ဘရာတဳဆသလာပါ၊ ဂျာန္နဝါရဳ ၄
နူကဵုတွဵုဒၞက်ယူကရုၚ် ဒဒှ်မပလံၚ်ဗစိုပ်ဒၟံၚ်သၟုဟ်ဓာတ်ရုယှာ လ္ပာ်သလိုဝ်ဗကဳယျာဂှ် ကြဴနူယူကရုၚ်ဒေါအ်ကၠေံတုဲဂှ် အလဵုအသဳပံၚ်ကောံညးတံ ဒဒှ်ရသဳကၠဳအာအစဳဇန် မကလေၚ်ပၠန်အာတဲ လ္တူအလဵုအသဳကိဗ်ဂှ်ဏောၚ်ဂှ် သ္ကိုပ်ဝန်ဇၞော် သလိုဝ်ဗကဳယျာ ရဝ်ဗာတ် ဖဳကိုဝ် ဟီုလဝ် ပ္ဍဲဂိတုဂျာန္နဝါရဳ ၂ တေံရ။
သွက်ဂွံဒေါအ်ဒေၚ်အာ ပရေၚ်ထံက်ပၚ်ဒၟံၚ်ဇြဟတ်ဓာတ် ကုယူကရုၚ်ဂှ် ဗော် Smer ညး ဒဒှ်ရချပ်ဗ္စာဒၟံၚ်ဂှ် သ္ကိုပ်ဝန်ဇၞော် ဖဳကိုဝ် ဟီုလဝ် ပ္ဍဲကဵုဗဳဒဳယောသ္ကုတ် ညးမပ္တိုန်လဝ် လ္တူ Facebook ဂှ်ရ။
သၟုဟ်ဓာတ် မပလံၚ်ကဵုဒၟံၚ် နူရုယှာတံဂှ် ဟွံဂွံရတုဲ နကဵုသလိုဝ်ဗက်ကဳယျာ အရာမဇီုကပိုက်တံ နွံဒၟံၚ်တုဲ နကဵုဗော်ညးတံ သွက်ညးဒဒိုက်ယူကရုၚ်တံဂှ် ချပ်အာသ္ဂောံဖအောန်ဖျေံ အရီုအဗၚ်တံဏောၚ်တုဲ ယဝ်ရဟွံကလေၚ်စ ပရေၚ်ပလံၚ်ဗစိုပ်သၟုဟ်ဓာတ်တံဂှ်မ္ဂး သွက်ညးတံ မဒးဆောံလေၚ်ဂိဂေၚ်အာတံဂှ် ဒးကဵုအာၚုဟ်လေဲတံဏောၚ်ဂှ် သ္ကိုပ်ဝန်ဇၞော် ဖဳကိုဝ် ဟီုရ။
နူကဵုပၠံၚ်သၟုဟ်ဓာတ် လက်ထက်ခေတ်သဵုဗဳယေတ်တေံ မဒးတတ်အာ ယူကရုၚ်ဂှ်မွဲကဆံၚ် ပွမပလံၚ်ဗစိုပ်ဒၟံၚ်သၟုဟ်ဓာတ်ရုယှာတံဂှ်ဝွံ ပ္ဍဲတ္ၚဲကၠောံသၞာံဂှ် ဒေါအ်ဒေၚ်အာလဝ်တုဲ ဒဒှ်မရုယှာအုပ်ဓလီုလဝ် ဗွဝ်ဖျာဇြဟတ်ဓာတ်ယူရောပ် ကဵုစှော်သၞာံဂှ်လေဝ် တုဲဒှ်အာလဝ်ရ။
တၚ်တုပ်စိုတ် ပရေၚ်ပလံၚ်ဗစိုပ်သၟုဟ်ဓာတ် အကြာရုယှာကဵု ယူကရုၚ် အာယုက်အိုတ်အာတုဲဂှ် နကဵုယူကရုၚ် ဟွံထပ်ပပဵုပ္တိုန်လဝ်အာယုက် မဒှ်ရ။
ပ္ဍဲသလိုဝ်ဗကဳယျာဂှ် ဂွံထံက်ပၚ်သၟုဟ်ဓာတ်ဂှ် ဂၠံၚ်တၞဟ်ဟ်နွံကီုလေဝ် သ္ကိုပ်ဝန်ဇၞော် ဖဳကိုဝ် ဒဒှ်မကဵုဒၟံၚ်အရီုဗၚ်ပရေၚ်ပၞာန် ကုယူကရုၚ်ဂှ်ဒေါအ်ကၠေံတုဲ မပ္တိတ်ဒၟံၚ်ဇြဟတ် ဂွံဒက်ပရေၚ်ဆက်ဆောံ ကုမဝ်သကိုဝ်ဂှ်တှ်ေ နကဵုဍုၚ်ညးတံ ဒးဆောံလေၚ်အာ သြန်လုပ်မကလိဂွံဒၟံၚ် နူကဵုပရေၚ်ပလံၚ်ဗစိုပ်မွဲကဆံၚ်တံဂှ်ဏောၚ်တုဲ သွက်ဂွံပလံၚ်ဗစိုပ်သၟုဟ်ဓာတ် မဒှ်သၟုဟ်ဓာတ်ရုယှာဟွံသေၚ်တံဂှ်တှ်ေ ခရိတ်အိုတ်တံ ထပ်ဒးပၠန်ဏောၚ်ဂှ် ဟီုရ။
ဟိုတ်နူပြဝယူကရုၚ်သာ်ဏံတုဲ ၚုဟ်ဇြဟတ်ဓာတ် ကေုာံ ၚုဟ်သၟုတ်ဓာတ် ပ္ဍဲယူရောပ် သၠုၚ်တိုန်ကၠုၚ်ဏောၚ်ဂှ်လေဝ် သ္ကိုပ်ဝန်ဇၞော် ဖဳကိုဝ် ဟီုရ။
စပ်ကဵုအကာဲအရာသာ်ဏံတုဲ ဂကောံညးစၞးသလိုဝ်ဗကဳယျာဂှ်တှ်ေ ပ္ဍဲဂိတုဂျာန္နဝါရဳ ၇ ဏံ သဳကၠဳအာ ပ္ဍဲဗရာတ်သေဲဏောၚ်ဂှ် ညးဟီုဗပေၚ်လဝ်ရ။
ဣဏံဝွံ ဒှ်ကမၠောန်ပလီုပလာ် နူကဵုသမ္မတယူကရုၚ် ဗလိုဝ်ဒဳမာ ဇြဳလာန်သကဳဂှ်ဏောၚ်တုဲ သွက်ဂွံခၠေဝ်ပလန် ကုပြဝသာ်ဏံဂှ် ဂကောံအလဵုအသဳပံၚ်ကောံ သလိုဝ်ဗက်ကဳယျာ သဳကၠဳအာဏောၚ်ဂှ် ဖဳကိုဝ် ဟီုလဝ်ရ။
ဟိုတ်နူပြဝယူကရုၚ်တုဲ သြန်ဍုၚ်ညးတံ ဗ္ဒါဲယူရိုဝ် ၅၀၀ ပြကောဋိကိုဋ် ဒးဆောံလေၚ်အာဏောၚ်ဂှ်လေဝ် ညးဟီုလဝ်ရ။
Ref: Reuters