မဝ်သကိုဝ်၊ ဒဳဇြေမ်ဗာ ၂၈
ကသပ်ဂၞန်ဂကောံထံၚ်ပရိုၚ်ယူကရုၚ် သွက်ဂွံကၠတ်ဂစိုတ် စွံပွန်ကုသၞာဲဒဴရုယှာကဆံၚ်သၠုၚ်တံကဵု ဂြောဝ်ဂတာညးတံ မၞုံပ္ဍဲဍုၚ်မဝ်သကိုဝ် နကဵုဗုမ် မပလဝ်ပၞ Power bank တံကဵု ဖိုၚ်သီစွံတၞးလိက်တံဂှ် ဒဒှ်ရတာဒၞါဂွံလဝ်ဂှ် ဌာနဂီုကၠီုဖေဝ်ဒရာရုယှာ ဟီုကၠုၚ်လဝ် ပ္ဍဲဂိတုဒဳဇြေမ်ဗာ ၂၆ တေံရ။
ပ္ဍဲဂိတုဒဳဇြေမ်ဗာ ၁၇ တုဲကၠုၚ်တေံ ကုဇၞော်သ္ကိုပ် ဒပ်စဵုဒၞါလွဟ်နျူကလဳယျာ၊ လွဟ်ဇဳဝ ကေုာံ လွဟ်ဓာတု ဍုၚ်ရုယှာ ဒုသ္ကိုပ်ဗိုလ်ဇၞော် ကဳရဳလပ်ဂှ် ဌာနထံၚ်ပရိုၚ်ယူကကရုၚ်တံ ဗဒေါအ်လဝ်ကွဳလိုန်စက်သကူတာမွဲဖ္ဍိုက် မပါမ်စုတ်လဝ်ဗုမ် မ္ၚးသ္ၚိညးဂှ်တုဲ ဖံက်ခတိုဟ်လဝ် နကဵု remote control တုဲ ကၠတ်ကၠောန်သ္ပလဝ်ပရေၚ်ဂစိုတ်တံရ။
လက္ကရဴပရေၚ်ဗ္တိုက်ဏံဂှ် ဒဒှ်ရဌာနထံၚ်ပရိုၚ်ယူကရုၚ် ပါလုပ်လဝ်ရောၚ်ဂှ် သ္ပဒတန်လဝ်ဂှ် ဌာန်ပရိုၚ်ရိုက်တာ ထ္မံက်ထ္ၜးလဝ်ရ။
ပရေၚ်ကၠတ်ဂစိုတ်ဏံဂှ်ဝွံ ဒှ်ပွပကီုပရာပ် လ္ပာ်ယူကရုၚ်တံဏောၚ်ဂှ် လ္ပာ်ရုယှာ ဟီုလဝ်တုဲ ကလေၚ်အာတဲဏောၚ်ဂှ် ဟီုကြီုလဝ်ရ။
ကသပ်ဂၞန်ဌာနထံၚ်ပရိုၚ်ယူကရုၚ် မပ္တိတ်ကၠုၚ်ဇြဟတ် သ္ဂောံကၠတ်ဂစိုတ် သၞာဲဒဴကဆံၚ်သၠုၚ် နူကဵုဌာနဝန်ဇၞော်ကာစဵုဒၞါရုယှာ ဗွဲမဂၠိုၚ်ဂှ် တာဒၞါကၠုၚ်မာန်လဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ဌာနပရေၚ်ဂီုကၠီုရုယှာရ။
ပ္ဍဲအရာချပ်ကၠုၚ်သ္ဂောံဗ္တိုက်သာ်ဏံဂှ် ကောန်ဍုၚ်ရုယှာပန်တၠ မပါလုပ်လဝ်ဂှ်လေဝ် ရပ်လဝ်တုဲယျဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဂွံကၠောန်ပရေၚ်ဗ္တိုက်သာ်ဏံဂှ် ဌာနထံၚ်ပရိုၚ်ယူကရုၚ် စန်ဒက်ပကောံပကေဝ်ဒၟံၚ် ကောန်ဍုၚ်ညးတံဏောၚ်ဂှ် ဌာနထံၚ်ပရိုၚ်ရုယှာ ဟီုရ။
ကပေါတ်မသီဂွံမွဲဂကူ နူကဵုဒၞါဲမဂ္စါန်ဗ္တိုက်ကၠုၚ် သၞာဲဒဴကဆံၚ်သၠုၚ် ဌာနဝန်ဇၞော်ကာစဵုဒၞါရုယှာ နွံပ္ဍဲမဝ်သကိုဝ်တံဂှ်ဝွံ ဒဒှ်ရဒှ်ဒၟံၚ်ဗုမ် မပလီုလဝ်ရုပ်ရဴ နဒဒှ် power bank ကေတ်ဏာကေတ်နၚ်ဂွံမွဲဏောၚ်ဂှ် ဌာနထံၚ်ပရိုၚ်ဂှ် ဟီုရ။
တ္ၚဲမစဳဇန်လဝ် သ္ဂောံကၠောန်သ္ပပရေၚ်ဗ္တိုက်သာ်ဏံဂှ် ဟွံဂွံတီကေတ် ချိုတ်တ်ပၠိုတ်တ်ကီုလေဝ် ညးမၞုံသံသယမွဲတၠဂှ်တှ်ေ ဒဒှ်ရညးဂွံဒုၚ်ကေတ်လဝ်တဲ ကပေါတ်ဖံက်ထ္ကး မရပ်စပ်အာ ပ္ဍဲဒၞါဲဗ္တိုဟ်ထ္ကးတံဂှ် ဒှ်ပ္ဍဲဂိတုဒဳဇြေမ်ဗာ ၂၃ ဂှ် ဟီုပ္တိတ်လဝ်ရောၚ် ဌာနထံၚ်ပရိုၚ်ရုယှာ ဟီုရ။
Ref: Reuters