ဗရက်သေဝ်လ်၊ ဂျာန္နဝါရဳ (၁၀)
သွက်ဂွံထိၚ်ဒဝ် ဒေသဂရေန်လာန် ဒုၚ်မာတ်ဂွံလဝ်အခေါၚ်အုပ်ဓုပ်အပိုၚ်ဂှ်တုဲ ဟွံပါဲဝးလဝ် ပရေၚ်သုၚ်စောဲဇြဟတ်ပၞာန်ရဂှ် ကြဴနူထရာန် သမ္မတအမေရိကာန် ညးဂွံဇၞးလဝ်ပေါဲရုဲမာဲ ဟီုဘပဠတုဲဂှ် ညံၚ်ဟွံဂွံသ္ပပရေၚ်ဘပဠတံဂှ် ဂျာမနဳကေုာံပြၚ်သေတ်တံ ဟီုဂးကဵုလဝ်သတိရ။
မူဟွံဖံက်ပလီုဒေသပယဵုတံဂှ် ဍုၚ်ဍောတ်တ်ကီုဇၞော်ဇၞော်ကီု ဆေၚ်စပ်ဒၟံၚ်ကဵု ဇၟာပ်ဍုၚ်ရဂှ် သ္ကိုပ်ဝန်ဇၞော်ဂျာမနဳ အိုဝ်လက်ဖ်ယှူဂှ် ဟီုသ္ဂးလဝ်ရ။
နအလဵုသမဂ္ဂဥရောပဂှ် ပယဵုဒၞက် မၞုံပ္ဍဲအဝဵုအပိုၚ်အခြာဇကုတံဂှ် ဟွံကဵုအခေါၚ်ဍုၚ်တၞဟ်သ္အာၚ်တံဗ္တိုက်ရောၚ်ဂှ် သ္ဇက်သ္ဂောံဒးပ္တိတ်သၟာန်ဟွံမွဲရဂှ် ဝန်ဇၞော်ကာဍုၚ်သ္အာၚ်ပြၚ်သေတ် ဂျုၚ်နိုအေဝ်ဗာရအ်ဂှ် ဟီုဂးလဝ်ရ။
ဂရေန်လာန်ဂှ် ဒှ်ဒေသပၟိက်ဇၞော် သွက်ပရေၚ်ပိုန်ဒြပ်သ္ဂောံဂီုကၠီုမွဲရဂှ် ထရာန် ခြာဟွံလအ်ဏံ ညးမစိုပ်ကၠုၚ်သ္ၚိဗုဂှ် ထပ်ဟီုဂးလဝ် ပ္ဍဲဂိတုဂျာန္နဝါရဳ စၟတ်တ္ၚဲ(၇)ဂှ်ရ။
ချပ်လဝ်သွက်ဂွံရာန်ကေတ် ဂရေန်လာန်ရဂှ် ထရာန်ဟီုလဝ် ထပ်ကဵုထပ်တုဲ အစဳဇန်ဏံဂှ် မံက်တိတ်ကၠုၚ် ပ္ဍဲအာယုက်သမ္မတပထမညး ပ္ဍဲသၞာံ ၂၀၁၉ ဂှ်ရဂှ် သ္ဂးရ။
ဂရေန်လာန်ဂှ် သွက်ဂွံသွံစဟွံသေၚ်ဂှ်ကဵု ဒှ်ဒေသညးမံၚ်တန်တဴတံပိုၚ်ပြဳမွဲရဂှ် မဟာမိတ်ဍာ်ဇမၠိၚ်အမေရိကာန် ဒုၚ်မာတ်ဂှ် ဟီုလဝ် ဗွဲမကၠးဖ္ဍးရ။
သ္ကိုပ်ဝန်ဇၞော်ဂရေန်လာန် မူတဳ အက်ဂဳတဳဂှ် သွက်သ္ဂောံဂွံအခေါၚ်ဗၠးၜး နူဒုၚ်မက်ဂှ် ကဵုဒၟံၚ်ဇြဟတ်ဂရိုဟ်ကီုလေဝ် ညးလေဝ် ဒဒှ်ရဂရေန်လာန်ဂှ် သွက်သ္ဂောံသွံစဟွံသေၚ်ရဂှ် ဟီုသ္ဂးလဝ်ရ။
သ္ကိုပ်ဝန်ဇၞော်မူတဳဂှ် ပ္ဍဲဂိတုဂျာန္နဝါရဳ စၟတ်တ္ၚဲ(၈)ဂှ် အာစိုပ်လဝ် ဍုၚ်ဇၞော်ဒုၚ်မာတ် ကိုဝ်ဗေန်ဟေဂေန်ရ။
ဒုၚ်မာတ်ဂှ် ညံၚ်ရဴဂျာမနဳကေုာံ ပြၚ်သေတ်တံကီု ဒှ်ဂကောံဍုၚ် နေတိုဝ် အမေရိကာန်က္ဍိုက်က္ဍိုပ် မွဲဍုၚ်ကီုရ။
ဆ္ဂး ယဝ်ရဗ္တိုက်ကၠုၚ် ဂရေန်လာန်မ္ဂး ဟိုတ်နူနအလဵုညးတံ စဵုဒၞါဟွံမာန်ဂှ်ရ ဗီုလဵု အဳယူတံ စဵုဒၞါရောၚ်ဟီုဂှ် ချိၚ်ခယျဝါတ်ဒၟံၚ်ရ။
ထရာန် ညးမဒှ်ကၠုၚ်သမ္မတဂှ် လ္ဂောံကဵုပရေၚ်ပၞာန်ကီု ပရေၚ်ပိုန်ဒြပ်ကီု သုၚ်စောဲအာဂရေန်လာန်တံတုဲ ဟွံပါဲဝးလဝ် ပရေၚ်ထိၚ်ဒဝ်ရဂှ် ဟီုဂးလဝ်ရ။
Ref: BBC