သဵု(လ်) ၊ ဂျာန္နဝါရဳ ၁၆
အပ္ဍဲပေါဲဗ္တိုက် မက္တဵုဒှ်လဝ် ပ္ဍဲသတ္တာဟဏံ ပ္ဍဲဒေသကာသ် ဗွဲဒိုဟ်ပလိုတ် ဍုၚ်ရုယှာဂှ် ကောန်ပၞာန်ကိုဝ်ရဳယျာသၟဝ်ကျာလ္ၚဵုတံဝွံ ဂွံလဝ်ဝပ်ကီုလေဝ် ဟွံဖျေံလွဟ်မွဲသာ် ဟိုတ်နူကၠောန်သ္ပလဝ် ပရေၚ်ဒုၚ်ချိုတ်တံဂှ်ရ နကဵုဒပ်ပၞာန်ယူကရုၚ် ဒးဆေၚ်ဒၟံၚ်မုက်ကဵု တၚ်ကော်ဆဴတၟိရ။
အပ္ဍဲပေါဲဗ္တိုက်ဂှ် ကောန်ပၞာန်ကိုဝ်ရဳယျာသၟဝ်ကျာ မဘိုၚ်ဗ္တိုက်ကဵုဒၟံၚ် လ္ပာ်ရုယှာဂှ် ဂွံဆဵုကေတ်လဝ် ဇွကောန်ပၞာန်တံဏံ မွဲဒါဇြိန်ပြၚ်တုဲ အခိၚ်ကောန်ပၞာန်ယူကရုၚ်တံ ဂၠိုက်ဂၠါဲဂှ် ကလိဂွံလဝ်ဝပ်ကီုလေဝ် ကောန်ပၞာန်ကိုဝ်ရဳယျာသၟဝ်ကျာ လမျီုဂျိုၚ်တဴဒၟံၚ်မွဲတၠ ဒဒှ်ရဖံက်ထ္ကးမခတိုဟ် ဒုၚ်ချိုတ်လဝ်ဂှ် ဂကောံဒပ်ပရေၚ်ပၞာန်ဗွဲတၟေၚ် ယူကရုၚ်တံ ထ္မံက်ထ္ၜးလဝ် ပ္ဍဲမဳဒဳယျာပရေၚ်မၞိဟ်ရ။
နကဵုကောန်ဒပ်ညးတံ ဟွံဇီုကပိုက်ဒးမွဲသာ် ဒဒှ်ရဗၠးအာ နူကဵုဘဲပရေၚ်ဗ္တိုက်ထောံမခတိုဟ် ဒုၚ်ချိုတ်ဏံဂှ် ဒပ်ပရေၚ်ပၞာန်ဗွဲတၟေၚ်ယူကရုၚ် ဟီုလဝ်ရ။
စပ်ကဵုလၟေၚ်ဒဒှ်ဏံတုဲ ဌာန်ပရိုၚ်ရိုက်တာ သ္ပဒတန်ဟွံဂွံဏီပုဟ်ဂှ် ထ္မံက်ထ္ၜးလဝ်ရ။
နကဵုကောန်ပၞာန် ကိုဝ်ရဳယျာသၟဝ်ကျာဂမၠိုၚ် ပွမဖံက်ထ္ကးမခတိုဟ် ဒုၚ်ချိုတ်သာ်ဏံဂှ်ဝွံ ဒှ်ဒ္ဂေတ်လၟေတ်ညးတံရဂှ် ကောန်ပၞာန်ကိုဝ်ရဳယျာသၟဝ်ကျာတြေံမွဲတၠ စိုပ်ဒၟံၚ်ကိုဝ်ရဳယျာသၠုၚ်ကျာဂှ် သ္ဂးရ။
