ရေဝ်၊ ဂျာန္နဝါရဳ ၂၁
တွဵုရးဍုၚ်မန် ပွိုၚ်ဍုၚ်ရေဝ် လ္ပာ်ဒေသကြုၚ်လံၚ်ဂှ် ဒပ်ၜါလ္ပာ်တံ ဆက်ပတဝ်လဝ်မုက်ပၞာန်တုဲ ပေါဲဗ္တိုက်ၜါလ္ပာ် သာသ္ကာတ်မြဟ်ကၠုၚ်မာန်ရောၚ် ညးတာလျိုၚ် နူဒပ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဒေသကြုၚ်လံၚ် ဒၞါဲဂကောံဇြဟတ်ပၠန်ဂတးတံ ချဳဒရာၚ်ဇြဟတ်ခိုဟ်ဂှ် စနူဂိတုဂျာန္နဝါရဳ ၈ တုဲကၠုၚ်တေံတုဲ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်တုဲ ပေါဲဗ္တိုက်ၜါလ္ပာ် က္တဵုဒှ်လဝ်ရ။
ပေါဲဗ္တိုက်တံဏံ ဆက်က္တဵုဒှ်ဒၟံၚ် စဵုကဵုဂိတုဂျာန္နဝါရဳ ၁၉ တုဲ ဒပ်ကံၚ်ဇြဳပၞာန်လေဝ် ထပ်ဗလးလဝ် ဒပ်ပၞာန်အရီုတုဲ လုပ်စိုပ်ဖျေံလဝ်ဒပ် ပ္ဍဲကဵုကွာန် ပွဳပွူဗ္ဒါဲဒေသကြုၚ်လံၚ်ဂှ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန်ဂှ်တှ်ေ ယဝ်ရလ္ပာ်ဒပ်ကံၚ်ဇြဳပၞာန်တံ ဆက်ထ္ပက်ကၠုၚ်ပၞာန်မ္ဂး ပေါဲဗ္တိုက်တံဏံ လှဲလးကၠုၚ် ဒဵုကဵုတိဍာ်ထိၚ်ဒက်ဗော်ဍုၚ်မန်တၟိမာန်ဂှ် ဟီုရ။
အခိၚ်လၟုဟ်ဂှ်လေဝ် ဒပ်ကံၚ်ဇြဳပၞာန်ဝွံ မ္ၚးနူကဵုတမ်ဒပ်ခမရ စၟတ် ၅၈၃၊ ၅၉၁ ဖျေံသ္ဇိုၚ်ရေဝ်ဂှ် နူကဵုကွာန် မဖျေံလဝ်ဒပ်တံဂှ်လေဝ် ပန်ပှော်နၚ်ဒၟံၚ်လွဟ်ဇၞော် ကြပ်အရိုဟ်ဒဒှ်တ္ၚဲရ။
ဟိုတ်နူဒပ်ကံၚ်ဇြဳပၞာန် ပန်ပှော်ကၠုၚ်လွဟ်ဇၞော်ဂှ်တုဲ ပ္ဍဲဂိတုဂျာန္နဝါရဳ ၁၉ တေံဂှ်လေဝ် သ္ၚိဒၟံၚ်ညးဒေသၜါမ နူကဵုကွာန်ဘာ ဇီုကပိုက်လီုလာ်အာလဝ်ရ။
အပ္ဍဲပေါဲဗ္တိုက်ၜါလ္ပာ်ဂှ် ဒပ်ကံၚ်ဇြဳပၞာန် မဒးဂိအာလဝ်ဂှ်ဝွံ တုဲကၠုၚ်ပ္ဍဲဂိတုဂျာန္နဝါရဳ ၉ ကဵု ၁၀ တေံဂှ်လေဝ် ကၠောန်သ္ပဗ္တိုက်ကၠုၚ်လဝ်ကဵုပၞာန်ကျာ ဟွံအောန်နူကဵုပိဝါရ။
အတိုၚ်တၚ်လလောၚ်တြး ဒပ်ပၠန်ဂတးတံဂှ်မ္ဂး အပ္ဍဲပေါဲဗ္တိုက်ရေဝ်ဂှ် လ္ပာ်ကံၚ်ဇြဳပၞာန် ချိုတ်အာ ၇၀ ပြၚ်တုဲ ဗ္ဒါဲ ၃၀ ဇီုကပိုက်ကလိဂွံလဝ်ဝပ်တုဲ လ္ပာ်ဒပ်ပၠန်ဂတးတံလေဝ် ကောန်သ္ဂံၚ်ပိတၠ ကလိဂွံလဝ်ဝပ်ရ။
ဟိုတ်နူပေါဲဗ္တိုက်ရေဝ်တုဲ ကွာန်နူကဵုပွဳပွူဗ္ဒါဲဒေသကြုၚ်လံၚ် ဟွံအောန်နူကဵု ၅ ကွာန်ဂှ် ဒးဂြိပ်ဒဴပါဲဒလေတ်ဒၟံၚ် ကြပ်အလုံကွာန်မွဲတုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ် ဂွံတီကေတ် နူကဵုညးမရီုဗၚ်ဒၟံၚ်ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−MLA