ၜၚ်ကံက်၊ ဒဳဇြေမ်ဗာ ၂၉
ပ္ဍဲဍုင်သေံ နကဵုညးမဗ္ၜူအရက် ဒဳယာန်တအ်ဂမၠိုၚ် ခြာဟွံလအ် ဒဒှ်ရဒးဆေၚ်အာမုက် ကုဒုဟ်ဒဏ်မသ္ကာတ်မြဟ်တံရောၚ်ဂှ် ဝန်ဇၞော်ပရေၚ်ပလံၚ်ဗစိုပ် သူရဳယျာ ဂျောန်ယမ်ရဳယာန်ကေတ် လလောၚ်တြးလဝ်ရ။
ရန်တၟံကဵု ဂွံဖအောန်ဖျေံ ပရေၚ်ယာန်ကွဳစက်ဇီုဒး ဂွံဘဲဂမၠိုၚ်ဂှ်တုဲ သွက်ဂွံစၞောန်ပျးသၞောဝ်မတေၚ်ဂြတ်တံဂှ် အလဵုအသဳသေံ စဳဇန်ဒၟံၚ် သ္ဂောံပံၚ်တောဲရေၚ်တၠုၚ်အာကဵု ဌာနဝန်ဇၞော်ကာအပ္ဍဲဍုၚ်ရ။
ဗွဲတၟေၚ် ဗ္ၜူအရက်တုဲ ဒဳယာန်ကီု၊ ဟိုတ်နူသမာတ်ဖုၚ်တုဲ အာရီုပြးသတိပြးအာဂှ်ကီု၊ အခိၚ်ဒဳဒၟံၚ်ယာန် မတ်ဒကုဲကီု၊ ဒဳအသိၚ်မလောန်ကဵုဗၞတ်ဂှ်ကီု ကေုာံ ဟိုတ်နူဝးပ္ကဝ်စေဝ်ပၞောန်ယာန် တၞဟ်သ္အာၚ်တံဂှ်တုဲ စပ်ကဵုပရေၚ်ယာန်ကွဳစက်ဇီုဒး က္တဵုဒှ်ဒၟံၚ်တံဂှ်တုဲ အရာမဒှ်ဓဝိၚ်ဂၠိုၚ်ကၠုၚ်ဂှ် ဝန်ဇၞော် သူရဳယျာ ဟီုရ။
အတိုၚ်စရၚ်အၚ်ဂကောံ “ဗ္ၜူအရက်မ္ဂး လ္ပဒဳကွဳစက်” ဂှ်မ္ဂး ပ္ဍဲကဵုအခိၚ်အခါသမယကၠောံသၞာံ ပ္ဍဲသၞာံတုဲတေံဂှ် ဟိုတ်နူယာန်ကွဳစက်ဂမၠိုၚ် ဇီုဒးညးသ္ကအ်ဂှ်တုဲ မၞိဟ် ၂၈၄ တၠ ချိုတ်တုဲ ညးမကလိဂွံဝပ် ၂၃၀၇ တၠ နွံဂှ် ဂွံတီကေတ်ရ။
နူကဵုဌာနဝန်ဇၞော်ပရေၚ်ပလံၚ်ဗစိုပ် ဒဒှ်ရသ္ကိုပ်သ္ကပ္တိတ်ဒၟံၚ်ဇြဟတ် သွက်ဂွံဂ္စါန်ပလေဝ်သၞောဝ် စပ်ကဵုစေဝ်ပၞောဝ်ယာန်တံဂှ် ဝန်ဇၞော် သူရဳယျာ ဟီုရ။
ပ္ဍဲအရာတာဒၞါ ယာန်ဇီုက္တဵုဒှ်ဘဲတံဂှ် ဒုဟ်ဒဏ်မရုပ်သီလဝ်မွဲချိုန်ခဏတံဂှ် ပလီုကၠေံတုဲ ညးဗ္ၜူအရက်တုဲ ဒဳယာန်တံဂှ် သွက်ဂွံဖျေံစၟတ်အာ ဒုဟ်ဒဏ်မသ္ကာတ်မြဟ်တံဂှ် ပလေဝ်အာသၞောဝ်တံဏောၚ် ဟီုရ။
သၞောဝ်ရပ်စပ်ကၠုၚ် ပ္ဍဲဍုၚ်သေံ အာယုက်မၞုံ ၂ သၞာံတံဂှ်ဝွံ ဂွံကေတ်အာအရေဝ် သွက်ပွမကလိလောန်ဒးဒုဟ်ဒဏ် ဂၠိုၚ်ၚ်ကဵုဝါတံဂှ် ဟွံစိုပ်တရဴဒှ်ဒၟံၚ်ရောၚ် ဝန်ဇၞော်သူရဳယျာ ဟီုရ။
ညးဂမၠိုၚ် ဂွံဒ္ဂေတ်ဗက်သၞောဝ်ဂၠံၚ် သၞောဝ်ယာန်တံဂှ် ပ္ဍဲအရာထ္မံက်ရုပ်ရဴသၞောဝ်တံဂှ် ဇြဟတ်ဒးခိုဟ်ဏောၚ် ဝန်ဇၞော်ဂှ် ထံက်ထ္ၜးလဝ်ရ။
ချူခၞံသၞောဝ်အပြောံတုဲဗက် သွက်ဂွံသ္ပဒတန်ဂှ် ပ္တိုန်ထ္ၜးအာ ဇရေၚ်ဂကောံဝန်ဇၞော်ဂမၠိုၚ်ဏောၚ် ညးဟီုဗပေၚ်လဝ်ရ။
တၚ်ရန်တၟံအဓိကဂှ်တှ်ေ အခိၚ်အခါကာလကၠောံသၞာံဏံ ဂွံဖအောန်ဖျေံ ပရေၚ်ယာန်ဇီုတံဏောၚ်တုဲ ဗွဲကြဴအိုတ် အပ္ဍဲကာလဏံ ညံၚ်ယာန်ဇီုဒးတံဟွံဂွံမွဲဂှ် အလဵုအသဳသေံ ရေၚ်တၠုၚ်အာဏောၚ် မဒှ်ရ။
ပ္ဍဲဍုၚ်သေံဂှ်တှ်ေ အခိၚ်ကၠောံသၞာံဂှ် ဒှ်အခိၚ်အခါယာန်ဇီုဂၠိုၚ်အိုတ်တုဲ ဗွဲမဂၠိုၚ်ဝွံ ဟိုတ်နူဗ္ၜူအရက်တုဲ ဒဳယာန်၊ ဒဳကၠုၚ်အသိၚ်လောန်ကဵုဗၞတ်တံဂှ်တုဲ ဒှ်လဝ်ဂှ် ဂွံတီတေကတ် အတိုၚ်တၚ်မထ္မံက်ထ္ၜးလဝ် ပ္ဍဲဂကောံ “ဗ္ၜူအရက်မ္ဂး လ္ပဒဳယာန်” ဂှ်ရ။
Ref: Bangkok Post/ The Thaiger