တၞၚ်သဳ၊ ဂျာန္နဝါရဳ ၂၁
ရးတၞၚ်သဳ ပွိုၚ်ဍုၚ်တၞၚ်သဳ ပ္ဍဲကဵုသ္ကုတ်ဂၠံၚ်တၞၚ်သဳ−မဝ်ဒံၚ် အပ္ဍဲကဵုပေါဲဗ္တိုက် မက္တဵုဒှ်ဒၟံၚ် ကြပ်အရိုဟ်ဒဒှ်တ္ၚဲတံဂှ် ၜါလ္ပာ်ဇီုကပိုက်ပြဟ်လလုဲတံ ဂၠိုၚ်ကၠုၚ်ဂှ် ညးတာလျိုၚ် ဒပ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဒဳဇြေမ်ဗာ ၁၈ တုဲကၠုၚ်တေံတုဲ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ် ပ္ဍဲကဵုသ္ကုတ်ဂၠံၚ်တၞၚ်သဳ−မဝ်ဒံၚ်ဂှ်တုဲ ပ္ဍဲကဵုဍာ်ဗု၊ တုၚ်ခေါန် ကေုာံ ပွဳပွူကွာန် (ချောၚ်းနှစ်ပေါက်) တံဂှ် ပေါဲဗ္တိုက်က္တဵုဒှ်ဒၟံၚ် လၟေၚ်ဒဒှ်တ္ၚဲရ။
ပေါဲဗ္တိုက်တံဏံဝွံ ဆက်က္တဵုဒှ်ဒၟံၚ် စဵုကဵုဂိတုဂျာန္နဝါရဳ ၁၉ တုဲ အပ္ဍဲပွိုၚ်မွဲဂိတုဂှ် က္တဵုဒှ်လဝ် ပေါဲဗ္တိုက်ဆေၚ်မုက် ဟွံအောန်နူကဵု ၃၀ ဝါရ။
အပ္ဍဲကာလပေါဲဗ္တိုက်ဏံဂှ် လ္ပာ်ကံၚ်ဇြဳပၞာန် ၄၀ ပြၚ် ချိုတ်အာလဝ်တုဲ ကောန်ဒပ်ကံၚ်ဇြဳပၞာန် မသုန်တၠဂှ် ဒပ်ပၠန်ဂတးတံ ရပ်ဂွံလဝ်ဂျိုၚ်ၚ်တုဲ သီုကဵုသီဂွံလဝ် လွဟ်လက်နက်မကမ်ဂမၠိုၚ်ရ။
လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတံဂှ်တှ်ေ ပန်တၠ ပြဟ်လလုဲအာလဝ်တုဲ မၞိဟ်ကလိဂွံဝပ်တံလေဝ် နွံဒၟံၚ်တုဲ မကမ်လွဟ်လက်နက်လ္ၚဵုတံဂှ်လေဝ် လ္ပာ်ကံၚ်ဇြဳပၞာန်တံ သီဂွံလဝ်ရ။
ကရောၚ်ပၞာန်ကံၚ်ဇြဳပၞာန်ဝွံ စဵုကဵုဂိတုဂျာန္နဝါရဳ ၂၀ ဖျေံလဝ်ဒပ် အပ္ဍဲကွာန်တုၚ်ခေါန်တုဲ ပရေၚ်ပၞာန်ၜါလ္ပာ် ဆက်သ္ကာတ်မြဟ်ဒၟံၚ်ရောၚ် ညးတာလျိုၚ် ဒပ်ပၠန်ဂတးမွဲတၠ ဟီုရ။
ဟိုတ်နူပေါဲဗ္တိုက်ၜါလ္ပာ်တုဲ ဒဵုကဵုတ္ၚဲဏံ ဆက်ကၟာတ်လဒဵုလဝ် သ္ကုတ်ဂၠံၚ်တၞၚ်သဳ−မဝ်ဒံၚ်ဂှ်တုဲ ကွဳစက်အာတရဴတံဂှ်လေဝ် ဟွံဂွံကဵုအခေါၚ်တတ်ကၠောံအာကၠုၚ်ဏီပုဟ်ဂှ် ဂွံတီကေတ်ရ။
အပ္ဍဲကာလပေါဲဗ္တိုက်က္တဵုဒှ်ဒၟံၚ် တုဲကၠုၚ်ပ္ဍဲဂိတုဒဳဇြေမ်ဗာ ၁၈ ကဵု ၂၀ တံဂှ် လ္ပာ်ကံၚ်ဇြဳပၞာန် ဗ္တိုက်ထောံလဝ်မခတိုဟ် ဟွံအောန်နူကဵု ၁၀ မ နကဵုက္ၜၚ်ကျာဗ္တိုက်ရ။
ဟိုတ်နူပေါဲဗ္တိုက်ဂှ်တုဲ ညးဒေသဗ္ဒါဲ ၁၀၀၀ နူကဵုကွာန်ဍာ်ဗု၊ ထုၚ်မခါ၊ (ချောင်းနှစ်ပေါက်) ၊ တုၚ်နဝ်တံ ဒးပါဲဒၟံၚ်ပၞာန် မွဲဂိတုပြၚ်ကၠုၚ်ယျတုဲ ပရေၚ်စသုၚ်မံၚ်စံၚ် ကြေပ်ဂြတ်ကၠုၚ်မံၚ်အိုတ်ဂှ် ဂွံတီကေတ် နူကဵုညးပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−CJ