝ်ရဳယျာသၟဝ်ကျာ ဗၞတ် ၁၂၀၀၀ စိုပ်ဒၟံၚ်ရုယှာရောၚ် ယူကရုၚ်၊ အမေရိကာန် ကေုာံ ကိုဝ်ရဳယျာသၠုၚ်ကျာတံ ဟီုလဝ်ရ။
ရုယှာဂှ်တှ်ေ ပ္တိတ်ကဵုလဝ် ကောန်ပၞာန်ကိုဝ်ရဳယျာသၟဝ်ကျာတံ တၞးကာတ်ဒုၚ်သက်သဳပတောံ မပ္တံကဵုယၟုရုယှာ၊ ဒၞါဲဒှ်မၞိဟ်တံဂှ်ရောၚ် ယူကရုၚ် ဟီုလဝ်ရ။
ပ္ဍဲကဵု online post ဂကောံပြုပြေၚ်ပၞာန်ယူကရုၚ် ဗွဲတၟေၚ်မွဲဂှ်မ္ဂး ထ္မံက်ထ္ၜးလဝ် တၞးကာတ်သက်သဳပတောံဍုၚ်ရုယှာ မသီဂွံလဝ် ပ္ဍဲကောန်ပၞာန်ကိုဝ်ရဳယျာသၟဝ်ကျာ ၃ တၠ မရပ်ဂွံလဝ်ချိုတ်တ် ပ္ဍဲဒေသကာသ်ဂှ်ရ။
Ref: Euro News