ၚုဟ်မးပိုၚ်ပြဳလဝ် နွံမံၚ် ဒဝ်ဠာအမေရိကာန် (၄၀၀)ပြကောဋိကိုဋ်ပြၚ်ဂှ် သ္ကိုပ်ဝန်ဇၞော်သေံ လလောၚ်ပ္တိတ်

က္ၜၚ်ကံက်၊ ဂျာန္နဝါရဳ (၅)

သ္ကိုပ်ဝန်ဇၞော်သေံ ပေတောန်ထာန် ယှေန်နာဝါထရာဂှ် ထိုၚ်ထွက်ဒဳဇြာၚ်နာ ဒဝ်ဠာအမေရိကာန် ၚုဟ်မးမၞုံ (၂)ပြကောဋိကိုဋ် (၂၀၀)မ ကေုာံ နာဍဳပါတ်တဲ ဒဝ်ဠာအမေရိကာန် ၚုဟ်မးမၞုံ (၅)ပြကောဋိကိုဋ် (၇၅)မ မပါလုပ် ၚုဟ်မးညးမပိုၚ်ပြဳလဝ်တံဂှ် မၞုံဒၟံၚ် ဒဝ်ဠာအမေရိကာန် (၄၀၀)ပြကောဋိကိုဋ်ပြၚ်ရဂှ် လလောၚ်ပ္တိတ်ကၠုၚ် ပ္ဍဲဂိတုဂျာန္နဝါရဳ စၟတ်တ္ၚဲ(၃)ဂှ်ရဂှ် ဗော်ညးတံ ဟီုရ။

ညးမဒှ်ကောန်ဝုတ်ဍောတ်အိုတ် တၠကမၠောန်ပရေၚ်ဆက်စၠောံ၊ သေဌဳဇၞော်ဗဳလျာန်နာ၊ သ္ကိုပ်ဝန်ဇၞော်တြေံ တေတ်ဇြေန် ပေတောန်ထာန် ယှေန်နာဝါထရာဂှ် သၞာံတုဲကၠုၚ် ပ္ဍဲဂိတုသေပ်တေမ်ဗာဂှ် ဒှ်ကၠုၚ်သ္ကိုပ်ဝန်ဇၞော်တုဲ ပ္ဍဲအပံၚ်သၞာံ (၂၀)သၞာံဂှ် ဒှ်ကၠုၚ်ဂကောံဇာတ်တေတ်ဇြေန် မက္ဍိုက်က္ဍိုပ်အလဵုသဳသေံ မရနုက်ကဵု စတုတ္ထရ။

နအလဵုညးဂှ် စပ်ကဵုတၚ်နၚ်ပရေၚ်ပိုၚ်ပြဳတံကဵု ပရေၚ်ဒးဆာပ်ပရေတံဂှ်တုဲ သွက်ဂွံပ္တိုန်ထ္ၜးကဵု ကဝ်မယှေန်ပရေၚ်ဗ္တိုက်သ္အး ပွစလာဘ်ဗ္ဇဴတံဂှ် တာလျိုၚ်နွံဒၟံၚ်ရ။

ၚုဟ်မးပရေၚ်ပိုၚ်ပြဳညးဂှ် သြန်ၝာတ်သေံ ၁၃ ဒဿမ ၈ ဗဳလျာန်( ဒဝ်ဠာအမေရိကာန် ၄၀၀ ပြကောဋိကိုဋ်ပြၚ်) နွံဒၟံၚ်ရဂှ် ဂွံတီကေတ် အတိုၚ်လိက်တၚ်နၚ် ထ္မံက်ထ္ၜးလဝ် ပ္ဍဲဝေပ်သိုက်တံဂှ်ရ။

ၚုဟ်မးညးဓလိုက်လဝ်တမ်ရိုဟ်ဂှ် မၞုံဒၟံၚ် သြန်ၝာတ် (၁၁)ဗဳလျာန်တုဲ သြန်ပအပ်လဝ်ပ္ဍဲတိုက်သြန်တံကဵု နကဵုမသြန်ဂှ် ပိုၚ်ပြဳလဝ် (၁)ဗဳလျာန်ပၠန်ရဂှ် ထ္မံက်ထ္ၜးပါလုပ်မံၚ် ပ္ဍဲတၚ်လလောၚ်တြးဂှ်ရ။

ပွပိုၚ်ပြဳညးတၞဟ်ဟ်တံဂှ် နာဍဳပါတ်တဲ (၇၅)မ ၚုဟ်မးသြန်ၝာတ်မၞုံ (၁၆၂)ပြကောဋိကိုဋ်၊ နာဍဳ (၃၉)မ ၚုဟ်မးသြန်ၝာတ်မၞုံ (၇၆)ပြကောဋိကိုဋ်၊ မ္ၚးနူထိုၚ်ထွက် (၂၁၇)မတံဂှ် စမြိုၚ်မၞုံပ္ဍဲ လာန်ဒါန် ကေုာံ ဂျပါန်တံကဵု ကမၠောန်တၞဟ်သ္အာၚ်တံ ပါလုပ်မံၚ်ရ။

သွက်ညးသ္ဂောံဒးဆာပ်ပရေဂှ် နွံဒၟံၚ် သြန်ၝာတ် ဗ္ဒါဲ(၅)ဗဳလျာန်ရဂှ် ဂွံတီကေတ် အတိုၚ်လိက်ကသုက်တၚ်နၚ် NACC တုဲ ၚုဟ်မးညးမပိုၚ်ပြဳသှ်ေသၟေဟ်ဒၟံၚ် သြန်ၝာတ် ၈ ဒဿမ ၉ ဗဳလျာန်ရဂှ် ဟီုစဂွံရ။

လၟိဟ်ဂဏန်ထ္မံက်ထ္ၜးလဝ် ပ္ဍဲမဳဒဳယာပ္ဍဲဍုၚ်တံဂှ် ဍာံစၟတ်မံၚ်ရဂှ် သၞာဲဒဴဗော်ဂွံအဝဵု ဖူထာၚ်မွဲတၠဂှ် သ္ပဒတန်လဝ်ကဵု ဌာန်ပရိုၚ် AFP ရ။ 

ၚုဟ်မး တေတ်ဇြေန် ညးမဒှ်မအံက် သ္ကိုပ်ဝန်ဇၞော် ပိုၚ်ပြဳကၠုၚ်လဝ် ဂကောံတေံဗဝ် မာန်သဳတဳမွဲအခိၚ်တေံ ပိုၚ်ပြဳလဝ်ဂှ် နွံဒၟံၚ် ဒဝ်ဠာအမေရိကာန် ၂ ဒဿမ ၁ ဗဳလျာန်ရဂှ် မဂ္ဂဇြေန်ဝှေါတ်ထ္မံက်ထ္ၜးလဝ်ဂှ်ရ ညးဂှ် ဒှ်ပူဂ္ဂိုလ်သေံ သိုက်အိုတ် မရနုက်ကဵုဒဿမရ။

ပ္ဍဲဍုၚ်သေံဂှ် ပရေၚ်ဆက်စၠောံ အကြာအဝဵုအဏာတံကဵု ပရေၚ်လောဲသိုက်တံ နွံကၠုၚ်ဒၟံၚ် နူကဵုအခိၚ်ကၠာကၠာတေံရဂှ် ညးလ္ၚတ်သ္ၚဳဂၠိပ်တံ ဟီုသ္ဂးလဝ်ရ။

ပရိုၚ်-AFP