ဘာကူ၊ ဒဳဇြေမ်ဗာ ၃၁
က္ၜၚ်ကျာညးအာတရဴအဇြာဗိုၚ် လီုစှ်ေတုဲ မၞိဟ်မဂၠိုၚ်ဂၠေၚ် မဒးပြဟ်လလုဲအာလဝ်ဂှ် ဟိုတ်တမ်ရိုဟ်ဍေံဂှ် ကိုပ်ကၠာဏံ ရုယှာဂ္စါန်ကၟာတ်လဒဵုလဝ်ရောၚ် သမ္မတအဇြာဗိုၚ် အဳဟာမ် အလဳယပ် စောဲစပ်လဝ်တုဲ နကဵုမဝ်သကိုဝ် သွက်ဂွံဒုၚ်ဝန် ဒဒှ်ရညးတံပန်ဖျေံလဝ်ဂှ် ပ္ဍဲဂိတုဒဳဇြေမ်ဗာ ၂၉ ဂှ် ဟီုလဝ်ရ။
က္ၜၚ်ကျာ AZAL Embraer 190 ဝွံ လီုစှ်ေအာလဝ် ပ္ဍဲဍုၚ်ကာဇြက်သတာန်တုဲ ပ္ဍဲကဵုမၞိဟ်မပါကၠုၚ်လ္တူက္ၜၚ်ကျာ ၆၇ တၠဂှ် ၃၈ တၠ ဒးချိုတ်အာလဝ်ရ။
က္ၜၚ်ကျာလီုစှ်ေတုဲ ဂွံပန်တ္ၚဲ အပ္ဍဲကဵုအေန်တာဗျူ မသ္ပလဝ်ကုဌာန်ပရိုၚ်ကၟိန်ဍုၚ်ပိုၚ် ပ္ဍဲသၞေဟ်က္ၜၚ်ကျာ ဍုၚ်ဘာကူဂှ် သမ္မတ အလဳယပ် စောတ်စောဲကၠုၚ်လဝ်သာ်ဏံရ။
သၞာဲဒဴအဇြာဗိုၚ်တံဂှ်တှ်ေ အခိၚ်က္ၜၚ်ကျာဏံ ဂ္စါန်စှ်ေပ္ဍဲဍုၚ်ဇၞော် ဂရိုဝ်သနဳ ကၟိန်ဍုၚ်ရုယှာဂှ် နူကဵုသၞောတ်စဵုဒၞါဘဲပၞာန်ကျာရုယှာတံ ပန်ဖျေံလဝ်က္ၜၚ်ကျာဏံရောၚ် သာ်ဝွံ သ္ဂးရ။
ဌာနဝန်ဇၞော်ပရေၚ်ပလံၚ်ဗစိုပ် နွံပ္ဍဲဍုၚ်ကာဇြက်သတာန်ဂှ်တှ်ေ ဂွံလ္ၚတ်စၟဳတ်အာ Black Box က္ၜၚ်ကျာဏံဂှ် ဒဒှ်ရပလံၚ်ဗစိုပ်ဏာ ဇရေၚ်ဍုၚ်ဗရာဇြဳ ဍုၚ်မကၠောန်ပ္တိတ်လဝ်က္ၜၚ်ကျာ Embraer ဏံဂှ်ဏောၚ်ဂှ် ပ္ဍဲဂိတုဒဳဇြေမ်ဗာ ၂၉ တေံ ဟီုလဝ်ရ။
သမ္မတအဇြာဗိုၚ် အလဳယပ်ဂှ် ဆက်စၠောံသဳကၠဳလဝ် ကုသမ္မတရုယှာ ဗလာဒဳမာပူတေန် နကဵုဖုၚ်တုဲ ဂွံမွဲတ္ၚဲတုဲဂှ် ဟွံကေၚ်ကၠောန်မွဲလှ်ေ စောဲစပ်ကၠုၚ််လဝ် ရုယှာ မဟာမိတ်ဍုၚ်ညးတံဂှ်ရ။
