ဗေကျေန်၊ ဂျာန္နဝါရဳ ၂
ကြုက်ကေုာံရုယှာ ပံၚ်တောဲတုဲ ဆက်ကွာ်အာဒၟံၚ်ဂၠံၚ်တရဴမဍာံပြဏောၚ်ဂှ် သမ္မတကြုက် ယှဳကျေန်ဖျေန် ဒဒှ်ရဟီုလဝ်ဂှ် ဌာန်ပရိုၚ်ကၟိန်ဍုၚ်ပိုၚ် ဇြေန်ဟွာ ထ္မံက်ထ္ၜးလဝ် ပ္ဍဲဂိတုဒဳဇြေမ်ဗာ ၃၁ တေံရ။
စပ်ကဵုကိစ္စအကြာၜါဍုၚ် အရာပၟိက်ဇၞော်တံဂှ်တုဲ ဂွံပံၚ်တောဲအာ မစှ်ေကဵုမဟာဗျူဟာခေတ်တၟိဂှ် ထ္ပက်လဝ်စၟတ်တဲ တၚ်တုပ်စိုတ်တုဲ ဂၠိုၚ်ကဵုဂိတုလောန်ၜက်ကၠုၚ်တုဲဂှ် ဟီုကၠုၚ်လဝ်သာ်ဏံရ။
ညံၚ်ရဴအမေရိကာန်၊ ထိုၚ်ဝါန် ကေုာံ ယူကရုၚ် မဒှ်လ္ပာ်ဒစဵုဒစးသီုၜါဍုၚ်တံဂှ်ကီု ပ္ဍဲကဵုသွာၚ်ဒတုဲမြမောဝ် သီုၜါဍုၚ်မၞုံဒၟံၚ်တံဂှ် သွက်ဂွံပံၚ်တောဲရေၚ်တၠုၚ်အာ၊ ပရေၚ်ဆက်ဆောံအကြာၜါဍုၚ် ညံၚ်ဂွံဇြိုဟ်နက်ကၠုၚ် သွက်ဂွံရေၚ်တၠုၚ်အာဂှ် က္ဍိုပ်သ္ကိုပ်ကၟိန်ဍုၚ်ၜါတၠ တုပ်စိုတ်ထ္ပက်လဝ်စၟတ်တဲ ပ္ဍဲဂိတုမေသၞာံတုဲကၠုၚ်တေံရ။
သမ္မတကြုက် ယှဳကျေန်ဖျေန်ဂှ် အပ္ဍဲသၞာံ ၂၀၂၅ ဏံ ဒဒှ်ရအာစိုပ်ဍုၚ်ရုယှာဏောၚ်ဂှ် နိဿဲကေတ် ကလုတ်ရုယှာ ဖျေံသ္ဇိုၚ်ဗေကျေန်ဂှ်တုဲ ဌာန်ပရိုၚ် RIA ရုယှာပိုၚ်လဝ်ဂှ် ထ္မံက်ထ္ၜးလဝ်ရ။
ပ္ဍဲအရာဟီုဂလာန်ဆက်မုဟ်ပါၚ် ကၠောံသၞာံတၟိဏံ ကုသမ္မတရုယှာ ဗလာဒဳမာပူတေန်ဂှ် သမ္မတယှဳ ထိုၚ်သးလဝ် ပရေၚ်ပံၚ်တောဲရေၚ်တၠုၚ် မစှ်ေကဵုဗျူဟာ ကေုာံ ဓဝ်ပတှ်ေအကြာၜါဍုၚ်ဂှ်တုဲ ဒဒှ်ရမိက်ဂွံဆက်ထိၚ်အာ ပရေၚ်ဆက်ဆောံမဍုက်ကေဝ် ကုပူတေန်ဂှ်ရောၚ်ဂှ် ဟီုလဝ်ရ။
ပ္ဍဲသွာၚ်နာနာ ဟိုတ်နူပရေၚ်ပံၚ်တောဲရေၚ်တၠုၚ် ကြုက်ကဵုရုယှာတံဂှ်တုဲ အခေါၚ်အရာတၟိတၟိတံ ဆက်မံက်ဂတဝ်ကၠုၚ်ဏောၚ်ဂှ် သမ္မတယှဳ ဟီုဗပေၚ်လဝ်ရ။
ယှဳကျေန်ဖျေန်ဝွံ ကြဴနူသ္ပဒတန် အာယုက်သမ္မတညး သွက်မရနုက်ကဵုအလန်တတိယတုဲဂှ် ပ္ဍဲသၞာံ ၂၀၂၃ တေံ နူကဵုနန်ကရေမ္မလေန် ဒုၚ်တဲဒုၚ်တၠုၚ်လဝ်ညး နဒဒှ်မိဿဟာဲ မ္ဒးရှ်ေသှ်ေရဴဂဴမွဲရ။
ကြုက်ဝွံ ဟွံပ္တိုန်ဒုဟ် ဟွံဟီုဖျေံကဝု ကုပရေၚ်ရုယှာ မလုပ်ၜက်ၜေတ်လဝ်ယူကရုၚ်ဂှ်တုဲဂှ် ညံၚ်အမေရိကာန် ဇြဟတ်ဂွံဍိုန်စှ်ေအာဂှ် ကြုက်၊ ရုယှာ ကေုာံ အဳရာန်တံ ကၠောန်ၜိုတ်ဒၟံၚ်သ္ၚိတ်တ်ရောၚ် ဂလာန်မဟီုဂးဒၟံၚ်သာ်ဏံတံ မံက်တိတ်ဒၟံၚ်ရ။
Ref: Reuters