ကောန်ပၞာန် မဗလးဏာ သ္ဂောံဗ္တိုက်ပၞာန်တံဂှ် ကိုဝ်ရဳယျာသၟဝ်ကျာ တက်ပၠောပ်လဝ်ဓဝ်ပတှ်ေတံတုဲဂှ်ရ ညးတံဝွံ ဂွံဒုၚ်ချိုတ် သွက်က္ဍိုပ်သ္ကိုပ်ကေန်ဂျုၚ်အာန်ဂှ် ဒှ်ညးဂံၚ်သၠးပွးလမျီုညးတံရောၚ် ကောန်ပၞာန်တြေံ ကိုဝ်ရဳယျာသၟဝ်ကျာဂှ် ဟီုလဝ်ရ။
သၞာံတုဲကၠုၚ်တေံ ပ္ဍဲကဵုဒေသကာသ် ဒပ်ယူကရုၚ်တံ လုပ်စိုပ်သီဂွံလဝ်ဂှ် သွက်ဂွံရီုဗၚ်ဒပ်ရုယှာတံဂှ် ဖျေံလဝ်ကောန်ပၞာန်ကိုဝ်ရဳယျာသၟဝ်ကျာ ၁၁၀၀၀ ရောၚ် ပရိုၚ်တမ်ရိုဟ်ထံၚ်ပရိုၚ် ယူကရုၚ်ကဵု ဍုၚ်ပလိုတ််တံ ဟီုရ။
တုဲကၠုၚ်ဟွံလအ်ဂှ်လေဝ် ဒပ်ယူကရုၚ် ရပ်ဂွံလဝ်ကောန်ပၞာန်ကိုဝ်ရဳယျာသၟဝ်ကျာၜါတၠ ဂျိုၚ်ၚ်တုဲ ဂွံလှာဲဂတး ကုကောန်ပၞာန်ယူကရုၚ် ဒးဒုၚ်ရပ်လဝ် ပ္ဍဲယူကရုၚ်ဂှ် ဒှ်ဒၟံၚ်ဒတုဲရောၚ် ကဵုလဝ်ဒမြိပ်အရေဝ်ရ။
ပရိုၚ်မဖျေံလဝ်ကောန်ပၞာန်ကိုဝ်ရဳယျာသၟဝ်ကျာ ပ္ဍဲရုယှာဂှ် ကၠာတေံမ္ဂး ရုယှာ ကေုာံ ကိုဝ်ရဳယျာသၟဝ်ကျာတံဂှ်တှ်ေ ဒှ်ပရိုၚ်ပတောံဂးတုဲ တးပါဲလဝ်ရ။
ဆ္ဂး စပ်ကဵုဖျေံလဝ်ကောန်ပၞာန်ကိုဝ်ရဳယျာသၟဝ်ကျာတံဂှ်တုဲ သမ္မတရုယှာ ဗလာဒဳမာပူတေန်ဂှ်တှ်ေ တုဲကၠုၚ်ပ္ဍဲဂိတုအံက်တဝ်ဗာတေံ တးပါဲလဝ်လေဝ်ဟွံမွဲ ဒုၚ်လဝ်ဝန်လေဝ် ဟွံမွဲရ။
ယဝ်ရဖျေံလဝ်ကောန်ပၞာန်ကိုဝ်ရဳယျာသၟဝ်ကျာ ပ္ဍဲရုယှာမ္ဂးလေဝ် ဒှ်အရာမဖျေံလဝ် ဗွဲမလုပ်သၞောဝ်ရဏောၚ်ဂှ် သၞာဲဒဴကိုဝ်ရဳယျာသၟဝ်ကျာမွဲတၠ သ္ဂးရ။
နကဵုကောန်ပၞာန်ကိုဝ်ရဳယျာသၟဝ်ကျာဂမၠိုၚ် ယဝ်ရဒးဒုၚ်ရပ် ဇရေၚ်သၞတံမ္ဂး ဒှ်ပွဖံက်သစ္စ လ္တူကၟိန်ဍုၚ်ရောၚ် ကောန်ပၞာန်တြေံ ကိုဝ်ရဳယျာသၟဝ်ကျာ စိုပ်ကိုဝ်ရဳယျာသၠုၚ်ကျာတံ ဟီုလဝ်အိုတ်ရ။
Ref: Reuters