အပ္ဍဲကဵုတက်ကျာဟီုဂးလဝ်ဂှ် လက္ချန်ဟီုဂးလဝ် ဒဒှ်ရသမ္မတပူတေန် တာလျိုၚ်နွံ သွက်ပရေၚ်က္ၜၚ်ကျာ မဒတုံပြဟ်အာဂှ် ဟွံဂွံဆဵုကေတ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး နန်ကရေမ္မလေန်ဂှ်ရ။
က္ၜၚ်ကျာအဇြာဗိုၚ် က္ၜၚ်ကျာကောန်အရာပ်ဂှ်ဝွံ လီုစှ်ေအာ မ္ၚးတွဵုဒၞက်တိဍာ်ရုယှာ ဗ္ဒါဲဍုၚ်ဂရိုဝ်သနဳဂှ်တုဲ ထိၚ်ဟွံဂွံတုဲ ဒှ်အာလဝ်ရောၚ် အလဳယပ် ဟီုဂးလဝ် ကုထဳဝဳကၟိန်ဍုၚ်ပိုၚ်ရ။
ဟိုတ်နူပန်နၚ် နူဗလးတိဂှ်တုဲ ဍုတ်က္ၜၚ်ကျာဂှ် လီုစှ်ေအာတုဲ မွဲအခိၚ်ဓဝ် သၞောတ်အဳလက်ထရောန်နေတ်က္ၜၚ်ကျာဂှ် ထိၚ်ဟွံမာန်တုဲ ဒှ်အာလဝ်ရောၚ် သမ္မအဇြာဗိုၚ်ဂျာန် ဟီုရ။
တ္ၚဲက္ၜၚ်ကျာဏံ လီုစှ်ေဂှ် ယူကရုၚ် ဗ္တိုက်လဝ်ဍုၚ်ဂရိုဝ်သနဳ နကဵုဒရုၚ်ရောၚ် သၞာဲဒဴရုယှာဂမၠိုၚ် ဟီုလဝ်ရ။
ရုယှာဂှ်တှ်ေ ဂ္စါန်ကၟာတ်လဒဵုဒၟံၚ် ဟိုတ်ပရူပရာ က္ၜၚ်ကျာမဒးလီုစှ်ေလဝ်ဂှ်ရောၚ် သမ္မတ အလဳယပ် ဂးရ။
တုဲကၠုၚ်ၜါတ္ၚဲတေံရ နကဵုရုယှာ ဂွံကလေၚ်အာတ်ဒုၚ်ဂုန် ဂတညးဂမၠိုၚ်ဂှ် လ္ပာ်အဇြာဗိုၚ် အာတ်မိက်လဝ်တုဲယျဂှ် သမ္မတ သ္ဂးရ။
ကိုပ်ကၠာအိုတ် ရုယှာ ဒးအာတ်ဒုၚ်ဂုန် အဇြာဗိုၚ်ဏောၚ်တုဲ ဒဒှ်ရညးတံ မၞုံကဵုဒုဟ်ဂှ် ဒးသ္ပစၟတ်သမ္တီဏောၚ်တုဲ တတိယဂှ်တှ်ေ ဒးကဵုအာဒုဟ်ဒဏ် ကုညးတာလျိုၚ်နွံတံဏောၚ်ဂှ် သမ္မတ အလဳယပ် ဟီုလဝ်ရ။
အပ္ဍဲကဵုသမ္မတၜါတၠ တက်ကျာကဵုဖုၚ်ဂှ် စပ်ကဵုပရေၚ်က္ၜၚ်ကျာလီုစှ်ေအာဂှ်တုဲ သမ္မတပူတေန် ဒုၚ်လဝ်ဂုန်ရောၚ် ဂးကီုလေဝ် လ္ပာ်ရုယှာ ပန်ဖျေံတုဲ ဒဒှ်ရလီုစှ်ေအာလဝ်ဂှ်တှ်ေ ဒုၚ်လဝ်ဝန်ဟွံမွဲဂှ် ဂွံတီကေတ်ရ။
Ref: AFP